[1] སྤུན་ཟླ༌རྣམས། ངའི་སེམས་ཀྱི་འདོད་མོས་དང་དཀོན་མཆོག་ལ་གསོལ་བ་འདེབས་པ་ནི་ཡེས་ར་ཨེལ་གྱི་མི་རིགས་ལ་ཐར་པ་འཐོབ་རྒྱུ་དེ་ཡིན་ནོ།།
[2] མི་དེ་རྣམས་དཀོན་མཆོག་ལ་སྤྲོ་སེམས་ཆེ་ནའང་ཤེས་བྱ་བཞིན་དུ་མ་ཡིན་པ་ནི་བདག་གིས་བདེན་དཔང་བྱེད་དོ།།
[3] རྒྱུ་མཚན་ནི་དཀོན་མཆོག་གི་རྣམ་དག་མ་ཤེས་པར་རང་ཉིད་ཀྱི་རྣམ་དག་གཏན་ལ་འབེབ་འདོད་པས་དཀོན་མཆོག་གི་རྣམ་དག་ལ་མི་བསྟུན་པའི་ཕྱིར༌རོ།།
[4] བཀའ་ཁྲིམས་ཀྱི་མཐར་ཐུག་ནི་སྐྱབས་མགོན་མཱ་ཤི་ཀ་ཡིན༌ཞིང༌། ཁོང་ལ་དད་པ་བྱེད་མཁན་ཐམས་ཅད་རྣམ་དག་ཏུ་བརྩི་བར་འགྱུར་རོ།།
[5] དེ་ལ་མོ་ཤེ་ཡིས་འདི་ལྟར་བྲིས་ཡོད་དེ། སུ་ཞིག་གིས་བཀའ་ཁྲིམས་ལས་བྱུང་བའི་རྣམ་དག་བཞིན་དུ་བྱེད༌ན། མི་དེའང་དེ་ལ་བརྟེན་ནས་སྲོག་འཚོ་བར་ངེས་ཞེས་པའོ།།
[6] འོན༌ཀྱང༌། དད་པ་ལས་བྱུང་བའི་རྣམ་དག་གིས་འདི་སྐད༌དུ་གསུངས་པ་སྟེ། ཁྱོད་ཀྱིས་རང་གི་སེམས་ནང༌དུ། སུ་ཞིག་ནམ་མཁའི་ཞིང་ཁམས་སུ་འཕགས་པར་འགྱུར་རམ་ཞེས་སྨྲ་བར་མི་བྱའོ༎ དེ་ནི་སྐྱབས་མགོན་མཱ་ཤི་ཀ་མར་སྤྱན་དྲངས་ཡོང༌བ་ཡིན་ཞེས་པ་དང་།
[7] ཡང་ན་འདི་སྐད་དུ། སུ་ཞིག་མར་ཞབས་མེད་པའི་དོང་དུ་འགྲོ་བར་འགྱུར་རམ་ཞེས་སྨྲ་བར་མི་བྱའོ༎ དེ་ནི་སྐྱབས་མགོན་མཱ་ཤི་ཀ་གཤིན་པོའི་ཡུལ་ནས་ཡར་སྤྱན་དྲངས་ཡོང་བ་ཡིན་ཞེས་པའོ།།
[8] དོན་དམ་དུ་ཇི་ལྟར་གསུང་ངམ་ཞེ༌ན། བཀའ་དེ་ནི་ཁྱོད་དང་ཉེ༌ཞིང༌། ཁྱོད་ཀྱི་ངག་དང་ཁྱོད་ཀྱི་སེམས་ནང་དུ་བཞུགས་ཞེས་གསུངས་སོ།། དེ་ནི་ངེད་ཅག་གིས་སྒྲོག་པའི་དད་པའི་བཀའ་ཡིན༌ཏེ།
[9] ཁྱོད་ཀྱིས་ངག་ནས་སྐྱབས་མགོན་ཡེ་ཤུ་ནི་གཙོ་བོ་ཡིན་པར་ཁས་ལེན༌ཞིང༌། དཀོན་མཆོག་གིས་ཁོང་ཉིད་གྲོངས་པ་ནས་སླར་གསོན་པར་མཛད་པ་ལ་སེམས་ནས་དད་པ་བྱེད་ན་ཁྱོད་རང་ཐར་བར་འགྱུར་རོ།།
[10] ཅིའི་ཕྱིར་ཞེ་ན། སེམས་ནས་དད་པ་བྱས་ན་རྣམ་དག་ཏུ་བརྩི༌ཞིང༌། ངག་ནས་ཁས་བླངས་ན་ཐར་པ་འཐོབ་ངེས་པའི་ཕྱིར༌རོ།།
[11] དེ་ལ་གསུང་རབ་ཀྱི་མདོ་ལས་ཇི་སྐད༌དུ། ཁོང་ལ་བརྟེན་ཅིང་དད་པ་བྱེད་མཁན༌ཀུན།། ཁ་ནི་མི་སྐྱེངས་ངོ་ཡང་མི་གནོང༌ངོ༌།། ཞེས་གསུངས༌པའོ།།
