[1] Sɔɔl a jam maa ka baai ale siak ayen ba ko Sitiven la po wanyi. Da dii danni ate ba ko Sitiven la, Kirisita bisaŋa ale a tu chaab Jerusalem tɛŋka la a deri piilim ninam nna yegayega nyaka. Baai ale ta siaka ale Yeezu la, a yaa jam waaŋ chaab Judia ale Samaria tɛŋsaŋa meena po. Ka tuimtomdɔma nyiini ale jam kan waaŋ chaaba.
[2] Nuru baai ale ŋmasi jam yaali Naawen siuku nna yegayega la, ale jam ta Sitiven a ga gu ale a kaari nna yegayega.
[3] Alege Sɔɔl a jam diem pii ka nyiŋ a nyiem gilim a cheŋ yeeŋa dinyi dinyi a basi ate Kirisita bisaŋa ale a tu chaab la a nam a dari ba meena nidɔaba ale nipooba a yuk basi likka diinaŋa po.
[4] Baai meena ale ta siaka ate ba waaŋ jigi meena la, a yaa jam nyiem a cheŋ jigi meena a sak Naawen wamaŋsaŋa.
[5] Filip jam cheŋ ka Samaria tɛŋkpieŋka dek po a sak nuruba. Varibasidɔwa ate Naawen weeni ayen wa le basi ate wa jam la wie.
[6] Nuru bɔanni ale jam nya wakperikaliik sii ate Filip nyɛ la, ba yaa ŋmasi lagi ba tueŋa nalimnyiini a wom wa sinsaŋŋa.
[7] Wie ŋaai ale jam nyɛ la gela ale, nuruba yegayega baai ale jam ta chichiribaata ba zuima po la, a kaari ate ti a nyini, ale baai naŋsa ale ba nisima ale jam kpi la, a jam nya nyiŋyɔgsa kama.
[8] Dila nyiŋ la, supeentik nna yegayega a jam bo tɛŋ kala po kama.
[9] Nuru wanyi ale jam bo tɛŋ kala po. Wa yoi jam ale Simon. Wa jam ka tiita nyɔnɔ. Wa jam pa ka tiita a nyɛ wakperikaliisa nna yegayega ate ŋa cha Samaria demma. Wa jam pa wa dek a chim ka nuru kpioŋ.
[10] Waai meena nuru kpeenta ale nuru fiisa tɛŋ kala po a jam a wom wa ka nna yegayega a weeni ayen, «Nuruwa de ta ka Naawen pagrim kpiem buui ate ti a wi wa ayen Pagrim kpioŋ la.»
[11] Ba jam a wom wa kama nalimnyiini dii nyiŋ la, wa wakperikaliisaŋa a jam cha ba beni ka nna yegayega.
[12] Alege ba ale jam wom Filip sinsaŋŋa a magsi chaab ale Naawen Naamu ale Yeezu Kirisita pagrimu wie la, ba meena nidɔaba ale nipooba a jam tuesi ka soka.
[13] Simon dek a jam maa ta siaka kama. Ba ale jam te wa soka a ga nueri la, wa yaa jam maa boro ale Filip ate ku kasim jam a cha wa ate wa nya Naawen ale pa wa nyɛ wakperikaliisa ale wie ŋaai ale a sak ayen Naawen bo ale wa kama la.
[14] Tuimtomdɔma ale jam bo Jerusalem la a yaa wom ayen Samaria demma a tuesi Naawen Wanni kama la, ba yaa tom Piita ale Jɔɔn ayen ba cheŋ ba jigi.
[15] Ba ale jam cheŋ a ga paari la, ba yaa puusi Naawen a te baai ale ta siaka la ayen ba tuesi Naawen Chiika.
[16] Dii nyiŋ la, Naawen Chiika an diem jam siŋ ba waai zuwa. Ba jam tuesi ka soka nyiini Nyɔnɔwa Yeezu yonni nyiŋ.
[17] Piita ale Jɔɔn a yaa pa ba nisimaŋa a vi ba zuk ate Naawen yaa te ba Naawen Chiika.
[18] Simon ale nya ayen tuimtomdɔma a pa ba nisima a vi ba zuk ate ba tuesi Naawen Chiika la, wa yaa pa ligra ayen wa te Piita ale Jɔɔn,
[19] a weeni ba ayen, «Ni te mi me pagrimu de choawa ate mi me a dan pa m nisimaŋa a vi nuru zuk, abe wa me a tuesi Naawen Chiika.»
[20] Alege Piita a yaa tulisi wa ayen, «Fi ale fi ligraŋa meena maa chaab a kpi, boan nyiŋŋa, fi a poli kama ayen fi baga a da Naawen tiirimu ale ka ligra!
[21] Fi niŋ a maa ka ti tuimaŋa po dii nyiŋ la, fi sunummu a ka nyemagsika ale Naawenya.
