[1] Emohote, nugu Yesus Éné sisi mése haiyangmu yokukubumériya égéki namu Titus gu hate hamemere ahu Yesus Énini fimiri bahana yoho bake yokukubunu.
[2] Mumangge ahu besing yeyoho matahai yoho wayamu emesuméri bohonan niye ememere yokukubunu, "Guguna modu damu guguna sifing hafumu kuyoméri éyonan niye guku guguna modu damu guguna sifing hafuféri etori bunané. Damu u fe de éyongkumaki, gugu u égéki esumu aburohomu nafaméri wayamu emesuméri bunané. Damu gugu wayamu bunané, emohoni ahu fe yoho guguki yauri bohonané. Damu gugu Yesus Éné sisi haiyangmu yokukubumériya égéki esumu haiyangne ememere fimiri bunané. Damu ahu fe yoho worunané. Damu ukukuwoho deregemu poréyahamu égenani, wowiyokinanéte, guku fani Ala modinan de, damu Ala esumu kotoféri bunané," ememere yokukubunu.
[3] Hate yang mése ahu posukigina yoho wayamu bohonan niye ememere yokukubunu, "Gugu emesumahana égéki kamu Alani fimiri enané. Damu gugu fani ahu fe yohona sisi yahamu yori hahafeyohonan deyoho. Damu gugu oho miri wambumusumahana égéki bagumu fani modinan deyoho, guku damu aminané emesuméri bohonan deyoho. Emohote, gugu ukukuwoho wayamu égena égéki amgebu hayang yoho bake hanikéri yokukubunu," ememere yang mése ahu posukigina yoho bake yokukubunu.
[4] Emoho nemohoni, yang mése ahu posukigina yohote amgebu hayang yoho wayamu bohonan niye yokukubumenané. Emohoni, amgebu hayang yohote yohonuhuwa damu yohonamkesiyo yohoki worumenané.
[5] Damu u fe de éyongkumaki, yoho u égéki esumu aburohomu nafaméri wayamu emesuméri bohonané. Yoho damu yohona modu fani dosa afénan de manggohomu bohonané. Damu hate yoho yohonuhu kuyomu mahamu emenané, damu yohonasiyo yoho wayamu hafuféri etori bohonané. Damu yoho ahu fe bake kuyomu emenané. Damu yoho yohonuhu égé ahuhabang kigi ememere fimiri yohonuhu yohona u dari bohonané. Emohoni, ahu fe yohosé Ala Éné u nugu bake kuroho nogoki fani haiyangmu égé deyoho ememere yori dirimeféri yohonan deyoho.
[6] Ememere yokukubumoho égéki hate gusé ofo hayang yoho bake hamemere yokukubunu: Ofo hayang yoho yohona modu damu yohona aduwosoho degemu poréyahamu fimiri emenané mahana égéki ukuni hafuféri bohonané.
[7] Namu Titus, gu ahu yoho bake damu wayamu emesunu! Emohoni, ahu yohote gu emesumoho égéki etori hamemere emesumenané. Damu gu yokukubumoho égéki, gusé gané modu kuyomu yoho bake u haiyangméri yori yokukubunu. Damu gu u awe yohoné moho égéki femu wayamu fimonéka, kamu u wayamu égena égéki yokukubunu.
[8] Damu gu u emu-hori-daha égéki esemu haiyangmu yori yokukubunu! Emoho nemohoni, ahu nuguki agebahamusumahana yohosé u fe éyoné gebuuri tafe agebahamenané mahana égéki fani gebufunan deyoho. Emohoni, ahu yohote awe hosumenané.
[9] Damu ahu yohonabo yohona u dari furubo yahanate aneséyang fani yahana de yoho bake ememere yokukubunu, "Gugu emesumahana égéki, gugu esumu gugunabo yohona u dari bunané! Damu gugunabo yohona modu hanikinan niye esumu furubo habigiyoméri enané. Damu gugunabo u yoho égéki fani ansakumenan deyoho, emohote femu wayamu dari hamemere enané.
[10] Damu gugunabo yohona toto fani keimu afénan deyoho. Emohote, gugu emesumahana égéki gugunabo yoho bake esumu habigiyoméri wayamu enané," ememere Titus gusé yokukubunu. Damu gu ememere yokukubumenangkumaka, ahu yohonabo yohona u dari furubo yahana yoho hamemere emesuméri emenané. Emohoni, ahu fe yoho etori Ala Éné sisi yokukubumahana égéki haiyangne ememere yori hanikinané. Nugunabo Ala mése ahu yohona dosa tobunsuméri umburomoho Égé séré.
[11] Damu Ala Éné modu kuyomu worumoho égéki ahu emu-hori-daha yoho bake ememere kubumoho: Ahu emu-hori-daha yoho dosa kemahana égéki tobunsuméri umburomoné moho éné yedi fengféyoho. Emohoni, nu gu bake moguri emiyoré, "Gu ahu-jemaat gogo fe gogo fe égena yoho bake ememere yokukubunu ememere gu bake yoré."
[12] Damu Ala Éné modu kuyomu woruméri égéni, katugo nugu beriya nogoki, Ala nugu bake ememere yokukubumoho: Nugu ukukuwoho Ala fani hanikigi de égéki modiya. Damu nugu beriya égéki ukukuwoho degemu poréyahamu égena égéki fani fifimiriya deyoho. Damu Ala hate nugu soho nokumu wayamu bohowan niye ememere yokukubumoho: U fe de éyongkumaki, nugu u égéki esumu aburohomu nafaméri wayamu emesuméri bohowané; nugu haiyangmu emesumowané; Ala Éné modu hanikiné moho égéki emesumowané.
[13] Emohoni, Yesus u haiyangmu yokukubumoho égéki nugu hamesumowa. Ememere hamesuméri nugu sawa Yesus Kristus Égé defené moho égéki hanikéri fisini fimiri kidabohowa. U nogoki Ala nugu bake ukukuwoho manggohomu égé égéki kuroho égé kéré. Yesus Kristus Égésé nuguna dosa kemériya égéki tobunsuméri umburomoho Égé séré. Damu Yesus Ala esumu habigiyoméri baha Égé séré. Embahae Égésé Éné habigiyo féri buméri uwaneri éyoné defené moho égéki etohowané.
[14] Damu Yesus Kristus mése Éné aduwosoho ahu yoho bake nugu niye hanikéri kurohoni, ahu yohote Égéki uguna kunggu. Égé nuguna dosa nuguki afuri égé égéki umburomon niye. Damu Yesus ememere emoho égéki nuguna modu degemu wayamu tobunsumon niye kunggu kéré. Emohoni, Yesus nuguki mokumu yahani, nugute Yesus Énahu kiri bohowané, damu nugu wayamu emesumowané mériya égéki esumu hanikéri pafufoméri bohowané.
[15] Damu namu Titus, ukukuwoho nu mése yoré égéki ahu Yesus Énini fimiri Kreta soho dubuge ékému bahana yoho bake agogoméri yokukubunu! Damu yoho ukukuwoho égéki fani dari emenan dekumaka, gu esumu yoho bake hanggeramu yokukubunu! Gu gané na habigiyo Ala kuroho égéki de égéni, ememere habigiyoméri yokukubunu! Emohoni, ahu fe yoho gu amiféri baha ememere fani fimenan deyoho.