[1] Yɔgyɔgla de mi a yaali ayen m weeni ka ni ale ŋmarisi gbaŋka a weeni ligraŋa ate ni a cheesi la wari. M le weeni Galatia Kirisita bisaŋa ayen ba nyɛ dii la nama me a nyɛ dila degadega.
[2] Laasidi dai meena waai meena a gaari ligra a magsi wa pagrim ale ka dii la a dueni ate m dan jam abe ni kan ŋman weeni ayen ni cheesi ligra.
[3] M be dan jam m le ŋmarisi gbaŋ a te nuru baai ate nama a mariŋ ba a lueri la ate ba ta ni tiirimu a cheŋ Jerusalem tɛŋka.
[4] M be dan ŋman nya ale ku magsi ayen dek cheŋ abe ba va mu a cheŋ.
[5] Mi a poli ayen m va ka Masidoniya. M dan va, dula abe m deri jam ni jigi.
[6] M dan jam ni jigi m le goa a beni maga. M le bo ale ni ŋoota wein meena ate ni baga a maari mu ate m ŋman baga a cheŋ juijui meena ate mi a yaali ayen m cheŋ la.
[7] M kan yaali ayen m nya ni ale ka m nimbie abe mu a taam mu. Mi a yaali kama ayen m goa ale ni a beni maga ase Nyɔnɔ a nin te siuk.
[8] Mi a yaali ayen m bo Efisos tɛŋka a ga paari ka Da Pisinu Tigini.
[9] Naawen a lak ka siuk a te m boro a tom tuima dek dela jigi alege nuruba a kisi mu a kan siagi.
[10] Timoti a dan jam ni jigi ni tuesi wa nalimnyiini ate ku nyɛ wa masim ale wa a tom a te ka Nyɔnɔwa ase mi la.
[11] Ni waai a kan pa wa a chim jaab valiŋa, ni maari wa ate wa jam m jigi nalimnyiini. Mi a limsi wa kama ale m tomteerɔ chaama.
[12] Mi a kasim a te ti suoku Apolos nyiŋbiiri kama ayen wa jam ni jigi alege wa an yaali ayen wa jam yɔgyɔgla de. Wa dan nya siuk wa ale jam.
[13] Ni kpesi a nya abe le chiib a zaani ale siaka abe le chim nuru baai ale tɔa abe le ta siak kaai ale pagra.
[14] Ni a tom ni tuimaŋa meena ale yaalika.
[15] Ni seba Setefanas ale wa dɔkdemma ka baai ale liŋ de niŋ tagri a chim Kirisita bisa Akaaya tɛŋka po. Ba ka baai ale tagri Kirisita bisa zuk a kasim a tom Naawen tuimaŋa. Mi a saalim ni, m suaata.
[16] Ni a zuli nuruma de chaab, ale waai meena ale a tom ale ba la.
[17] Mi sui a peenti ka nna yegayega ale Setefanas ale Fortunatuse ale Akaikus, dii nyiŋ la ba tagri ka nama zuk a cheena
[18] ate ku basi ate m popola a yok. Ni a wom nuruma de noai.
[19] Kirisita bisaŋa meena ale a tu tɔgatɔga a bo Asia meena la a puusi ni. Akiila ale Pirisila ale Kirisita be sii ale a tu ba yenni po la a puusi ni nalimnyiini.
[20] Ni Kirisita be chaama ale bo dela la a puusi ni. Ni meena nyiem a dan yiti ni a puusi chaab.
[21] Mi Pɔɔl, ale a ŋmarisi puusaŋa de ale m dek nisa.
[22] Nuru waai ale ka a yaali Naawen la, kikaasa ale bo kula nyɔnɔwa zuk. Ti Nyɔnɔ, be pilim jam.
[23] Nyɔnɔwa Yeezu Kirisita niaka a bo ale ni meena.
[24] Mi a yaali baai meena ale va Yeezu Kirisita la ka nna yegayega.