[1] Tatitux aka arunak Petuel chachan Joel yuqaparux säna:
[2] Jilïr jaqinaka, aka arunak sum ist'apxam, taqi jumanaka, aka markan utjir jaqinaka. ¿Kuntix jichhax uñjapkta ukanak jumanakax uñjapxirïtati? ¿Janit taqi akanakax awkinakaman urunakapan uñjasirïkänxa?
[3] Jichhax wawanakamar akanak yatiyapxam, wawanakamas wawanakapar yatiyapxpan, jupanakasti wawanakapar yatiyapxarakpan.
[4] T'iju t'ijunakax q'al manq'suwayapxi, kuntix mayninakax jilt'ayapkän uksa yaqhanakaw jutasin q'al manq'suwayapxi.
[5] ¡Umatanaka sartapxam! ¡Vino umirinaka, jachapxam, jichhax janiw jumanakatak vinox utjkxaniti!
[6] T'iju t'ijunakasti ch'aman ejercitor uñtata, ari lakan leonanakjamaw markaxar t'unjañatakix muyunti.
[7] Uva yapunaksti q'al tukjawayapxi, higo yapunaksa q'al tukjawayapxi; q'ara lawa tukuyañkamaw q'al sillp'suwayapxi.
[8] Kunjämatix mä jaqichasir tawaqux parlatapan jiwatapat lutt'asisin jachkixa,
[9] ukhamaw sacerdotenakax jachapxi, Diosan utapanxa janiw vinos, trigos Tatitur luqtañatakix utjkxiti.
[10] Yapunakax llakkañ tukjatawa, uraqix lutt'atäkaspas ukhamawa. Trigos pist'awayxiwa, uva yapunakas q'al pharsuwayxi, olivo quqanakasti q'ala wañsutawa.
[11] Jumanakasti yapuchirinaka, uva yapu uñjirinaka, jichhax llakisiñat jachapxam, yapunakaman tukusitapata, trigosa, cebadasa jan achxatapata.
[12] Uva yapunakas wañsuwayxiwa higo yapunakas tukusiwayxiwa. Granado quqanakasa, palmeranakasa, manzanonakasa, taqpach quqanakas q'alaw wañsuwayxi. ¡Jaqinakan kusisiñapas chhaqtawayxarakiwa!
[13] Sacerdotenaka, Tatitun altarapan irnaqirinaka, chhankha isinakampi isthapisipxam, llakisiñat jachapxarakim, Tatitun utapanxa trigosa, vinosa waxt'äwi churañatakix janiw utjkxiti.
[14] Markarusti tantacht'apxam, ayuno lurapxam; jilïr jaqinakaru, aka markan jakir taqi jaqinakarusa, Tatit Diosapan utapar tantachapxam, Tatitut mayisipxarakim.
[15] ¡Ay kunakïkani, Tatitun urupaw jak'achasisinki! ¡Axsarkañ uruw jutaski, taqi ch'aman Tatitusti t'unjañanak apaniraki!
[16] Jiwasan uñjkataw manq'añsa apaqapxistu, Tatitun utapansti kusisiñax tukusxiwa.
[17] Trigo jathasti pachpa sukan jiwsuwayi, ukat pirwanakasax ch'usak jikxatasxi.
[18] ¡Uywanakasti wal wararipxi! Vacanakas inamayakiw chhuxllanak thaqhasipki; oveja tamanakas tampacharakiw jiwaraski.
[19] ¡Dios Tatay, jumaruw art'asinsma, wasarankir quqanaksa, pampankir chhuxllanaksa ninaw q'al nakhantawayxi!
[20] ¡Pampankir animalanakas jumaruw art'asinipxtam, jawir umanakan wañsxatap layku, chhuxllanakas ninan q'al naksxatap layku!