[1] Emohoni, Ala kubumu yohoni Ahuhabang kiri baha, Uku Kristus mése Éné aduwosoho kugutoméri bahani, gugu hate hamemere modu habigiyoméri Égé emoho égéki hamemere enané. Ahu menohosé mése éné aduwosoho kugutoméri baha égésé tafe dosa aféné moho égéki munggu.
[2] Gugu ememere bahanani, gugu sifing féri soho nokumu awe bohonané mahana guguna sawa ganggene égéki, ahu keiyongkéri bahana yoho hanikéri emenané mahana égéki fani emenan deyoho, mite Ala Éné sifing fimiri emoné moho égéki hanikéri emenané.
[3] Anggo posuyahaki gugu mése soho nokumu bakena égéki, ahu Ala fani nafamahana de yoho hanikéri emesumahana égéki gugu hate hanikéri emesumakenani, mése degigi. Gugu ememere emesumakena: Gugu yang fe rahamo besing fe rahamo égé bake keiyongméri fimahana égéki homereyaha emesumahana. Damu yangna besingna homereyaha hahafemenané fimahana nogoki guguna modu afuri égena. Damu gugu kubu geiri oho miri wambuméri keiyongmu emesumahana. Damu gugu dukumusuméri oho miri wambumenané mahana égé migamsumahana, damu gugu kukuwoho ala éné kusi gahakumu égena yoho bake sembayang yeri yohonaukungguna. Ememere emahana égéki Alasé anggenekigi.
[4] Emohote, gugu katugo nogo fani gugunohogigiyoho damu hanikéri homereyaha dosa kemesumahana yoho kumu kotoféyonan deyoho. Emohoni, yoho yohona habang gugubeméri guguki dirimeféri yohona.
[5] Emohote, Ala awe ahu emu-hori-daha katugo damu bahana yoho damu mése kungguna yoho ememere yohona u efefeméri yori inggemoné moho égéki fengféyori égé. Ememere yori inggemoné moho sawa égéki Égé awe ahu énéyuhuwoho bake ememere abamu yohoné, "Gu u nogoki makemohore keiyongmu emohoe?" Ememere abamu yohongkumaka, ahu énéyuhuwoho Ala bake yohona u emu-hori-daha keiyongmu emesumahana égéki esemu utuhu hamenané.
[6] Ememere égenani, ahu mése honubakigina yoho damu soho nokumu bakena égéki, Yesus Éné sisi manggoho égéki yoho bake u yobuwoméri yosumahanani, yohote Yesus Énini fimiri bakena. Emohoni, Ala ahu emu-hori-daha yohona u efefeméri yori inggemoho hamemere Ala yohona u efefeméri yori inggemoné. Emohote, yohona ubana Ala Éné sifing fimiri emoné moho hamu hanéri awe bohonané embahae posu-posukiné.
[7] Kukuwoho emu-hori-daha akimamaga mése takenakigi. Emohoni, guguna sifing haiyangmu hafuféri gugu makerahare fimahana égéki etotoméri wayamu fimiri bunané. Emohoni, asu-sawa gugu Ala bake u yohonané mahana égéki, wayamu fimiri Ala bake yohonané.
[8] Damu mumangge gugu kutumu guguna modu kirimu woruméri bunané. Nugu ahu fe yoho esumu worumowangkumaka, ahu yoho nugu bake poréyahamu emahana égéki nugu fengféyori u kutumu yori feyahafumané.
[9] Ahu kefo kiri guguna afahang dahana yoho bake ohoru kunoro, damu awe kunu ainané mahanato kunoro. Damu ememere emahana égéki, fani ufuyohonan de hanikéri enané.
[10] Ala Éné modu kuyomu woruméri ukukuwoho deregemu égena égéki ahu isige-isige Yesus Énini fimiri bahana yoho bake kuroho, nemohoni ahu Yesus Énini fimiri bahana yohote ahu fe yohona furubo yeri mahamu emenané. Damu yoho hate ukukuwoho Ala kuroho égéki wayamu etori bohonané. Emohoni, gugu ukukuwoho Ala kuroho égé féri ahu yoho mahamu emesuméri bunané.
