[1] Namu Timotius, gu Kristus Yesus kumu kotoféri arari égéni, Ala Éné modu kuyomu woruméri gu bake habigiyo kurohoné. Emohoni, guku damu habigiyoméri bunu.
[2] Anggo feki ahu aburoho deri damu yohona kiyo kukuuri etori égena yohona sama kumu nu Yesus Éné sisi yokukubuméréké. Nu yokukubuméréké égéki gu hate mése dagi. Emohoni, gu ahu fe wayamu bahana yoho bake Yesus Éné sisi yokukubuméréké égéki hamemere katugo yokukubunu. Ahu wayamu bahana énéyuhuwoho Yesus Éné sisi haiyangmu égé égéki etori bohonané mahana, damu yoho habigiyoméri ahu fe yoho bake yokukubumenané mahana.
[3] Ahu-tentara yoho kutumu sahari homuuguna égéki, yohona u aburohomu égenate, yoho modu dongkuni kugutoméri yohona furubo wayamu yahana. Hamemere nugu Kristus Yesus kotoféyoriyani, ukukuwoho poréyahamu égenate, nugu Yesus kotoféyoriya égéki fani modiyan deyoho. Emohoni, maha dohoné, nugu hate Kristus Yesus kotoféri modu dongkuni kugutomowa.
[4] Ahu-tentara yoho pafufoméri yohona furubo éyahana égéki, yoho yohona ahuhabang éné modu hanikin niye yoho fani yohona furubo damu yohona ukukuwoho afahang kumu égena égéki fani gagitomahana deyoho. Hamemere Kristus Yesus Énini fimiri beriya nugu Éné modu hanikin niye nuguna furubo damu nuguna ukukuwoho afahang kumu égena égéki fani gagitomériya deyoho
[5] Damu ukusi feki ahu boniri ahanané mahana yoho u yohoto hamemere boniri moguri ogohoingkumaki, ukukuwoho wayamu égé égéki awe aféné. Hamemere ahu Yesus Énini fimiri bahana yoho Ala Éné u dari u yohoto hamemere bohonangkumaka, Ala kukuwoho wayamu fengféyoho égéki kurohoné awe afénané.
[6] Damu ukusi feki ahu giyong ugamsumoho nesi égé furubo habigiyomu yeri kukuwoho kuhunsumoho kiuri bohongkumaki, égésé mumangge kukuwoho kuhunsumoho kiuri égena égéki awe aféné. Hamemere ahu Ala Éné furubo yeri baha égé habigiyoméri Ala Éné furubo aféngkumaka, égé mumangge Ala kukuwoho awe kurohoné moho égéki aféné.
[7] Namu Timotius, nu ukusi ukumasiyo yoré nogoki wayamu fifimiri bunu. Ememere wayamu fifimiri bohongkumaki, Nugunabo Ahuyaha guki awe mahamu emoné, gute awe u emu-hori-daha yoré égéki esumu haiyangmu nafamoné.
[8] Yesus Kristus Énini damu fifiméri bunu: Yesus Éné sisi manggoho égéki nusé ememere yosuméré: Yesus Kristus Égéki Yahudi nahu yohona ahuhabang-raja Daud éné go kiri awe defené ememere Alasé u yahamaki hamu hanéri daha. Damu Alasé yohoni Égéte ahu hosangkigina ékému dakamu dotaki.
[9] Yesus Éné sisi manggoho égéki nusé yo hohomusuméréni, kugutoméré. Emohoni, ahu keiyong gahakumu nuki yuhu-rantai féri aragena. Emohote, Ala Éné u égéki fani yuhu-rantai féri aragena deyoho. Emohoni, ahu fe yohote damu Ala Yesus Éné sisi yofiyoho daha égéki awe yo ahanané.
