[1] Uywirinaka, uywatanakamar chiqapar uñjapxam. Amtasipxam, jumanakax alaxpachan uywirinïpxaraktawa.
[2] Tatitut mayisipxapunim, yuspagarapxarakim.
[3] Nanakatakis Diosat mayipxarakim, Tatitun punkunak jist'arañapataki, ukat arunakap parlañataki, Criston imantat amtäwip qhanañchañataki, uka laykuw jichhas nayax katuntatäskta.
[4] Diosat mayipxam nayan uka arunakap sum qhanañchañaxataki.
[5] Tatitur jan iyawsirinakampisti, suma amuyt'ampi sarnaqapxam, sapa kuti ukham lurañ utjkipansa, askinak lurapxam.
[6] Parlatanakamasti sumäñapapuniwa, sapa maynir kunjäm arusxatañsa yatipxañamarakiwa.
[7] Jiwasan Tíquico munat jilatasaw nayxat yatiyapxätam, jupasti nayan aski yanapirixawa, nayamp chika Tatitur luqtirirakiwa.
[8] Ukat jumanakan ukar khithanta, kunjämäpktix nanakax uk jumanakar yatiyiri, ukhamarak jumanakar ch'amañchiri.
[9] Jupamp chikasti, munat Onésimo jilataw jutaraki, jupasti jumanakat maynïriwa. Jupanakaw taqi kunatix akan luraski ukanak yatiyapxätam.
[10] Nayamp chika katuntatäki uka Aristarco jilataw aruntanipxtam, ukhamarakiw Bernabé jilatan Marcos primo jilapas aruntanipxtam. Jumanakax Marcosat niy yatxapxtawa; jupatix jumanakar tumpiri purininixa, sum katuqt'apxam.
[11] Justo, sutini, Jesús jilataw aruntanipxtam. Judeankir iyawsirinak taypitxa, jupanakakiw Diosan qhapaq markapat yatiyañan nayar yanapas irnaqasipki, nayarusti jupanakax walpun ch'amañchapxitu.
[12] Epafras jilata, khititix Criston luqtiripäki, jumanakat maynïrïkaraki, jupas aruntanipxtamwa. Jupasti jumanakatakix walipuniw Diosat mayiski, Diosan munañap phuqhirinakjam thuruñchat sayt'asipxañamataki.
[13] Naya pachpaw uñjta kunjämtix Epafras jilatax jumanakat llakiski uka, ukhamarak khitinakatix Laodicea, Hierápolis markanakankapki ukanakatsa.
[14] Munat Lucas qullirin aruntap katuqasipxam, Demas jilatan aruntap katuqasipxarakim.
[15] Laodicea iglesiankirinakar aruntt'apxam. Ninfaru, utapan tantachasipki uka jilatanakar aruntapxam.
[16] Aka qillqat ullart'asinsti, Laodiceankir iglesiar apayapxam, ukan ullart'atäñapataki; Laodiceat purinir qillqatsti jumanakax ullart'apxarakim.
[17] Arquipo jilatarusti akham sapxam: “Kuna lurañtix Tatitux churktam uk sumpun phuqham” sasa.
[18] Naya, Pablow aka arunta pachpa amparaxampi qillqanipxsma. Amtasipxam, nayax katuntatätwa. Diosan munasiñapay jumanakampïpan.