[11] Damu gugu ukukuwoho Ala kuroho égéki yeri Ala Éné u yokukubumenangkumaka, gugu ememere fimiri enané, "Nu u yoré nogoki fani nuku nané umu yoré deyoho, mite uku Ala Éné u we." Damu gugu ahu fe yoho mahamu emenangkumaka, ememere fimiri enané, "Nugunabo Ala Égé nu bake habigiyo kurohoni, nu guguki mahamu eméré." Ememere emahanani, ahu fe yoho guguki etori Ala asuféri baha ememere Énaukumenané. Yesus Kristus emohoni, gugu emu-hori-daha égéki emahana kéré. Damu nu Ala bake fisini yahae, "Nabo Ala, nugu Ganaukumériya, damu Gu habigiyoméri nuguki hafuféri etori bohoné embahae posu-posukiné," ememere fisini yoré. Amin.
[12] Ahu Yesus Énini fimiri bahana yohoniya, nu guguki woruméré. Gugu ukukuwoho agefekigi gebuugunaka, damu indo dohoni haha haimoho hamemere esemu kugutoméri bahana égéki, gugu etori fani habang gugubemenan deyoho, meneféyané. Ememere égena égéki gugu damu Yesus Énini fimiri bahana rahamo kara rahamo ememere ikuhamahana kéré. Damu ememere esemu kugutoméri bahana égéki gebufunangkumaka, gugu u nogoki nafaméri fani mokinan deyoho, meneféyané.
[13] Emohote, Kristus kugutomaki hamemere kugutoméri bahanani, guguna modu esumu hanikinané. Kristus awe dakamu soho nokumu defenéka, damu Égé habigiyoméri kakani hori éri kibikubumoné moho égéki, gugu hate esemu hanikéri gong akinané. Emoho nemohoni, gugu katugo kugutoméri bahana égéki, guguna modu esemu hanikinané.
[14] Damu Kristus kotoféyahanani, ahu fe yoho guguki dirimeféri yohonangkumaka, gugu guguna modu hanikinané. Gugu ahu fe yoho guguki etori dirimeféri yohonate, guguna modu hanikéri bohonangkumaka, ahu fe yoho guguki etori ememere yohonané, "Ala Éné Ubana Hayo esumu habigiyoméri baha Égésé yoho kumu kotoféri beri yohoki hafuféri etori baha," ememere yohonané. Emoho nemohoni, guguna modu hanikinané.
[15] Emohote, gugu kugutoméri bohonangkumaka, gugu égena ékému ahu homuuguna rahamo kei yahana rahamo keiyongkéri bahana rahamo hate ahu fe yohona u égé hahabamahana rahamo ememere emahanani, kugutoméri bohonan deyoho, meneféyané.
[16] Emohote, gugu Kristus Énahu kiri bahanani, gugu kugutoméri bohonangkumaka, gugu fani hosumenan deyoho, meneféyané. Emohote, ahu yoho guguki etori Kristus Énahu kiri bahana ememere iri yohonani, gugu mése Ala Énaukungguna kéré.
[17] Katugo nogoki Ala ahu yohona u age efefeméri yori inggemoho. Égé mumangge Énahu yohona u égéki efefeméri yori inggemoho. Égé mumangge Énamkesiyo nuguna u efefeméri yori inggemongkumaki, mo ahu fani Yesus Éné sisi manggoho dagena de ansakuméri undomahana yoho yohona u efefeméri yori inggemoné moho égéki makemere éyone? Ala yoho bake poréyahamu emoné moho égéki esumu bodukiné.
[18] Ala Éné Buku kumu ememere kara uwangki: "Ahu Ala Éné u dari haiyangmu bahana yoho mumangge ukukuwoho agefékigina égéki gebuuri kugutoméri bohonanéka, mo Ala ahu énéyuhuwohoki umburomoné. Emohoni, ahu keiyongkéri Ala fani hanikigi de égéki emesumahana yoho makemere éyonane? Ala yohoki esumu poréyahamu emoné esumu kugutoméri bohonané."
[19] Emoho nemohoni, Ala Éné sifing fimiri emoné moho hamemere kugutoméri bahana guguniya, Ala Uku nuguki emoho, damu Égé asu-sawa Éné u yahamaki égéki hamemere emoho. Ememere baha Égé bake gugu sifing féri bohonané mahana égéki kunoro, damu gugu esemu Ala Éné u dari wayamu emesuméri bunané.