[1] Ku jam tali ka dai yeŋ ate Gaambasika Tigini a paari. Yeezu a jam seba ayen wa yikka danni a mɔata kama ate wa basi tɛŋzuk de abe wa ŋmani a cheŋ wa kowa jigi. Wa jam kasim a yaali baai ale bo tɛŋka po ate wa soa la kama a ga paari wa kum.
[2] Wenni ale jam a siŋ ate tɛŋka a sobi la, Yeezu ale wa ŋaaŋviirima a yaa jam boro a de yok ŋandiinta. Velinvendika a poom basi ate Judas Iskariot, Simon biika a ta ka popola ayen wa bobri Yeezu a sak.
[3] Yeezu a jam seba ayen wa kowa waai ale tom wa ate wa jam tɛŋzuk de la, ale pa jaab buuri meena pagrim a te wa. Wa be jam a seba me ayen wa nyini ka Naawen jigi a jam, alege ŋman pilim a cheŋ Naawen jigi.
[4] Ba le diem boro a de la, Yeezu a yaa yiti ŋmai a yeeri wa garuk kuui ate wa jo a basi ŋmai la a dueni tɛŋ ale ge a pai papa a bobi wa chiaka.
[5] Wa yaa ŋari nyiam a nyo chin kpien po a pa ta nyiem a sugri wa ŋaaŋviirima naŋsaŋa a gilim ale a bili si ale papawa.
[6] Wa ale sugri a ga paari Simon Piita la Piita a yaa weeni wa ayen, «M Nyɔnɔ, fi ayen fi sugri mi naŋsaŋa kama?»
[7] Yeezu a yaa weeni wa ayen, «Fi ze dii ate mi a nyɛ a te fu yɔgyɔgla de la kiriya, alege ku dan ga nyɛ maga, fi le miŋ di kiri.»
[8] Piita yaa weeni wa ayen, «Mi a kan basi ate fi a sugri mi naŋsaŋa diipo diipo.» Yeezu a yaa weeni wa ayen, «Fi dan kan basi ate mi a sugri si, fi kan ŋman a maa chim mi ŋaaŋviirima po wanyi.»
[9] Simon Piita a yaa deri kpabi tulisi wa ayen, «Ku be dan ka dila, be kan sugri m naŋsaŋa nyiini, maa sugri m nisimaŋa ale m zukku meena me.»
[10] Yeezu a ŋman weeni wa ayen, «Fi dan so fi nyiŋka a be, ka nala kama, alege fi dan ŋman cheŋ a ga jigi, fi naŋsaŋa a daŋ kama. Si le daŋ la, fi yaa sugri ka fi naŋsaŋa nyiini.» Wa le biisi ale Piita a nueri la, wa yaa ŋman chiem wa ŋaaŋviirima jigi a weeni ba ayen, «Yɔgyɔgla de ni suniima meena a nala kama, alege ka ni po wanyi sunum ale daŋi.»
[11] Yeezu a poom seba waai dek a le wa ta wa a ga bobri a sak la kama, dila ale soa ate wa weeni dila la.
[12] Yeezu ale sugri ba naŋsaŋa a nueri la, wa yaa pa wa garuku a ŋman jo ale pilim cheŋ wa kalika jigini a weeni ba ayen, «Ni miŋ dii ate m nyɛ a te ni la kiri ya?
[13] Nama a kasim a wi mi ayen ka ni sagrɔ ale ni nyɔnɔ. Kula a magsi kama, dii nyiŋ la mi sum ka ni sagrɔ ale ni nyɔnɔ.
[14] Mi waai ale ka ni nyɔnɔ ale ni sagrɔ la, ale sugri ni naŋsaŋa. Nama dek me a sugri chaab naŋsa.
[15] Mi a nyɛ ka magsa a sagi ni ayen ni a va.
[16] Wensie ate mi a weeni ni. Yomo a kan zuagi a gaam wa nyɔnɔ. Tomteerɔ me an baga a zuagi a gaam waai ale tom wa la.
[17] Yɔgyɔgla de ate ni seba wensieŋa la ni sue a le peenti ase ni nin a nyɛ dila.
[18] «Mi ale a biisi dii ale ni la, daa ni meena ate mi a weeni, alege ka baai nyiini ate m lueri a te m dek la. Ba ŋmarisi Naawen gbaŋka po ayen, ‹Waai a le wa ta mu a ga bobri a sak la, wala ate mi ale wa a de ŋandiintaŋa ale chaab.› Ba le ŋmarisi wieŋa de dii la, a le jam a chim ka wensie.
