[1] Mä urux Noemí mamax Rut yuxch'aparux sänwa: —Wawaxay, kusisit jakasiñamatakix mä chacha thaqhañaxaw wakisi.
[2] Ist'am, Booz wila masisax cebada khuysuriw yapupar jichha arumax sarani, kawkhantix jumax cebada puyanak uywatanakapamp apthapkäyätas uka chiqaru.
[3] Jichhasti akham luram: Jariqt'asim, suma q'apkir qullanakamp jawirt'asim, sumïr isimamp isthapt'asirakim, ukatsti, kawkhantix Booz chachax cebada khuysuski uka chiqar saram. Ukampis Booz chachampix janiw uñt'ayasïtati janïr manq'aña, umaña tukuykipanxa.
[4] Ukatsti, kawkharutix ikintkani uk sum uñch'ukïta. Ikjatäxani ukapachasti, jupan jak'aparuw ikkatäta. Ukhamat jupax yatini, jupamp arxatayasiñ mayitamxa, ukatsti jupaw kunatix lurañamax wakiskani uk saskätam —sasa.
[5] Rut warmisti taykch'iparux sänwa: —Taqi kunanaktix iwxawaykista ukanak luräwa —sasa.
[6] Ukatsti, Rut warmix pamparuw saräna; taqi kuntix taykch'ipax iwxawaykäna uk ukhampun luräna.
[7] Booz chachax manq'aña, umt'añ tukt'ayxasinxa, wali kusisitaw cebada phina jak'ar ikt'ir sarxäna. Ikjataxäna ukkhasti, Rut warmix k'achat jak'achasisin jak'aparuw ikkatäna.
[8] Chika arumjarusti Booz chachax akatjamat ikit p'arxtäna, kutikipstasinsti jupa jak'an mä warmir ikt'at amuyasax mulljasïnwa.
[9] —¿Khitïtas jumaxa? sasaw Booz chachax jiskt'äna. Rut warmisti sarakïnwa: —Tata, nayax Rut uywatamätwa, jumax nayan wila masixätawa, nayar arxatañamax wakt'tamwa. Jichhasti nayampi jaqichasiñam mayiñ munsma —sasa.
[10] Booz chachasti sänwa: —¡Tatitux waxt'äwip jumar churpan! Jiwir chachamatakix chiqa chuymanïtam uñacht'ayista. Chacht'asiñ munasax qamirïpasa, jan utjirinïpas nayat juk'amp wayna jaqi thaqhasisamäna; ukampis janiw ukham lurktati.
[11] Wawaxay, jan axsaramti, juman aski sarnaqirïtam markaxan taqiniw yatipxi. Taqi kuntix maykista ukanaksa luräwa.
[12] Chiqpachansa, jak'a wila masimätwa, ukampis juman yaqha nayat sipan juk'ampi jak'a wila masimax utjaskiwa.
[13] Ukhamasti, jichha arumax akar qhiparam. Arumanthiw uka wila masimax jumar arxatañ munchispa jan munchispa uk yatiñäni; janitix phuqhañ munkanixa, Tatit nayraqatan arsta, nayaw jumar arxatäma. Jichhasti qhanjtaniñapkam ikt'xam —sasa.
[14] Rut warmisti Booz chachan jak'aparuw uka arumax ikt'äna. Qhipärmanthisti janïr sum qhanjtankipan sartäna, Booz chachan jupar “janiw khitis yatiñapäkiti juman aka pampar jutatamxa” satapata.
[15] Ukatsti Booz chachax juparux sänwa: —Phullum awaysusim, ukatsti sum katt'am —sasa. Rut warmisti phullup katt'äna, Booz chachax ukaruw pusi tunka jila kilonaka cebada warxatäna, ukatsti q'ipxaruyañ yanapt'arakïna. Rut warmisti cebada q'ipt'ataw markar kutt'xäna.
[16] Rut warmix utapar purxäna ukkhaxa, taykch'ipasti jiskt'änwa: —Wawaxay, Booz chachax ¿kamstamsa? —sasa. Rut warmisti taqi kunanaktix Booz chachax jupar yanapt'añatak lurkatayna ukanak taykch'iparux yatiyäna,
[17] ukxarusti saskakïnwa: —Taqi aka cebada churaniwayitu, “janiw taykch'iman ukarux jan kunan kutt'añamäkiti” situwa —sasa.
[18] Ukatsti Noemí mamax sänwa: —Jichhasti suyt'akim wawa, kunjamakïkani uk uñjañäni. Booz chachax uk askichañkamax janiw samarkanisa —sasa.