[10] Emohoni, nu ukukuwoho emu-hori-daha poréyahamu égenate, nu nuku damu ukuni, modu dongkuni éré. Ala ahu yohona fi igini Énahu kiri bohonané mahana yoho niye ememere kugutoméri bere. Emohoni, ahu énéyuhuwoho age Yesus Énini fimiri bohonangkumaka, yoho Kristus Yesus kumu kotoféri arari égenani, Ala yohona dosa yahana égéki tobunsuméri umburomoné Égé kumu kotoféri bohoné embahae posu-posukiné, damu Kristus Yesus bahato ékému kotoféri esumu wayamu bohonané.
[11] Yesus Éné u égéki yohona nogoki esemu haiyangne: Nugu mése Égé kotoféri akumowangkumaka, damu nugu awe hate Égé kumu kotoféri sifing féri bohowané.
[12] Nugu nuku damu ukukuwoho poréyahamu égenate, modu dongkuni kugutoméri bohowangkumaka, nugu awe Égé kotoféri hafuféri yori éyowané. Emohote, nugu Égé emukigi ememere amageiméri yohowangkumaka, Égé awe hamemere Nu ahu yohoki emukigi ememere amageiméri yohoné.
[13] Nugu Égé u emu-hori-daha yoho yaki égéki muni fani emowan dekumaka, Égé fani Éné u yoho yaki égéki Uku fani amageimon deyoho. Emohoni, Égé nugu kumu u yahamoho yaki égéki fani modin de esumu emoné.
[14] Ukukuwoho emu-hori-daha nu kara uni égéki ahu mése Yesus Kristus Énini fimiri bahana yoho bake nouni, fifimiri bohonané. Damu u kara uni égéki Ala Ukuné kiyomu etori baha Éné sama kumu yoho bake hanggeramu nou, emohoni yohote fani u fe u fe efefeméri u égéki hanggerakéri bomugasuma keméri afénan deyoho. Ememere emahana égéki fani wayamu égé deyoho, damu ahu u égéki areyonangkumaka, yoho Yesus Énini fimiri bahana égéki awe modinan kiyoho.
[15] Namu Timotius, gu guku damu Yesus Éné sisi manggoho haiyangmu égé égéki yokukubunu. Gané furubo égé habigiyoméri hanggerakéri neri, emohoni gu guku Ala bake kubumoho égéki awe fani hosumon deyoho. Damu Ala awe gu bake yori emiyohoné, "Gu Nanahu furubo manggohomu yaha kéré," ememere ganaukumoné.
[16] Damu namu Timotius, gu ukukuwoho Ala fani hanikigi de égéki damu yahamu yokukubumahana égéki fani kutumu dari yohonan deyoho. Menefe! Ahu yoho ememere sisi soho nokumu fani haiyangmu égena de égéki hanikéri kutumu yori dari emesumenangkumaka, yoho ukukuwoho Ala fani hanikigi de égéki emesumenané. Emohoni, Ala kumu hamamu bohonané.
[17] Damu ahu fe éné haha peso bahani damu kubiya-kubiyaméri kokoni éyahani, éné aduwosoho esumu haimoho. Ememere ahu fe yoho awe Yesus Éné sisi yahamu yori yokukubuméri yo hohonani, ahu emu-hori-daha Yesus Énini fimiri bahana yohoki abutakungguna. Ememere yoho égena égéki ahu ukuma Himeneus kumu Filetus kumu ememere keiyongmu yokukubumahana.
[18] Yoho Yesus Éné sisi manggoho fani esemu haiyangmu égé de égéki yokukubumahana. Damu yoho yori emiyahana, "Nugu age Yesus Énini fimiri beriya égéki, Ala mése emohoni nugu sifing harahaimu fimiri beriya. Emohoni, ahu Yesus Énini fimiri bahana yoho akumenangkumaka, yoho fani dakamu dotohonan deyoho," emiyohona. Yoho ememere katugo nogoki damu emahanani ahu Yesus Énini fimiri bahana tuhuremu yoho muni Yesus Énini fani tafe fimiri bahana deyoho.
