[1] پولوس، سئلوانوس و تئموتاعوسدان، آتامیز تاری و ربّئمئز عئسا مسئحده اولان تسالونئکلئلرئن کئلئساسینا:
[2] آتا تاری و رب عئسا مسئحدن سئزه فیض و باریش اولسون.
[3] قارداشلار، بئز گرک سئزئن اوچون لایئق اولان بئر شکئلده دائم تارییا شوکور ادک، چونکی ائمانینیز داها چوخ آرتیر و بئربئرئنئزه اولان محبّتئنئز داها دا چوخ بؤیویور.
[4] بو سببدن بئز اؤزوموز، دوشدویونوز بوتون عذابلار و ذئلّتلرئنئزئن قاباغینداکی تحمّول و ائمانینیزدان اؤتری تارینین کئلئسالاری آراسیندا فخرله دانیشیریق.
[5] بو، تارینین صالح حؤکمونون علامتی‌دئر. اله کی، سئز تارینین پادشاهلیغینا لایئق ساییلاسینیز کی، اونون اوچون ده عذاب چکئرسئنئز.
[6] چونکی تارینین یانیندا البتّه عدالت بودور کی، سئزه ذئلّت چکدئرنلره، ذئلّت چکدئرسئن
[7] و ذئلّت چکن سئزلره، بئزئمله بئرلئکده راحاتلیق یتئرسئن، او زامان کی، رب عئسا بوتون قودرتلی ملکلری ائله اود آلووو ائچئنده گؤیدن ظاهئر اولاجاق
[8] و تارینی تانیمایان و ربّئمئز عئسانین ائنجئلئندن ائطاعت اتمه‌ینلره جزا وره‌جک.
[9] اونلار ربّئن حوضوروندان و اونون قودرتئنئن شؤوکتئندن محروم قالیب، ابدی هلاکتله جزالاناجاقلار.
[10] بو او گونده باش وره‌جکدئر، او گون کی، مسئح اوز موقدّسلرئنده عئزّت قازانماق و بوتون ائمانلی‌لاری حیرته گتئرمک اوچون گلئر-چونکی سئزه وردئیئمئز شهادته ائناندینیز.
[11] بونا گؤره بئز دائم سئزئن اوچون دوعا ادئرئک کی، تاریمیز، سئزی اولوندوغونوز دعوته لایئق سایسین و قودرتله یاخشیلیق اوچون هر جور ائشتئیاق و ائمانین ائشئنی یرئنه یتئرسئن.
[12] اِله کی، تاریمیز و ربّئمئز عئسا مسئحئن فیضئنه گؤره، ربّئمئز عئسانین آدی سئزده عئزّتلنسئن و سئز ده اوندا عئزّتلنه‌سئنئز.