[1] Jichhax wali p'arxtataw uñch'ukï, kunjämatix pirqa patat uñch'ukirix uñch'ukki ukhama, Dios Tatitux kamsitanis nayan arsusitaxarux uk yatiñataki.
[2] Dios Tatitux sarakituwa: “Kuntix uñacht'aykäma ukxa, mä ñiq'it lurat pallallxar qillqam, ukhamat ullart'añax jasakïni.
[3] Aka uñjäwin phuqhasiñapaxa mä juk'a qhiparaniwa; ukampis phuqhasipuniniwa. Amuyatax janisay jank'äkpan, suyaskakim, purisinkaniwa.
[4] Kunatix qillqañamäki ukax akawa: ‘Ñanqha jaqinakax jach'a jach'aw tukupxi, ukampis aski jaqinakax Tatitur chiq arkatapampiw jakapxani’ sasa.”
[5] Jach'a jach'a tukur jaqinakax ch'amanïñ munapxi; jan samart'asaw thaqapxi, ch'amanïñax jan walirus puriykchi ukasa, juk'amp munasipkakiwa. Amay imantañatak allsutaxa ukham lakap jist'arapxi, jiwar uñtataw jan sist'asipkiti, ukat markat marka katuntañatak sarapxi.
[6] Ukampisa taqi katuntata markanakaxa katuntirinakat larusipxaniwa, akham sasaw jayllipxarakini: —¡Ay kunakïkan juma Babiloniatxa, kunatix jan jumankki ukanakampiw qamiriptasktaxa! ¿Kunapachkamas jan jumankki uka qamir yänakampi phuqhantasis sarnaqäta?
[7] Jan suykäta ukkhaw juman t'aqhisiyirinakamax purintanipxani, axsarañatsa wal khathatiyapxätam, kunanakamatix utjki ukanaksa q'al aparapxarakïtam.
[8] Markanakax jumar saykatañatakiw mayacht'asipxani, kunjämtix jupanakat aparkta ukhamarak aparapxätam. Jaqinakapar jiwarayatamata, uka markanakan jakirinakar jan walinak luras t'aqhisiyatamatsa phuqhayasipxarakïtamwa.
[9] ¡Ay kunakïkan juma Babiloniatxa, lunthatat yänakampiw utamar phuqhantayastaxa, ukhamat jan walt'añanakan taqi kunas walikïskañap amuyaraktaxa!
[10] Ukhamat utamxa mä p'inqa tukuytaxa, walja markanakar tukjatamatxa juma kipka tukjatäñaruw purtaxa.
[11] Uka uyun qalanakapasa, q'iru lawanakapasa, juma tuqiw arsupxani.
[12] ¡Ay kunakïkan juma Babiloniatxa, markanakamxa jiwayañanakxaru, jan chiqa uñjañanakxaruw sayt'ayaraktaxa!
[13] Taqi ch'amani Tatitusti, luratanakamxa, jan inakt'atanakamsa inamayaruw tukuyani, taqi luratanakamas ninampi tukjatäniwa.
[14] Dios Tatitun jach'a luräwinakapat yatiñaw taqi akapachar phuqt'arakini, kunjämatix umanakax qutar phuqhantki ukhama.
[15] ¡Ay kunakïkan juma Babiloniatxa, jaqi masinakamaru machjayañataki vinoru jan wali qullanakampi uchas churatamata, ukhamat q'alalakïtap uñjasin jisk'achjañataki!
[16] Jach'añchatäña lantxa, p'inqachjataw uñjasïta, Dios Tatituw mä tilinkit umt'añamatak churätam, ukaw juman q'alalakïtam uñacht'ayätam, jach'a kankañamsa jisk'arurakiw tukuyani.
[17] Kuna jan walinaktix Líbano qulluru lurktaxa ukanakasti jumar saykatiriw kutt'anini, animalanakap jiwaraykta ukas jumanakatakix jach'a sustjasiñäniwa. Taqi akanakasti jaqi jiwarayatanakamata, markpachana, taqi jaqinakapar t'aqhisiyatanakamat jutani.
[18] ¿Kunatakis askix mä diosaxa sum lurt'asin tukuyatäkchi ukaxa? ¿Kunatakis askix jaqin lurt'at mä diosaxa yatichäwinakapas k'arikamakïchi ukaxa? uka yaqha diosanakax janiw parlapkiti; ¿kunjämaraki uka yaqha diosanak lurir jaqisti uka diosanakar atint'asispasti?
[19] ¡Ay kunakïkan juma Babiloniatxa, mä lawat lurat diosar p'arxtam satamaxa, mä amutu qalar sayt'am satamasa! ¿Jupanakasti mä kuna yatiyäwinaksa yatiyapxaspati? Janiwa. Jupanakax janiw jakañanïpkiti, qawqhasay qurimpis qullqimpis jawikipatäsipkpan.
[20] Ukampis Dios Tatitux qullan utapankaskiwa: “¡Jupa nayraqatan taqi akapachan jakir jaqinakax amukt'apxpan!”