[1] Nu fisini fimiri égéki nu pafufoméri ahu-jemaat Kolose gugu damu ahu-jemaat Laodikia yoho niye mahamu eme méré égéki nafamenan niye. Damu hate nu fisini fimiri égéki nané matahai fe busu fe busu fe emu-hori-daha beri nu fani etori nafamahana de yoho niye pafufoméri mahamu eme méré égéki nafamenan niye.
[2] Ememere nu pafufoméri mahamu eme méré égéki gugu damu yoho ememere bohonan niye: Gugu damu yohona modu habigiyoméri kutumu woruméri bohonané, emohoni gugu gogo kamisigemu arari éri bohonan niye. Damu hate gugu damu yoho Ala Éné u yoho égéki esumu wayamu nafaméri haiyangne ememere kirimu fimenané, guguna modu damu yohona modu hanikinan niye. Damu gugu Ala Éné sifingmu fimiri awe emoné moho égéki kasuni éyaki égéki wayamu nafamenan niye. Kasuni éyaki égéki uku Kristus Égéki kubumoho.
[3] Kamu Kristus Égé remu guguna sifing damu yohona sifing abuwomoné, emohoni gugu damu yoho Ala Éné u kasuni éyaki égéki wayamu fimiri nafamenané.
[4] Damu nu u nogoki gugu bake yahae méré, emohoni gugu ahu fe yoho yahamu yokukubumahana égéki fani kotoféyonan de égé niye. Ahu énéyuhuwoho esumu u manggohomu égena gahakumu yahamu yori ukukuwoho fani haiyangmu égena de égéki gugu bake yokuni yohonané, emohoni gugute yoho kotoféri degemu emenan deyoho.
[5] Damu nu fani gugu bahana ékému kotoféri bere deyohote, nané modu damu nané sifing gugu kumu kotoféri ériya. Damu nu daréni gugu kutumu kotoféri arari sifing kamisigemu bahana, damu gugu habigiyoméri Kristus Énini kirimu fimiri bahana. Emohoni, nané modu hanikéré.
[6] Ala kubumu yohoni Ahuhabang kiri baha, Kristus Yesus Égésé Gugunabo kiri baha ememere fimiri bahana. Emohoni, gugu guku damu Égé kumu kotoféri kamisigemu arari éri Gugunabo Éné sifing hanikéri emoné moho égéki emesuméri bunané.
[7] Damu debahae hayo bubukuni bahana hamemere gugu Yesus Éné sisi dari haiyangne ememere kirimu fimiri Yesus kumu kotoféri habigiyoméri arari bunané, damu tafe habigiyoméri bunané. Damu gugu bake Kristus Yesus Éné sisi yokukubumakena égéki haiyangne ememere fimiri bahana, damu tafe sisi yokukubumakena égéki komukuni fimiri bunané. Damu gugu Ala bake u yosumenané mahana égéki, Égé bake degi kuroho ememere yosuméri bunané.
[8] Gugu hafumu etotoméri bunané, emohoni ahu fe fani gugu bake tinibiyakungguni, ahu Ala Éné sisi fani haiyangmu yokukubumahana de homereyaha égena égéki fani kotoféyonan deyoho. Damu ahu énéyuhuwoho fimahanani ukukuwoho yokukubumahana égéki Ala haiyangmu baha Égéki yokukubumahanate, kamu ahu yohona sifingmu fimahana égéki yokukubumahana kéré. Yoho ememere yokukubumahana égéki guguna yahae u yakena égéki damu hohoi yoho damu bana keiyong yoho soho nokumu hafuféri bahana yohona sisi égéki hamu hanéri égéte, u égéki fani Kristus Éné sisi deyoho.
[9] Damu gugu u nogoki fifinané: Kristus Égé Ahu hayang kiri baha égéki, Ala baha hamemere habigiyo emu-hori-daha Ala kiri baha égéki Énamu bake esumu aburohomu kirimu égéni, fe fani karakigi deyoho.
[10] Damu gugu Kristus Égé kumu kotoféri kamisigemu arari égenani, gugu kirimu wayamu égena, fe fani poréyahakigi deyoho. Damu Kristus Égé Ahuhabang kiri malaikat yoho kumu hohoi yoho kumu bana yoho kumu ememere égena yoho yohona na éné kibi hoso-hoso yeri hafuféri bahana yohoki hafuféri baha kéré.
[11] Damu gugu Kristus Égé kumu kotoféri kamisigemu arari égenani, guguna kukuwoho hasusumahana gahakumu bahana. U feki gugu fani aduwosoho féri hasusumahana deyohote, Kristus Égé gugu guguna modu keiyongmu fimiri dosa afénané mahana ékému umburomoho kéré.
[12] Anggo feki gugu baptismakena égéki, gugu kungguna gahakumu Kristus kumu kotoféri soho kuwangkena. Damu Ala esumu habigiyoméri baha Égésé emohoni Yesus ahu honubakigina ékému dakamu dotoho égéki haiyangne ememere fimiri bahana. Emohoni, gugu Égé kumu kotoféri kamisigemu arari éri Égé kumu kotoféri dakamu dotori sifing harahaimu fimiri bahana.
