[1] Damu anggo feki nugu gugu kumu kotoféri berekang égéki, gugu Nugunabo Ahuyaha Yesus kumu kotoféri arari égenani, Ala Éné modu hanikiné moho égéki emesuméri bohonan niye yokukubumérékang. Emohoni, gugu dari hamemere bamahana. Emohote, nugu tafe u hanggeramu guguna akiya emiyoriya, "Nané matahai Yesus Énini fimiri bahana yohoniya, gugu esumu haiyangmu enané, emohoni Ala Ėné modu hanikiné. Damu tafe esumu komukuni haiyangmu enané, emohoni Ala Éné modu tafe komukuni hanikiné."
[2] Ememere guguna akiya yoriya égéki Nugunabo Ahuyaha Yesus nugu bake nuguna na habigiyo kurohoni, nuguna habigiyo yeri yokukubumériya. U égéki gugu mése nafamahana.
[3] Damu Ala Éné sifing fimiri emoné moho égéki gugu Ala bake guguna aduwosoho kurori Éné u dari esumu manggohomu bohonané mahana égé kéré. Emohoni, gugu hukum anggenekigina nahangkuni fani homereyaha yangna besingna kutumu hahafemenan deyoho, damu besing fe besing fe damu hate yang fe yang fe fani kutumu hahafemenan deyoho. meneféyané!
[4] Damu gugu ahu isige-isige guguna aduwosoho awe ayoyoméri etori enané, emohoni yangna besingna homereyaha hahafemenan deyoho. Damu gugu fani dosa afénan de manggohomu bohonané, damu ahu yoho gugu bahana égéki etori ahu manggohokigi ememere gugunaukumenané.
[5] Damu ahu fani Ala nafamahana de yoho gahakumu yangna besingna homereyaha hahafemenané ememere fimahana nogoki gugusé fani guguna modu afuri éyonan deyoho. Meneféyané!
[6] Damu gugu guguna matahai Yesus Énini fimiri bahana yoho bake yangna besingna homereyaha hahafémahana éné dosa nogoki fani afénan deyoho. Damu yoho bake yahamu yori yohonahamo yohonuhu ememere hahafémenan deyoho. Anggo féki gugu bake mése hanggeramu guguna akiya yorékang égéki fifinané: Nugunabo Ahuyaha Yesus awe ahu emu-hori-daha yangna besingna homereyaha yeri hahafemahana éné dosa emu-hori-daha yahana yoho bake hakereméri poréyahamu emoné.
[7] Ala Ėné sifing fimiri nuguna fi igi égéki nugu fani homereyaha yangna besingna kutumu hahafeméri dosa aféyan de égé kéré. Emohote, nugu fani dosa aféyan de Ala Éné u dari manggohomu bohowané mériya égé kéré.
[8] Emoho nemohoni, ahu menohosé nugu yokukubumériya nogoki égé muni undomongkumaki, égé fani ahu yoho yokukubumahana égéki muni undomoho deyoho, mite Ala muni undomoho kéré. U feki Ala nugu bake Éné Ubana Hayo kuroho Égéki muni undomoho kéré.
[9] Nugu nuguna matahai yangna besingna Yesus Énini fimiri bahana yohoki worumeriya égéki Ala Uku mése gugu bake ememere yokukubumoho, "Tesalonika nahu gugu guguna matahai Yesus Énini fimiri bahana yoho kumu kutumu worunané," ememere yokukubumoho. Emohoni, u nogoki gugu mése nafamahanani, nugu fani tafe kara unggowan deyoho.
[10] Haiyangne! Gugu mése nuguna matahai emu-hori-daha Makedonia soho ékému bahana yohoki worumahana ememere mése kubumahana. Emohote, gugu bake tafe u égéki hanggeramu emiyoriya, "Nuguna matahai yohoniya, gugu tafe ahu Yesus Énini fimiri bahana yohoki komukuni esemu woruméri bunané," emiyoriya.
[11] Damu anggo feki nugu gugu kotoféri berekang égéki, nugu mése u nogoki yorékang. Damu tafe hanggeramu emiyoriya, "Gugu habigiyoméri ahu fe yoho bake ukukuwoho poréyahamu égena égéki fani emenan deyoho. Damu gugu habigiyoméri ahu fe yohona u égé fani hahabamenan deyoho. Damu guku gugu niye furubo habigiyomu neriyané, damu ohoru rahamo kukuwoho fe rahamo ememere égena égéki fani ahu fe fisini bohonan deyoho," emiyoriya.
[12] Damu ememere ahu fe fisini bohonané, arenané mahana damu aminané mahana égéki fani kurohonan deyoho. Emohote, guku habigiyoméri guguna furubo yeri bunané. Gugu ememere bohonangkumaka, emohoni ahu fani Yesus Énini fimiri bahana de yoho awe etori yori emiyohonané, "Ahu Yesus Énini fimiri bahana yoho esemu ahu manggohokigi," ememere yohonané.
[13] Damu nané matahai Yesus Énini fimiri bahana yohoniya, ahu mése Nugunabo Ahuyaha Yesus Énini fimiri beri akumenangkumaka, ahu mése kungguna yohote awe makemere éyonané mahana éné sisi égéki nugu hanikéri gugu bake yohowané, femu nafanané. Emohoni, ahu fani Yesus Énini fimiri bahana yoho gahakumu gugu fani esumu modu budiyahangféri botomu efe uri bohonan deyoho. Ahu fani Nugunabo Ahuyaha Yesus Énini fimiri bahana de yoku homereyaha bahanaka, kunggunani, ahu fe fani Yesus Énini fimiri bahana de yohote fimahanani ahu mése kungguna égé fani dakamu dotohonan deyoho. Emoho nemohoni, ahu énéyuhuwoho esemu modu budiyahangféri efe uri bahana.
[14] Damu Nugunabo Ahuyaha Yesus mése kunggute, Ala yohoni Égé mése dakamu dotaki ememere nafamériya. Emohoni, Nugunabo Ahuyaha Yesus dakamu soho nokumu defené moho égéki, Ala awe yohoni ahu emu-hori-daha mése Yesus Énini fimiri bahanaka, kungguna yohote awe Yesus kotoféri defenané ememere nafamériya.
[15] Usisi ememere égé égéki Nugunabo Ahuyaha Yesus Uku anggo posuyahaki mése nugu bake yoho yaki, emohoni nugute u nogoki gugu bake yoriya: Nugunabo Ahuyaha Yesus soho nokumu dakumu defené moho égéki, ahu mése Yesus Énini fimiri bahanaka, kungguna yohosé mumangge Égéki gebufunanéka, damu nugu damu beriya nogoki mo gebufuwané.
[16] Embahae Nuguna Ahuyaha Yesus Égésé Ala Éné busu mene bahato ékému miyoné. Égé miyoné moho égéki, Égé awe u hanggerakéri ahu yoho dotohonan niye yohoné. Damu malaikat yohona ahuhabang égésé u hanggerakéri yohoné; malaikat fe égé Ala Éné ba-trompet funi, emohoni ahu yoho areyonané. Damu ahu mése Yesus Énini fimiri bahanaka, kungguna yohosé mumangge awe dotohonané.
[17] Ememere emahanaka, damu Ala awe emoné ahu mése kungguna yoho damu nugu damu beriya nogoki kotoféri hou womu siyaha hosumu osuri Nugunabo Ahuyaha Yesus gebufuwané. Ememere emowanéka, damu Égé kumu kotoféri bohowané embahae posu-posukiné.
[18] Emoho nemohoni, u kageto yoré nogoki guku damu kutumu yori modu neriyané