[22] Dila nyiŋ, ku a fe kama ayen fi tagri fi popola baataŋa de abe fi puusi ate Nyɔnɔwa a voŋ a te fu fi ale poli wanni de choawa la nyiŋ.
[23] Dii nyiŋ la, m nya kama ale fi sunummu a kasim sueri ale ka nyuri ate ku basi ate fi an baga a chala be fi wabaataŋa jigiya.»
[24] Simon a yaa weeni Piita ale Jɔɔn ayen, «Mi a saalim, ni puusi a te Nyɔnɔwa a te mu ate wieŋa de meena ate ni biisi la a kan jam mi jigiya.»
[25] Piita ale Jɔɔn ale biisi soa se ba ale seba Yeezu a soa dii la, ale maa sak ba Naawen wamaŋsaŋa a ga nueri la, ba yaa pilim ŋman cheŋ Jerusalem tɛŋka. Ba ale jam bo siuku po a cheŋ la, ba jam sak Naawen wamaŋsaŋa Samaria tɛŋfiisaŋa yegayega po kama.
[26] Nyɔnɔwa sabiilo a yaa weeni Filip ayen, «Gomsi fi dek a yiri cheŋ a va yeniŋ gala nyiŋ a va siuk kuui ale dua Jerusalem ale Gaza tɛŋka sunsuŋ la.» (Ku ka siuk kuui ale va sagini po a cheŋ la.)
[27] Filip a yaa yiri a cheŋ. Wa ale jam bo siuku po a cheŋ la, wa yaa ga tu Itoopiya tɛŋka kpagi kpien dinyi. Wa me a jam bo ka siuku po a kuli. Wa jam a nya ka Itoopiya tɛŋka nipɔk Naawa ligraŋa zuk. Kpagi kpeeni de jam cheŋ ka Jerusalem tɛŋka ayen wa puusi Naawen a yaa puusi nueri a kuli. Wa jam kala ka jaab po ate wusuma dari ta a cheŋ. Wa ale kala wa jaamu po a cheŋ la, wa jam a karim ka Naawen biisiteerɔwa Azaya ale ŋmarisi dii Naawen gbaŋka po la.
[29] Naawen Chiika a yaa weeni Filip ayen, «Yiri a ga pa fi dek gum chaab ale nuruwa.»
[30] Filip a yiri a chali cheŋ wa jigi a yaa wom ale wa a karim ka Naawen biisiteerɔwa Azaya gbaŋka. Filip a yaa bek wa ayen, «Fi miŋ a chak dii ate fi a karim la?»
[31] Kpagini a yaa tulisi wa ayen, «Mi a le nyɛ ka se a miŋ chak ase nuru a nin kan weeni ku kiri a sak mu?» Wa yaa wi Filip ate wa jueli a maa kali jaamu po ale wa.
[32] Nuruwa ale jam a karim dii la ale nna, «Ase posuk ate ba ta a cheŋ ayen ba ko la, ase pabiik ate ba a gebi ka kobtaŋa a basi alege ka kan kaari la, wa an jam weeni wariya.
[33] Wa jam nya chivie alege ba jam mini wa wensieŋa kama. Nuru karo ale baga a biisi wari a sak wa ŋaaŋbisaŋa, dii nyiŋ la, wa nyuvunni tɛŋzuk de a kpeglim kama.»
[34] Kpagini a yaa bek Filip ayen, «Weeni a sak mu ka wana ate biisiteerɔwa a biisi wa wari nna? Ka wa dek yaa ka nuru yoŋŋɔa?»
[35] Filip a yaa deri pa karimka de a piilim biik a weeni Naawen wamaŋsaŋa a magsi chaab ale Yeezu.
[36] Ba ale jam va chaab a cheŋ siuku po la, ba yaa jam paari jigi ate nyiam a dua ate kpagini a yaa weeni Filip ayen, «Nyiam ale nna. Ka boan ale wa kasi ate fi kan te mu soka?»
[37] Filip a yaa weeni wa ayen, «Fi ale nya soka ase fi nin siak ale fi sunum meena.» Kpagini yaa tulisi wa ayen, «Mm, m siak ya ale m sunum meena ayen Yeezu Kirisita ka Naawen biik.»
[38] Kpagini yaa nyɛ ate jaamu a zaani, ate wa ale Filip a yaa maa chaab a siŋ nyiamu po ate Filip a te wa soka.
[39] Ba ale nyini nyiamu po a jueli la, Naawen Chiika a yaa deri ta Filip a cheŋ ale ge kpagini nyiini. Kpagini an ŋman nya wa, alege a yaa cheŋ wa chelimu ale supeentik.
[40] Filip a yaa deri nya ale wa dek a bo ka tɛŋ kaai ate ba a wi ayen Azotus la. Wa nyini tɛŋ kala a cheŋ Siizariya tɛŋka. Wa ale jam bo siuku po a cheŋ la, wa jam a sak Naawen wamaŋsaŋa ka tɛŋsaŋa meena.