[19] Dila nyiŋ la, m liŋ a weeni ni kama, ayen ku dan jam boro a nyɛ, ni ta siaka ale mi ale weeni ayen m ka waai la.
[20] Wensie ate mi a weeni ni. Baai meena ale a te waai ate mi a tom la, tia la, a te ka mi tia dila. Baai meena ale a te mi tia me la, ba a te ka waai ale tom mu la tia dila.»
[21] Yeezu ale biisi a nueri la, ku yaa daani wa, wa sunum po nna yegayega. Wa yaa weeni wa ŋaaŋviirima ayen, «Wensie ate mi a weeni ni, ni po wanyi a le wa ta mu a ga bobri sak.»
[22] Ba yaa deri gisi a nya chaab ale a poli le ka waai dek la.
[23] Waai ate Yeezu a jam a yaali ba po nna yegayega la a jam kala kama a mɔata wa.
[24] Simon Piita a yaa magsi a weeni wa ayen wa bek Yeezu a miŋ waai dek a le wa nyɛ wa dila la.
[25] Waai ate Yeezu a jam a yaali nna yegayega la, a yaa forisi paari a bek wa ayen, «M Nyɔnɔ, ka wana dega?»
[26] Yeezu a yaa weeni wa ayen, «Waai ate mi a pa boroboruku a siuk jentaŋa a te wa la, wa le la.» Wa yaa deri pa boroboruk a siuk jentaŋa a te Judas Iskariot, Simon biika.
[27] Judas ale ga tuesi boroboruku la, Sitaana a yaa deri a jam jo wa popola po ate ŋa tagri. Yeezu a yaa weeni wa ayen, «Cheŋ nwuli a ga nyɛ dii ate fi ta la.»
[28] Baai ale jam a tigsi ale wa a boro a de ŋandiintaŋa la, an jam a miŋ wa le weeni dii la kiriya.
[29] Judas a jam ale waai ale a nya ba ligraŋa zuk la. Dila nyiŋ la, ba jam a poli kama ayen Yeezu a tom wa kama ayen wa cheŋ a ga da ŋanta a magsi tigini, yaase wa te niwomma ligra.
[30] Judas ale ga tuesi boroboruku la, wa yaa deri yiti a nyini a cheŋ. Ku jam ka yok ate wa nyini la.
[31] Judas a yaa le cheŋ a ga nueri la, Yeezu a yaa weeni wa ŋaaŋviirima mbala ayen, «Nuruba yegayega a le ba te Naawen pimpauk dii ate nuruba ayen ba nyɛ mi la nyiŋ. Diipo ate Naawen ayen wa pa wa zulaŋa ale wa nalimu yegayegaka a te mi Saalobiika la a mɔata kama. Ku kan beni ate wa nyɛ ku.
[33] M bisa, mi a kan bo ale ni ate ku beni. M dan cheŋ, ni le nyiem a gisi m boka jigi. Ni teeri diipo ate m weeni Juuma kpaŋŋa ayen ba kan baga a va mu a cheŋ juijui ate mi a cheŋ la. Ni kan baga a cheŋ juijui ate mi a cheŋ la.
[34] Sinsak paali ate mi a yaali ayen ni va. Ni a yaali chaab nalimnyiini. Mi ale yaali ni a soa dii la ni a yaali chaab dila.
[35] Ni daa yaali chaab dila, waai meena a le seba ayen ni ka mi ŋaaŋviiriba.»
[36] Simon Piita a yaa bek wa ayen, «M Nyɔnɔ, fi a cheŋ ka be?» Yeezu a yaa weeni wa ayen, «Fi kan baga a va mu a cheŋ yɔgyɔgla de, alege ku dan ga nyɛ maga, fi le baga a va mu.»
[37] Piita a ŋman bek wa ayen, «M Nyɔnɔ, ka boa ale soa ate mi an baga a va fu yɔgyɔgla de? Mi a gomsi a magsi kama ayen m kpi fi nyiŋ.»
[38] Yeezu a yaa bek wa ayen, «Fi sum gomsi a magsi ayen fi kpi mi nyiŋŋa? Wensie ate mi a weeni fu. Fi le weeni nuruba ku noai buta yokku de ayen fi ze mi abe varikpadiaka a kum.»