[1] Ukatsti tupt'añ lawa churapxitu, suqusar uñtata, ukat sapxarakitu: “Sartasim, Tatitun utap tupt'anim, altar tupt'arakim, ukatsti qawqhanitix ukan yupaychapki taqi jupanakar jakt'anim.
[2] Ukampis uta anqäxäkis ukxa janiw tupt'kätati, ukasti jan judiöpkis uka jaqinakar katuyatäxiwa, uka jaqinakasti pusi tunka payan phaxsiw Jerusalén qullan marka apnaqapxani.
[3] Nayasti pani profetanakaruw khithanï nayan chiqpach yatiyäwix parlapxañapataki. Jupanakarusti chhankha isinakampi isthapit khithanï, profecía arunak uka waranqa pä pataka suxta tunkani urun yatiyapxañapataki” sasa.
[4] Uka pani profetasti, Tatitun nayraqatapankapki uka pä olivo quqampi, pä candelerompiwa.
[5] Khititix uka paninir kuna jan walsa lurañ munanixa, jupanakax lakapat nina axsupxi, uka ninasti uñisirinakaparux q'al nakhanti; ukham nakhantataw jiwani, khititix kuna jan walsa jupanakar lurkani ukanakaxa.
[6] Jupanakax alaxpach jist'antañatakisa munañanïpxiwa, Diosat katuqat arunak parlapkani uka urunakan jallun jan puriñapatakisa, umanakan wilar tukuñapataki, akapach jaqinakar kunayman mutuñanakampi munataparjam qawqha kuti t'aqhisiyañatakis munañanïpxarakiwa.
[7] Kunapachatix lurañap phuqhapxani ukkhaxa, aka uraqi manqhat mistuniri axsarkañ jach'a animalaw jupanakar nuwantasin atipjani, ukat jiwayarakiniwa.
[8] Amayanakapasti, kawkintix Tatitux ch'akkatatäkän uka jach'a markan thakhinakapan jaqtatäskaniwa. Uka markasti mä arunxa Sodoma, ukhamarak Egipto satarakiwa.
[9] Kimsa uru chikataniw kunayman markankir jaqinaka, kunayman jaqinaka, kunayman parlani jaqinaka, taqi markanakata uka jiwat janchinak uñjapxani, janiw khitisa p'amp'antasiñap munkaniti.
[10] Aka uraqin jakirinakasti wal kusisipxani jupanakan jiwarapxatapata. Kusisiñatsa jupanakkamaw churäwinaksa waxt'asipxani, uka pani profetanakan jaqinakar wali t'aqhisiyirïtap layku.
[11] Uka kimsa uru chikatan qhipatsti, Diosax uka pani profetarux jakatatayxänwa, jupanakax wasitat sayt'asxapxäna; jaqinakasti jupanak uñjasax wal axsarapxäna.
[12] Ukapachasti uka pani profetanakax alaxpachat mä aru ist'apxäna, jupanakar jach'at art'aniri, uka arusti sarakïnwa: “¡Akar makhatanipxam!” sasa. Jupanakasti mä qinayanjam alaxpachar makhatapxäna, taqpach uñisirinakapan uñjkata.
[13] Ukapachaw mä jach'a uraq khathatix sartäna, uka uraq khathatisti markan mä qawqha chiqanakap t'unthapïna, paqallqu waranqa jaqinakarakiw uka uraqi khathatimpix jiwaräna. Qhiparirinakasti, axsarañatsa alaxpachankir Diosaruw yupaychapxäna.
[14] Payïr t'aqhisiñax ukänwa, kimsïrïk ukasti jank'akiw jutaski.
[15] Paqallqür angelasti trompetap phust'äna, ukatsti alaxpachan jach'at art'asir arunakaw ist'asïna: “Akapach markanakax Tatit Cristosaruw jaqkattxapxi, jichhax jupaw wiñayan wiñayapatak marka apnaqani” sasa.
[16] Ukatsti uka pä tunka pusin jilïrinakax, khitinakatix qunuñanakapan Dios nayräxan qunt'atäsipkän ukanakax, ajanunakap uraqkam alt'asaw killt'asis, Diosar yupaychapxäna,
[17] akham sasa: “Taqi ch'aman Dios Tatay, yuspagarapxsmawa, jumax jakasktawa, utjaskapunïyätawa, utjaskaktawa, jichhas utjaskakipunïtawa. Jichhax jach'a ch'amam katxartaxa, aka uraqi apnaqañ qalltaraktaxa.
[18] Jumar jan iyawsir markanakax q'apisitäpxiwa; ukampis q'apisiñam urux puriniwa, jiwatanakar taripkäta uka uruxa. Jumar luqtir profetanakarusti mä waxt'äwi churäta, qullan markamarusa, sutim waqaychirinakarus waxt'äwi churarakïta, jisk'arusa, jach'arusa; aka uraqi t'unjirinakarusti, jumax t'unjarakïtawa” sasa.
[19] Ukatsti Tatitun utapan punkunakapaw alaxpachan jist'artäna, uka utap manqhansti arust'äwipa arcaw uñstäna. Ukatsti lliju llijunakampi, qhixu qhixunakampiw utjäna, wali uxuñanaka, uraq khathatinaka, wali ch'aman chhijchhimpiw utjarakïna.