[1] Emoho nemohoni, gugu mése Ala Énamkesiyo kéré, damu Ala Égé esemu guguki worumoho. Emohoni, gugu Ala emesumoho hamemere emesuméri bunané.
[2] Damu Kristus Yesus Égé guguki woruméri Éné aduwosoho égéki debahae-abufiya ékému kunggu. Égé kunggu égéki mése aguto gobofumona duri kuroho gahakumu Ala bake kurohoni, Ala Éné modu esemu hanikigi. Ememere Kristus Yesus worumoho hamemere gugu hate esemu ahu fe yohoki woruméri emesuméri bunané.
[3] Gugu Ala Énahu kiri bahana. Emohoni, ukukuwoho fani haiyangmu égena de égéki fani ememere emenan deyoho, meneféyané: Gugu hukum anggenekigina nahangkuni yangna besingna kutumu hahafemahana, damu ahu besing fe besing fe damu hate yang fe yang fe kutumu hahafemahana ememere ukukuwoho poréyahamu égena éné kibi hoso-hoso égéki emahana. Damu gugu toto rahamo aneséyang rahamo kukuwoho fe rahamo aburohomu afénan niye honggonggomahana. Damu gugu ememere égena égéki emenan deyoho, meneféyané. Emohoni, ahu fe yoho homereyaha fani guguna sisi yori guguki gogohomenan deyoho.
[4] Damu gugu u poréyahamu égena, damu u fani haiyangmu égena de égéki fani homereyaha yohonan deyoho. Damu hate u yohoni toungkigite, u fani haiyangmu égena de égéki fani yohonan deyoho. Emohote, Ala gugu bake mahamu emohoni, Égé bake degi kuroho ememere nouwané.
[5] U feki nu u yahae méré nogoki femu narané: Gugu hukum anggenekigina nahangkuni kutumu hahafemahana; yang fe yang fe damu besing fe besing fe kutumu hahafemahana ememere ukukuwoho poréyahamu égena éné kibi hoso-hoso emahana; toto rahamo aneséyang rahamo ukukuwoho fe rahamo aburohomu afénan niye honggonggomahana. Ahu ememere bahana yoho aneséyang rahamo toto rahamo ukukuwoho rahamo ememere égena égéki yohonabo gahakumu bahanani, yoho Ala Nugunabo kéré fani ememere fimahana deyoho. Damu gugu ememere bohonangkumaka, Ala damu Kristus Yoho Yohonahu hafuféri bahana ékému fani Yohonahu kiri bohonan deyoho.
[6] Damu ahu fe yoho ememere yahamu yohona, "Gugu dosa siyaha hosumu égena égéki afénangkumaka, demoho." Ememere yahamu yori yokukubumahana yohona u dari fani kotoféyonan deyoho, meneféyané. Ahu dosa siyaha hosumu yoré égéki kemesumahana yoho fani Ala Éné u dari hamemere emahana deyoho. Emohoni, Ala Égésé esumu yoho bake hakereméri poréyahamu emoné.
[7] Emohoni, ahu énéyuhuwoho ukukuwoho keiyongmu emesumahana ememere bahana yoho kumu fani kotoféyonan deyoho, meneféyané.
[8] Gugu anggo posuyahaki asuguguto ékému bakena. Emohote, kageto nogoki gugu mése Nugunabo Yesus Égé kumu kotoféri arari égenani, gugu kakani hori égéto ékému osuri bahana. Emohoni, gugu ahu kakani hori égéto ékému bahana nahu kiri emesuméri bunané.
[9] Ahu kakani hori égé ékému bohonangkumaka, emohoni yoho wayamu emesumahana, damu Ala Éné sifing hanikéri emoné moho égéki hamu hanéri emesumahana, damu fani u yahamu yohonan de haiyangmu emesuméri bahana.
[10] Damu Nugunabo ukukuwoho makerahare hanikiné moho égéki damu fani hanikiné moho de égéki nafamenan niye pafufoméri efefenané.
[11] Damu gugu ahu asuguguto kumu beri keiyongmu emesumahana égéki fani kotoféyonan deyoho. Ahu énéyuhuwoho emesumahana égéki fani haiyangmu égé deyoho. Emohote, gugu ahu fe yoho bake keiyongmu emesumahana égéki fani haiyangmu égena de égéki kubumu nouwané nafamenané.
[12] Damu Ala Énahu nugu ahu énéyuhuwoho ukukuwoho keiyongmu kasuni kemesumahana égéki kamu u féri yohowané mériya égéki esumu hosungkigi.
[13] Emohote, kakani hori égé égéki ukukuwoho keiyongmu égena ékému kakani hori uwaneri éyongkumaka, ahu yoho ukukuwoho égena égéki makemere égena égéki nafamenané. Hamemere ahu yoho ukukuwoho keiyongmu kasuni emesumahana égéki nugu Ala Éné u féri yobuwoméri kubumu yohowangkumaka, ahu énéyuhuwoho emesumahana égéki keiyongmu égena ememere kubumoné nafamenané.
[14] Kakani hori égé égéki kukuwoho fe asukigito ékému kakani hori égéni, kukuwoho fe égé uku hate kakani hori égé. Emohoni, ahu yoho ememere yohona: "Gugu kunu égena ékému dakamu dotori bunané. Damu gugu ahu kungguna ékému dakamu dotori bunané. Kristus Éné kakani hori égé égéki guguna modu kumu kakani hori éyoné."
[15] Emohoni, gugu sifing féri emesuméri bahana égéki guku hafumu etotoméri bunané. Damu gugu fani ahu esemu emuméri homereyaha bahana égéki hamemere bohonan deyoho. Emohote, gugu ahu esemu wayamu fimiri nafaméri bahana yoho hamemere bunané.
