[1] پولوس، سئلوانوس و تئموتاعوسدان، آتا تاریدا و رب عئسا مسئحده اولان تسالونئکلئلرئن کئلئساسینا: سئزه فیض و باریش اولسون.
[2] بئز همئشه سئزئن هامینیز اوچون تارییا شوکور ادئب دوعالاریمیزدا سئزی ذئکر ادئرئک
[3] و دائم آتامیز تاری حوضوروندا ائمانینیزین ائشئنی، محبّتئنئزئن زحمتئنی، و ربّئمئز عئسا مسئحده اولان اومئدئنئزئن مؤحکملئیئنی خاطیرلاییریق.
[4] ای تارینین سودئیی قارداشلار، سئزئن سچئلمئش اولدوغونوزو بئلئرئک.
[5] چونکی بئزئم خوش خبرئمئز سئزه آنجاق سؤزده یوخ، قودرت و موقدّس روحدا و چوخ یقئنله گلدی، نجه کی، آرانیزدا سئزئن خاطئرئنئز اوچون نجه آداملار اولدوغوموزو دا ائثبات اتدئک.
[6] سئز ده بئزدن و ربدن نومونه گؤتوروب، بؤیوک سیخینتی ائچئنده کلامی موقدّس روحون شادلیغی ائله قبول اتدئنئز.
[7] اِله کی، مقدونئیّه و اخایئه‌‌ده اولان بوتون ائمانلی‌لار اوچون نومونه اولدونوز.
[8] چونکی ربّئن کلامی سئزدن آنجاق مقدونئیّه و اخایئه‌یه یاییلمادی، هر یره ده کی، سئزئن تارییا اولان ائمانینیزین شؤهرتی چاتیب. بونا گؤره ده بئر شی دمه‌یئمئزه احتئیاج یوخدور.
[9] چونکی اونلار اؤزلری خبر ورئرلر کی، سئز بئزی نجه قبول اتدئنئز و نه جور بوتلرئنئزدن تارییا دؤندونوز کی، یاشایان و حقئقی تارییا خئدمت اده‌سئنئز
[10] و اونون اؤلولردن دئرئلتدئیی اوغلونون گؤیدن گله‌جیئنی، یعنی عئسانی گؤزله‌یه‌سئنئز کی، بئزی گله‌جک قضبدن قورتاریر.