[1] Na kao din, laki Timotiyo, kangay bodang, kaimo pakaeyaten in remrem panawen sa kao piyagtolong Kiristo Isos.
[2] Kao karengey in kangay mga piyatoldo sa karowan pag mangyan. Na ina kaimo wakay patoldowen sa mga mangyan maal paalapetan, kabaloy batay agpatoldo sa mga roma.
[3] Kao agsandata domalan sa kaidapan kataw osai ka maal pag sondalo sogowan Kiristo Isos.
[4] In sondalo piyagsogo kansiyo kapitan yewed maal siyo aakayan sa yewed panawen sondalo, dayem kailangan siyo agpakaanggay sa kansiyo kapitan.
[5] Kataw din in osai ka agmesaan no siyo yewed maniwala sa siyabi in agpamesa na siyo idbatay mandaeg.
[6] In ageyat agbangen agtogda, na kansiyo bagiyan in galem lakonaw.
[7] Kaimo pagremremen in kangay piyagsolat sa kaimo. Kao piyagtolong in Kapwan matang kaimo atawanan in boo.
[8] Baatte kaimo remremen IsoKiristo, in batang sa kasokponan Dabid, siyo batang matay piyaboway wakay. Ina in Maal pag Barita kangay piyagpatoldo.
[9] Panawen ina ako piyagpaidapan, piyageket karakara kataw in osai ka agpamono mangyan. Kamay in agiplaong Diyos yewed aeket.
[10] Na in boote kangay piyagbanta, matang agtolong sa mga iidang Diyos, matang kansiro din abel in boway batang kay Kiristo Isos, osai in kalakoyen idapo kalobosan.
[11] Betek anda pag piyagsabi, No kitam matay sarig Kiristo, na kitam batay din boway kansiyo sarig.
[12] No kitam agbanta sa kaidapan, na kitam batay kansiyo sarig agpapoon. No kitam agpamangyan sa kansiyo, na siyo din batay agpamangyan sa kantam.
[13] Kamayba kitam yewed betek, na siyo betek daan, Angkataw no kataw nakay siyo, na idbatay miyalis.
[14] Anda baatte kaimo oliten sa kaimo mga mangyan. Siro kaimo pabilinanen sa pangkit Diyos, siro ayaw agpalsisagotan sa mga agiplaong sa mga adar. Ina idapo kabolowan, agsida kay sa paniwala in mga agparengey.
[15] Pagpiliten matang kao makaanggay sa Diyos, sogowan idapo piyagkarikoy, idapo baribid in agpatoldo in Maal pag Barita.
[16] Ayaw agpaagem sa mga agbarogi idapo kabolowan, angkataw ina labi kay agpaadayonaw sa dalan Diyos.
[17] In kansiro piyagpatoldo kagwali sogat bangkokang agpamodang. Kataw din ina Iminyo osai Pilito.
[18] Siro pabaribid wa sa betek pag adar, kansiro kay din piyagsida in paniwala in amat. Siro keyen, Kitam idapo wa dogayan pag boway wakay, ina mibaloy wa, idapo dogayan pag boway wakay.
[19] Kamay marigen daan in pagpasandigan in kantam paniwala. Ina Diyos in agtadyok, apo sa Agisolat keyen, Atawanan in Kapwan in mga sa kansiyo, Osai keyen, In baatte agsamba sa Kapwan ayaw wa agpangwat daet.
[20] Sa mga balay mayaman, in mga sangkap in kalaati piyangwat ginto, mga pilak, ina mga piyagmaal, in kalaati wakay yangaw, mga keden, ina yewed maloba piyagmaal.
[21] Na kataw wa ina no siyo yewed miyagem asin pag mga baribid pag piyatoldo, na siyo batay sangkap piyagmaal, piyagtalaga sandata wa piyagalapet kansiyo kapwan.
[22] Kao ayaw agkaakayan sa mga piyagkabeet panawen in mga badyate bodang kay. Kao agpilit agogali in maalno, in agyanggat kay Kiristo, in agpakayawte sa amat, osai in yewed agpagolo, sarig in mga mangyan yewed agpakagwali waget agsamba sa Kapwan.
[23] Ayaw agkaakayan sa mga idapo kabolowan pag agpalsisagotan, angkataw kaimo atawanan ina agibaloy wa agpalawayan.
[24] In sogowan Kiristo yewed mayadi agpalaway, dayem siyo palagi mabait sa boo, katawan agpatoldo, yewed galiten.
[25] Kailangan siyo mabait pag agpabetek sa mga aglaban sa kansiyo piyagpatoldo, matang nges siro pakanen Diyos kabaloyan agbenglay kansiro daet, matang atawanan in betek.
[26] No kataw ina miyalis wakay kansiro remrem, siro batay mipalpas sa salaod diyablo in agsakop sa kansiro.