[1] رب بله دیئر: ”موآبلی‌لاری جزاسیز بوراخمایاجاغام، چونکی گوناه اوستونه گوناه اتدئلر، اِدوم پادشاهینین سوموکلرئنی یاندیریب اوندان اَهَنگ حاضیرلادیلار.
[2] بونا گؤره ده موآبا اود یاغدیراجاغام کی، قِرئیّوتون قالالارینی یاندیریب-یاخسین. موآب قیشقیرتی و کَره‌نای سَسی آلتیندا، سَس-کویله محو اولاجاق.
[3] اونلارین آراسیندان داورلری کَسئب آتاجاغام، بوتون باشچیلارینی دا اؤلدوره‌جیم.“ رب بله دیئر.
[4] رب بله دیئر: ”یهودالی‌لاری جزاسیز بوراخمایاجاغام، چونکی گوناه اوستونه گوناه اتدئلر، اونلار ربّئن قانونونو ردّ ادئب، قایدالارینی رئعایت اتمه‌دئلر، آتالارینین پِیرو اولدوقلاری ساختا بوتلر، اونلاری دا یوللاریندان آزدیردی.
[5] بونا گؤره ده یهودایا اود یاغدیراجاغام کی، اورشلئمئن قالالارینی یاندیریب-یاخسین.“
[6] رب بله دیئر: ”ائسرایئللی‌لری جزاسیز بوراخمایاجاغام، چونکی گوناه اوستونه گوناه اتدئلر، صالح آداملاری گوموشه، مؤحتاجلاری دا بئر جوت چاریغا ساتیرلار،
[7] یوخسول‌لارین باشینی توز-تورپاغین ائچئنده اَزئرلر، مظلوملارین حاقّینی تَرسه اِدئرلر. آتا و اوغول هَمَن قیزلا یاتیب، موقدّس آدیمی لَکه‌له‌یئرلر.
[8] هر قوربانگاهین یانیندا، گئروو گؤتوردوکلری پالتارین اوستونده یاتیرلار، اؤزلرئنئن تاریسینین معبدئنده جرئمه اوچون گتئرئلَن شرابی ائچئرلر.
[9] لاکئن من ائدئم کی، سئدر آغاجی کئمی اوجا اولان، پالید آغاجی کئمی مؤحکم اولان اِمورلولاری اونلارین قاباقلاریندا ییخدیم، حتّا اونلارین میوه‌سئنی یوخاریدان و کؤکونو آشاغیدان کَسدئم.
[10] من ائدئم کی، سئزی مئصئر تورپاغیندان چیخاردیب قیرخ ائل صحرادا گَزدئردئم، اِله کی، سئز اِمورلولارین تورپاغینا صاحئب اولاسینیز.
[11] اوغوللارینیزدان پیغمبرلر، جاوان اوغلانلارینیزدان نذئره‌لر تعیئن اتدئم. ای ائسرایئللی‌لر، بو مگر بله دیئل؟“ رب بویورور.
[12] ”آمّا سئز نذئره‌لره شراب ائچدئردئنئز، پیغمبرلره نبئلئک اتمه! امری وردئنئز.
[13] باخ، تاخیل یوکلو عارابا تورپاغی نجه اَزئر، من ده سئزی اِله اَزه‌جیم.
[14] بَرک قاچان، قاچیب قورتولا بئلمیه‌جک، قووّتلی ده گوجونو گؤرسده بئلمیه‌جک، ائگئد جا‌نینی قورتارا بئلمیه‌جک.
[15] یای چَکَن یِرئنده دورا بئلمیه‌جک. آیاقدان چابوک اولان قورتولا بئلمیه‌جک، آتلی دا جا‌نینی قورتارا بئلمیه‌جک.
[16] حتّا لاپ ائگئد دؤیوشچو بِله، او گون لوت قاچاجاق.“ رب بله بویورور.