[16] Damu sawa égena nogoki ahu yoho esumu keiyongmu emesumahana. Emohoni, gugu sawa hamu égena égéki ahu keiyongmu bahana yoho bake wayamu fimiri wayamu enané. Emohoni, ahu énéyuhuwoho yohote guguki etori gugu Kristus Énahu kiri bahana égéki nafamenané.
[17] Emohoni, gugu ahu emuméri bahana yoho gahakumu bohonan deyoho. Emohote, gugu esemu pafufoméri gugu Nugunabo Ahuyaha Yesus Éné sifing hanikéri emoné moho égéki nafaméri bunané.
[18] Damu gugu fani oho miri wambumenan deyoho, meneféyané. Gugu anggur noho miri wambumenangkumaka, gugu guguna sifing fani ukuni nafamenan de ukukuwoho keiyongmu égena égéki fimiri emenané. Emohote, asu-sawa meneféyané Ala Éné Ubana Hayo Éné habigiyo féri guguki afuri bohoné.
[19] Damu gugu Ala Éné Buku Mazmur éné kubu etori kubu neiyané. Damu kubu fe Ala Énaukumenané mahana éné kubu etori kubu neiyané. Damu kubu fe Ala Éné Ubana Hayo gugu bake kuroho égéki etori kubu neiyané. Damu gugu Nugunabo Ahuyaha Yesus Éné kubu iri Énaukumenan niye guguna modu esemu hanikéri kubu neiyané.
[20] Damu Nugunabo Ahuyaha Yesus Kristus gugu niye ukukuwoho emu-hori-daha emesumohoni, asu-sawa Nugunabo Ala bake degi kuroho ememere nouwané.
[21] Gugu Kristus Éné u dari Énaukuni bahana hamemere guguna modu amiféri guguna matahai yoho kumu kutumu yohona u dari bunané.
[22] Ha, yang mése hu yahana yohoniya, Kristus Égé ahu-jemaat emu-hori-daha Yesus Énini fimiri beriya nuguna Ahuhabang kiri Éné na yeri bahani, ahu-jemaat emu-hori-daha nugu Éné u dari beriya. Hamemere gugunuhugiyoho yoho guguna ahuhabang kiri yohona na yeri bahanani, gugu yohona u dari bunané. Kristus Égé Énahu, nugu dosa yariya égéki tobunsuméri umburomoho Égé séré.
[24] Emohoni, ahu-jemaat nugu Kristus Éné u dari u yohoto hamemere emesuméri beriya. Hamemere yang hamu bahana gugu gugunuhugiyoho yohona u dari u yohoto hamemere emesuméri bunané.
[25] Ha, ahu besing yang yahana yohoniya, Kristus Égé ememere ahu-jemaat yohoki woruméri yoho niye debahae-abufiya ékému kunggu. Hamemere ahu besing hamu bahana gugu hate gugunahamogiyoho yohoki worunané.
[26] Damu Kristus Égé ahu-jemaat yohoki woruméri yoho niye kunggu égéki ahu-jemaat yoho fani dosa afénan de Énahu kiri esumu manggohomu bohonan niye. Sawa yoho Yesus Éné sisi dari haiyangne ememere fimahana égéki, Yesus Égé oho féri baptismahana ememere eméri ahu-jemaat yohona dosa yahana égéki tobunsumon niye.
[27] Damu Kristus ahu-jemaat yohoki woruméri yoho niye kunggu, emohoni ahu-jemaat yoho Énahu kiri esumu manggohomu éyonan niye, damu Égé ahu-jemaat yoho yeri Éné sama kumu kufiyoné éyonan niye. Damu Kristus Égé kunggu égéki ahu-jemaat yoho u fe poréyahamu égena rahamo u fe degemu égena rahamo fani ememere égena deyoho, mite yoho Ala niye degemu manggohomu bohonané, fe fani poréyahamu éyon de égé niye.
[28] Kristus emoho hamemere enané. Ahu besing gugu guku guguna aduwosoho woruméri bahana hamemere gugu gugunahamogiyoho yohoki woruméri bunané. Damu ahu besing fe égé énahamo worumongkumaki, ahu égé ukuni aduwosoho woruméri baha hamemere emoho kéré.
[29] Damu ahu fe égé fani éné aduwosoho égéki uku fani hakereméri bohon deyoho. Emohote, Kristus Égé Énahu ahu-jemaat yohoki etori baha hamemere ahu égé éné aduwosoho égéki ohoru aren niye kuroho damu oho amin niye kuroho ememere etori baha kéré.
[30] Damu Kristus Égé ahu-jemaat nuguki etori baha égéki nugu Éné aduwosoho, bero, bégé gahakumu beriyani, Égé nuguki etori baha kéré.
[31] Emohoni, Ala Éné Buku Kara ékému besing yang yaha égéki ememere kara uwangki: "Emoho nemohoni, besing égé énabo énéni mungguki, damu yang égé kotoféri bahana. Emohoni, ahu ukuma yoho ahu kamisige kiri bahana."
[32] Damu ahu ukuma yoho kamisigemu bahana nogoki nafamané mériya égéki fani korokigi deyoho. Damu nu u éyoré nogoki Kristus Égé kumu Éné jemaat nugu kumu kotoféri kamisigemu arari ériya éné u égé kéré.
[33] Emohote, u nogoki hate ememere égé: Ahu besing hamu bahana gugu guku guguna aduwosoho woruméri bahana égéki hamemere gugu esumu gugunahamogiyoho yohoki woruméri bunané. Damu yang hamu bahana gugu esemu yohonohugiyoho yohona u dari yohonaukuni bunané.