[19] Emohote, ahu afahang debahae kane bago kimoho gahakumu Ala Énahu debahae kane bago gahakumu mése kimohoni, sisiyahaméri botokéri bahana. Ala Énahu yohosé debahae kane bago gahakumu égena égéki Ala ememere kara ungguni baha: "Nugunabo Ala ahu Énahu kiri baha égéki nafamoho." Damu hate ememere kara uwangki baha: "Ahu menohosé Nabo Ahuyaha Égésé Nabo kéré ememere yohongkumaki, ahu égé esumu keiyongmu eméri baha égéki muni undomoné."
[20] Damu ukusi nogoki finané: Ahu fe éné afahang toto aburoho baha égé kukuwoho ohoru kuni aduna damu kukuwoho ohoru yauri arena ememere aburoho kufiyohoni baha. Damu égé kukuwoho ememere égena égéki kukuwoho iyobégé-emas damu iyobégé-perak éné aneséyang ka siyaha baha féri emahana égéki kufiyohoni égena. Damu kukuwoho debahae damu soho magiyo éné aneséyang ka warekigi féri emahana égéki kufiyohoni égena. Damu ahu asuféri baha égé afahang nesi éné kefo kiri defengkumaki, kukuwoho fe iyobégé-emas damu iyobégé-perak féri emahana égé féri ohoru kuni kurohoni énggena. Damu kukuwoho fe debahae damu soho magiyo féri emahana égéki uku asu-sawa ohoru yauri énggamsumoho kéré.
[21] Ememere ahu fe égé degemu manggohomu éri uku poréyahamu égena emu-hori-daha égéki modingkumaki, égé awe esumu kukuwoho iyobégé-emas damu iyobégé-perak éné aneséyang ka siyahakigi wayamu afahang égena gahakumu baha. Égé ememere baha égéki kubumohoni égé fani dosa afén de manggohomu bohoné damu Nugunabo Ahuyaha Égé niye furubo wayamu égé égéki afén niye fengféyoné.
[22] Emohoni, namu Timotius, ofo hayang yoho ukukuwoho keiyongmu égena égéki hanikéri emesumenané mahana égéki fani kotoféyon deyoho. Muni menefé! Damu gu u fani yahamu yohon de guku damu haiyangmu emesuméri bunu, damu Yesus Kristus Énini fimiri bunu, damu ahu fe yoho bake worunu, damu ahu fe yoho kumu u fe fani éyon de gemu wayamu bunu. Ememere emenané mahana égéki gu ahu emu-hori-daha yohona modu haiyangmu Nugunabo Ahuyaha Égé bake sembayang yeri Énaukungguna yoho kumu kotoféri pafufoméri emesunané.
[23] Damu ahu yoho u fe u fe efefeméri u égéki kutumu ansakuméri hanggeramu yori bomugasuma yahana. Ememere égena égéki gu mése nafamoho. Emohoni, ahu u fe efefeméri homereyaha kutumu yori ansakuméri hanggeramu yohona yohoki muni gu fani yoho kotoféyon deyoho.
[24] Emohote, ahu Nugunabo Ahuyaha Éné furubo yaha égé ahu fe yoho kumu fani bomugasuma afénan deyoho, emohote ahu aburoho emu-hori-daha yoho bake éné modu kuyoméri esumu emoné. Damu égé esemu habigiyoméri modu dongkuni Ala Éné sisi haiyangmu ayoméri yokukubumoné.
[25] Damu égé esumu éné modu amiféri kuyoméri ahu gung botokeseméri bahana yoho bake yokukubumoné: Égé ememere emongkumaki, Ala emoné ahu énéyuhuwoho yohona sifing deregemu fimiri ukuni abuméri Ala bake deri Yesus Éné sisi manggoho haiyangmu yokukubuméré égéki nafamenan kiyoho.
[26] Damu ememere ahu gung botokeseméri bahana yoho ukuni fimahanani yoho hohoi yohona ahuhabang Iblis waya kufiyoho ékému osuri ugu, damu hohoi yohona ahuhabang Iblis éné sifingmu fimiri emoné moho égéki kotoféyahana. Ememere ukuni fimahanaka, ohoru waya ékému suhungfiyoho gahakumu hohoi yohona ahuhabang Iblis éné waya uri bahana ékému suhungfiyonané.