[1] بو حَبَقوق پیغمبره رؤیا ائله نازئل اولان ائخطاردیر.
[2] یارب، نه واختا قدر سنی ائمدادا چاغیرام، و سن اشئتمیه‌سن؟ سنه «قدّارلیق وار!» دیئب فریاد اِدَم، و سن قورتارمایاسان؟
[3] نئیه منه عدالتسئزلئیی گؤرسدئرسن، نه اوچون منی حاقسیزلیغا باخماغا چکئرسن؟ هارایا نظر سالسام، اورادا هلاکت و قدّارلیق وار، داعوالارین، چکئشمه‌لرئن آخیری یوخدور.
[4] بونا گؤره قایدا-قانون قووّه‌دن دوشوب، عدالت هچ واخت قاباغا گتمئر. پئس آداملار صالحلری دؤوره‌یه آلیرلار، اِله کی، عدالت تحرئف اولونسون.
[5] او بئری مئلّتلره باخین، گؤردوکلرئنئزه کامئل مات قالین. چونکی سئزئن گونلرئنئزده اِله ائشلر گؤره‌جیم کی، سئزه دانیشسایدیلار دا، ائنانمازدینیز.
[6] چونکی باخ، من قدّار و آمانسیز مئلّتی - دونیانین دؤرد طرفئنه قوشون چکن، باشقالارینین تورپاقلارینی ضبط ادن کَلدانئلری سئزئن ضئدّئنئزه قالدیریرام.
[7] اونلار دهشتلی و قورخولو بئر خالقدیرلار، کئبئرلی و اؤزباشینادیرلار.
[8] آتلاری پلنگدن چابوک، اؤزلری ده گجه گَزَن قورددان داها آزغیندیرلار، آتلی‌لاری یری دِشه‌رَک اوزاقدان گلئرلر، شئکارینی یِمیه جومان قارتال کئمی اوچورلار.
[9] قدّارلیق اوچون اونلارین هامیسی گلئر، قوشونلاری صحرادان اَسن یِل کئمی قاباغا گدئر، اسئرلری قوم کئمی ییغیر.
[10] پادشاهلارا رئشخند ادئرلر، حؤکمدارلارا گولورلر، هر قالالی شهره لاغ ادئرلر، دووارلارین قاباغیندا تورپاقدان تپه قوروب اونو اَله کچئرئرلر.
[11] اونلار یِل کئمی کچئب-گدئرلر. بو آداملار کی، اونلارین آللاهی گوجلری‌دئر، تقصئرکاردیرلار.
[12] یارب، ازلدن بَری وار اولان مگر سن دیئلسن؟ یارب، تاریم، موقدّس اولانیم، بئز اؤلمه‌یه‌جَیئک. یارب، سن کَلدانی‌لره ائجازه ورئبسن کی، حؤکمو یرئنه یتئرسئنلر. ای قایامیز، اونلاری تعیئن ادئبسن کی، جزالاندیرسینلار.
[13] سنئن گؤزلرئن طاهئردئر، شری گؤرَن گؤزون یوخدور، پئس عمل‌لره گؤز دئکه بئلمزسن. بس خیانتکارلارا نجه باخا بئلرسن؟ پئس آدام اوندان داها صالح اولانین باشینی یئیَنده آخی نئیه ساکئت قالیرسان؟
[14] سن ائنسانلاری سانکی دهنز بالیقلارینا، باشچیلاری اولمایان سورونن جانلی‌لارا چِوئرئبسن.
[15] دوشمن اونلارین هامیسینی چَنگل‌له چکئر، تورونا سالیر، سَردئیی تورونا سالیر، بونا سِوئنئب-شادلانیر.
[16] بونا گؤره تورلاری اوچون قوربان کَسئر، تورلاری اوچون بوخور یاندیریر، چونکی بو تورلاری ائله، بوللوق ائچئنده یاشاییر و لذّتلی یمکلردن بهره آلیر.
[17] اونلار مگر تورلارینی دورمادان بوشالتماغا، مئلّتلری آمانسیزجاسینا قیرماغا داوام وره‌جکلر؟