[1] Yohanes nusé ahu-jemaat etori bere nahu kiri bere. Damu nu u fe de égéni, nohogi Gayus gané niye kara nogoki uni. Damu gu Yesus Éné u haiyangmu yokukubumériya égéki dari emesumohoni, nu esumu haiyangmu guki woruméré.
[2] Nohogi, nu guki woruméréni, nu Ala bake fisini yahae, "Nugunabo Ala, Gusé nohogi Gayus éné modu wayamu enu. Emohoni, éné modu awe gemu wayamu bohoné, damu égé fani wiyahakin de éné aduwosoho habigiyoméri bohoné. Damu égé bake wayamu enu, emohoni égé Ala Gu kumu kotoféri arari égé égéki esumu habigiyoméri Gu kumu takenamu éyoné hamemere égé furubo emu-hori-daha emoné moho égéki wayamu yeri feyahafumoné,” ememere Ala bake yoré.
[3] Nuguna matahai Yesus Énini fimiri bahana yoho nokumu marahanaka, damu nohogi Gayus gané sisi yohona kiyomu etori nafamahana égéki nu kumu nané matahai yoho bake emiyohona, "Gayus égé fani munggu de esumu Yesus Éné u haiyangmu yokukubumahana égéki dari hamu hanéri emesuméri baha,” emiyohona. Nu nafaméréni gu katugo esumu asu-sawa emesumeri baha damu guku damu awe emesuméri bohoné. Ememere nusé dari nané modu esumu hanikéré.
[4] Damu nu ahu Yesus Énini fimiri bahana yoho nesiyo gahakumu fimiri. Damu nesiyo gahakumu fimiri bahana yoho Yesus Éné u haiyangmu yokukubumériya égéki dari hamu hanéri emesumeri bahana ememere yohona sisi areyekumaki, nané modu esumu hanikéré damu u tuhuremu fani hamu hanéri nané modu hanikiné moho deyoho, fe karawoho.
[5] Damu nohogi Gayus, Yohanes nusé gu woruméré. Gu ahu Yesus Énini fimiri bahana yoho mahamu emesumoho égéki fani munggu deyoho. Nuguna matahai yoho busu fe busu fe hori Yesus Éné sisi manggoho yo hohomusumahana. Damu gu ahu énéyuhuwoho fani gebuuri nafamoho deyohote, yoho gané busu kumu musugunani, gu hate mahamu emesumoho: U feki gu hanikéri yohoki yeri gané afahang osuri damu ohoru kurohoni énggena, damu yohona kukuwoho fimahana égéki kuroho ememere mahamu emesumoho. Nohogi Gayus gu ememere ahu yoho mahamu emoho égéki nusé etori nafaméréni, gu esumu Yesus kotoféyoho.
[6] Damu nohogigiyoho Gayus gané busu ékému hori dakamu dahana. Deri gané sisi égéki nu kumu ahu-jemaat nokumu bahana yoho ememere kotoféri ériya nuguna sama kumu gané sisi égéki emiyohona, "Gayus égé ahu Yesus Énini fimiri bahana yohoki esumu woruméri baha," emiyohona. Damu Yohanes nu katugo nogo gu bake fisini yahae, gu emesumoho hamemere guku damu enu: U feki sawa ahu yoho Yesus Éné sisi manggoho yo ahanan niye gané busu kumu deri musuri busu fe ahanané bemahana égéki, yoho kukuwoho fe fimahana égéki kunoro, damu ememere yoho mahamu emesuméri bunu. Ememere ahu yoho mahamu emesumoné moho nogoki Ala Éné modu hanikiné moho égé kéré, emohoni esumu gané modu kuyomu ahu yoho bake enu.
[7] Damu ahu énéyuhuwoho Kristus Éné na habigiyo ahu fe yoho bake kukubumenan niye busu fe busu fe hori Éné sisi manggoho yo hohomusumenané, emohoni yoho ahu fani Yesus Énini fimiri bahana de yoho bake kukuwoho fe fimahana égéki afénan niye yohona deyoho.