[12] རྒྱུ་མཚན་ནི་ཡ་ཧུ་དཱའི་མི་རིགས་དང་གྷི་རིག་གི་མི་རིགས་གཉིས་ལ་ཁྱད་པར་མེད༌དེ། མི་ཐམས་ཅད་ལ་གཙོ་བོ་གཅིག་ཁོ་ན་ཡོད༌ཅིང༌། ཁོང་གིས་རང་ཉིད་ལ་ཞུ་བ་འབུལ་མཁན་ཀུན་ལ་དཔག་ཏུ་མེད་པ་གནང་བའི་ཕྱིར་རོ༎
[13] དེ་ནི་ཇི་སྐད་དུ་གཙོ་བོའི་མཚན་ནས་འབོད་མཁན་ཐམས་ཅད་ཐར་བར་འགྱུར་ཞེས་གསུངས་པས་སོ།།
[14] འོ་ན། ཁོང་ལ་དད་པ་མ་བྱས་པ་རྣམས་ཀྱིས་ཁོང་ལ་ཞུ་བ་ཇི་ལྟར༌འབུལ་ལམ། ཁོང་ཉིད་ཐོས་མ་མྱོང་བ་རྣམས་ཀྱིས་ཁོང་ལ་དད་པ་ཇི་ལྟར་བྱེད༌དམ། བཀའ་སྒྲོག་མཁན་མེད་ན་ཇི་ལྟར་ཐོས༌སམ།
[15] མངགས་པ་མིན༌ན། འཕྲིན་བཟང་ཇི་ལྟར་སྒྲོག༌གམ། དེ་ལ་གསུང་རབ་ཀྱི་མདོ་ལས་ཇི་སྐད༌དུ། དོན་ལེགས་པོའི་འཕྲིན་བཟང་སྒྲོག་མཁན་གྱི་རྐང་པ་ནི་ཇི་འདྲའི་མཛེས་ཤིང་སྡུག་པ་ལ་ཨང་ཞེས་བཀོད་པ་ལྟར༌རོ།།
[16] འོན༌ཀྱང༌། ཡེ་ཤ་ཡཱ་ཡིས་འདི་སྐད༌དུ། གཙོ་བོ་ལགས་ཀྱིས༌འདི་ལ་གསན་རོགས་གནང་།། ངེད་ཚོས་བསྒྲགས་པའི་གཏམ་ལ་སུ་ཡིས་དད།། ཞེས་གསུངས་པས། མི་དེ་རྣམས་ལས་ཐམས་ཅད་ཀྱིས་འཕྲིན་བཟང་ལ་ཉན༌པ་མ་ཡིན།
[17] དེའི༌ཕྱིར། དད་པ་ནི་ཐོས་པ་ལས་འབྱུང་ཞིང༌། ཐོས་པ་དེ་ནི་སྐྱབས་མགོན་མཱ་ཤི་ཀའི་བཀའ་ལས་འབྱུང༌བ་ཡིན་ནོ།།
[18] འོན༌ཀྱང༌། བདག་གིས་འདི་ལྟར་སྨྲ་བར་བྱ༌སྟེ། མི་དེ་རྣམས་ཀྱིས་འཕྲིན་བཟང་མ་ཐོས་སམ་ཞེ༌ན། ཁོ་རྣམས་ཀྱིས་ཐོས་མྱོང་བར་གདོན་མི་ཟ༌སྟེ། ཁོ་ཚོའི་སྐད་གདངས་གནམ་འོག་ཀུན་ཏུ༌ཁྱབ།། ཁོ་ཚོའི་སྨྲ་བརྗོད་ས་མཐའི་བར་དུ༌སླེབས།། ཞེས་གསུངས་པ་བཞིན༌ནོ།།
[19] ཡང་བདག་གིས་འདི་ལྟར་སྨྲ་བར་བྱ༌སྟེ། ཡེས་ར་ཨེལ་གྱི་མི་རིགས་ཀྱིས་དོན་དེ་མི་ཤེས་སམ་ཞེ༌ན། དེ་ལ་སྔར་ནས་མོ་ཤེ་ཡིས་འདི་སྐད༌དུ། བདག་གིས་མི་རྒྱུད་མིན་པའི་སྐྱེ་བོ༌རྣམས།། བཀོལ་ནས་ཁྱོད་ཚོར་ཕྲག་དོག༌སློང་བར་བྱ།། བདག་གིས་གོ་བ་མེད་པའི་སྐྱེ་བོ༌རྣམས།། བཀོལ་ནས་ཁྱོད་ཚོར་ཞེ་སྡང༌སློང་བར་བྱ།། ཞེས་གསུངས་པ་བཞིན༌ནོ།།
[20] ཡང་ཡེ་ཤ་ཡཱ་ཡིས་སྤོབས་པ་ཆེན་པོས་འདི་སྐད༌དུ། ང་རང་མི་འཚོལ་མཁན་གྱིས་བདག་ནི་རྙེད།། ང་ལ་མི་ཞུ་མཁན་ལ་བདག་ནི༌མངོན།། ཞེས་གསུངས༌པའོ།།
[21] འོན༌ཀྱང༌། ཁོང་གིས་ཡེས་ར་ཨེལ་གྱི་མི་རིགས་ཀྱི་སྐོར་ལ་འདི་སྐད༌དུ། བཀའ་དང་འགལ་བའི་གྱེན་ལྡོག༌དང༌།། ཚིག་རྩོད་བྱེད་པའི་མི་རྒྱུད་ལ།། བདག་གིས་ཉིན་རྒྱུན་ལག་གཡུག་བྱེད།། ཞེས་གསུངས༌པའོ།།