[13] Damu anggo posuyahaki Yahudi nahu de gugu Ala Éné u yohoto nahangkuni dosa kemesumakena damu guguna modu keiyongmu fimiri dosa afénané mahana ékému fani umburomaki deyoho. Emohoni, Ala guguki mungguni, gugu ahu kungguna gahakumu damu degemu bakena. Emohote, Ala guguna dosa emu-hori-daha kemahana égéki tobunsumohoni, gugute Kristus kumu kotoféri dakamu dotori sifing harahaimu fimiri bahana.
[14] Ala ememere emoho égéki u nogo gahakumu égé: Ala nugu Musa éné hukum nahangkuni dosa emu-hori-daha emériya égéki efefeméri yori inggemohoka, damu Égé nugu bake poréyahamu emoné ememere kara uwangki égéki afusumoho. Damu Yesus debahae-abufiya ékému kunggu égéki, kara égéki kotoféri pakumahanani, kara égéki pemoho otoho gahakumu égé.
[15] Damu Ala hohoi damu bana keiyong ememere yohona na yeri hafuféri bahana yoho bake emohoni hohoi keiyong damu bana keiyong énéyuhuwoho yohona habigiyo unggusaméri abutakunggu. U feki Kristus debahae-abufiya ékému kunggu égéki, Ala emohoni hohoi damu bana emu-hori-daha yoho wakiginate, Ala habigiyomoho. Ala u nogoki ahu yohona sama kumu kubumohoni, ahu yohote nafamahana.
[16] Damu ahu yoho ememere yokukubumahana: "Gugu ohoru damu oho anggenekigina égéki nanéka, damu nemiyané. Damu Sawa-Sabat damu kamu kageto taneri hoho kubu ainané mahana éné sawa ememere Yahudi nahu yohona yahae u yohoto hamemere kubu neiyané." Ememere yokukubumahanate, gugu fani kotoféyonan deyoho, meneféyané. Emohoni, ahu fe yoho guguki etori gugu bake fani ememere ditini yohonan deyoho, "Gugu poréyahamu emahana."
[17] U emu-hori-daha yohona yahae yakenani emesumahana égéki usubang gahakumu égena. Usubang gahakumu égena égéki Ala Kristus kusumoné awe defené moho égéki kubumoho. Emohote, Kristus Égé mése dahani, u égena égéki mése eméri feyahafumoho.
[18] Damu gugu ahu yoho ememere yokungguna égéki fani kotoféyonan deyoho: "Nugu emesumériya hamemere gugu guguna modu amiféri malaikat yoho bake sembayang yeri yohonaukunané." Emohote, gugu yoho yokukubumahana égéki kotoféyonangkumaka, Ala gugu bake ukukuwoho Ala kurohoné ememere u yahamaki égéki fani afénan deyoho. Damu ahu ememere yokukubumahana yohote fani kunu igina de égéki ukukuwoho ahasu gahakumu etosumahanani, yoho esumu Ala nafamahana ememere fimahana. Damu yoho fimahana égéki yohona sifingmu fimahana kéré. Emohoni, yohona modu kokokéri hanikigina égéki fani haiyangmu égena deyoho.
[19] Damu ahu énéyuhuwoho Kristus Éné sisi haiyangmu yokukubumahana égéki mungguna. Kristus Égé habang gahakumu baha, damu Énahu nugu aduwosoho, bero, bégé gahakumu beriya. Habang égé aduwosoho damu bero-bégé égena égéki hafuféri égé, damu mé damu bégékéng damu berokéng ememere kotoféri arari éri hoho-daha ememere égena. Hamemere Kristus Égé Ahuhabang kiri Énahu emu-hori-daha yohoki hafuféri égé, damu Égé emohoni Énahu yoho yoku kotoféri kamisigemu arari éri emesumahana. Emohoni, Ala Éné sifing hanikéri emoné moho hamu hanéri Énahu yohote Kristus Égéki habigiyoméri kotoféyonané, tafe komukuni haibigiyoméri kotoféyonané.
[20] Gugu mése Kristus kumu kotoféri kungguna ememere éyonangkumaka, emohoni hohoi yoho damu bana keiyong yoho soho nokumu hafuféri bahana ékému guguki umburomoho. Emohoni, gugute ahu Kristus fani fimiri bahana de yoho ukukuwoho soho nokumu égena égéki emesumahana égéki fani hamemenan deyoho, meneféyané.
[21] Damu ahu soho nokumu emesumahana égéki kotoféyahana yoho yohona u égena nogoki ememere yokukubumahana, "Gugu guguna bero féri fani afénan deyoho. Damu fani ohoru nogoki arenan deyoho. Damu fani gohomenan deyoho."
[22] U emu-hori-daha égena égéki kamu ahu yohona sifingmu fimiri yokukubumahanani, fani kebemu éyonan deyoho. Nugu u égena nogoki emesuméri beriyaka, damu muni pemané otohoiné.
[23] Damu yoho soho nokumu emesumahana éné u ememere égena yokukubumahana égéki esumu wayamu égena gahakumu égena. Damu yohona modu amiféri égena damu yoho yohona modu Ala bake kurori yoku yohona aduwosoho degemu poréyahamu emahana égéki sifing wayamu fimiri wayamu emahana gahakumu égena. Emohote, ahu ememere emesumahana égéki nuguna modu yahani, nugu keiyongmu emesumané mériya afuri égé ékému fani muniya deyoho.