[8] Ememere emohoni, ahu Yesus Énini fimiri beriya nugu ahu énéyuhuwoho kukuwoho fimahana égéki yoho bake esumu kurohowa. Ememere yoho kukuwoho fimahana égéki mahamu emangkumaka, nugu ahu Yesus Éné u haiyangmu yokukubumoho égéki yo hohomusumenané mahana ékému tuhuremu yeri yoho kumu kotoféyowan kiyoho.
[9] Anggo feki Yohanes nusé mése ahu-jemaat Gayus gané busu hokumu bahana yoho bake kara uniké. Emohote, wokumu ahu fe éné fi Diotrefes de baha. Diotrefes égé ahu-jemaat égena ékému ememere fimoho, "Nusé asuféri moguri éré," ememere fimoho. Emohoni, u nu yoréké égéki égésé fani hanikéri dagi deyoho.
[10] Emoho nemohoni, nu awe gané busu defe méré égéki, Diotrefes égé mése ukukuwoho keiyongkéri emesumoho égéki ahu-jemaat yohona sama kumu yoho bake yobuwoméri yahae. Égé keiyongkéri emesumoho égéki nané sisi yahamu yosuméri u keiyongkéri yori égé. Damu égé esumu keiyongkéri égé égéki tafe ememere emoho: Diotrefes égé tafe nuguna matahai Yesus Énini fimiri bahana yoho busu fe busu fe hori Yesus Éné sisi manggoho yo hohomusumahana yoho kefo kiri éné busu dahana. Damu busu fe busu fe hori Yesus Éné sisi manggoho yo hohomusumenané mahana yoho fani hanikéri mahamu emoho deyoho: U feki égé fani hanikéri ohoru kurohona, kukuwoho kurohona fani ememere mahamu emoho deyoho. Damu égé remu fani emoho deyoho, damu hate égé ahu tuhuremu yoho Yesus Éné sisi yo hohomusumahana nahu yohoki hanikéri mahamu emenané mahana égéki angginekigi. Damu ahu tuhuremu yoho hanikéri sisi manggoho yo hohomusumahana nahu yoho kefo kiri dahanani, mahamu emenané mahana yohoki Diotrefes égésé ansakuméri ahu-jemaat égena ékému ahu énéyuhuwoho hate uwahafunggu.
[11] Nohogi Gayus, Yohanes nusé guki woruméré. Emohoni, ukukuwoho éné kusi keiyongmu égé égéki nugu fani kotoféri emowan deyoho. Emohote, ukukuwoho éné kusi wayamu égé égéki nugu kotoféri emowa. Damu ahu ukukuwoho wayamu égé égéki emesumongkumaki, nugu etori nafamériyani ahu égésé Ala Énsiyo kéré. Emohote, ahu ukukuwoho keiyongmu égé égéki uku damu emesuméri bohongkumaki, nugu etori nafamériyani ahu égé Ala Éné modu kumu sifing fimoho égéki fani nafamoho deyoho.
[12] Damu ahu fe de baha. Éné fiki Demetrius. Ahu-jemaat yoho Demetrius éné sisi égéki emiyohona, “Demetrius égé ahu manggohokigi,” ememere yohona. Damu Demetrius égé Yesus Éné sisi haiyangmu yokukubumériya égéki dari hamemere emesuméri baha. Damu égé emesumeri baha égéki Yohanes nu damu nané matahai yoho hate etori nafamériyani égé ahu manggohokigi. Emohoni, nugu hate ememere éné sisi égéki gu bake yoriya. Nohogi Gayus, gu nafamohoni nugu Demetrius éné sisi yoriya égéki haiyangne.
[13] Ukukuwoho uku damu aburoho égenani nu hanikéri gugu bake yahae néré. Emohote, nu fimiri fani kara uni deyoho.
[14] Nu fisini fimirini kakumu deri gebuuri damu awe u kutumu yohowané.
[15] Nu Ala bake yahae, "Nugunabo Ala, Gusé nohogi Gayus éné modu wayamu enu, emohoni éné modu gemu wayamu bohoné," emiyoré. Damu nohogigiyoho de nokumu bahana yoho gu bake ememere yofiyonané ahainé moho, "Gu fake bunu!" Damu nuguna hogi hokumu bahana yoho bake ememere yofiyowané ahiné moho, "Nuguna hogigiyoho yohoniya, gugu fake bunané!" U fe karawoho.