[1] Aqivq jaqbheq juq-ol, ngal niailhai ge nail neq, aoldaoq kovqdaoq heeq nia nail juq bhai ge nail ngaol. Tsaol-aq aqdoevq doevq-u phao taivq-ail aoldaoq kovqdaoq nail kov-uvq bhai jaol nail ngaol dai, nuljuq heeq nia nail ngaol.
[2] Yaqmai-aq teevq gaq, aivq nail yovjil khal doevq-u kev dai, aoldaoq kovqdaoq-i mail aivq bhai pheethaiq-ai thaq nail ngaol. Thailhai ngaol-aoq, yovjil gaq sil haq neq, yovjil gaq nee tavq nail aoldaoq kovqdaoq nee bhuq-ail jel-ail nail ngaol.
[3] Alheel ngel-i mail, aivq nail yovjil maq sil-u phao, yaoq gaq yaoq nee bheeq haq neq, bheeq nail leel nail yaqmai-aq dai, yu aivq bhai ge nail ngaol. Thailhai ngaol-aoq, aivq nail yovjil sil haq neq, aoldaoq kovqdaoq al bhai bhuq-ail jel ail-aoq nail ngel-i mail, yaoq gaq yaoq bhai maol ail khi ngaol-aoq, bheeq nail leel nail yaqmai-aq maq ngel-ail.
[4] Ngaq nail aqivq jaqbheq juq-ol, alhai dul dai nuljuq Khali nee teevq gaq khe-ai sil-a nail ngel-i mail, aoldaoq kovqdaoq bhai bhuq-ail jel ail-a nail ngaol. Alheel ngel-i mail, ngadao Miqyail nail haqbhoil aqheeq heeq lee nia dai, nuljuq neq, gaoq doevq kovq lal-a nail Khali bhai maol ail-a nail ngaol.
[5] Khul khi mail dai ngal-aq neq, ngadao aqsivq haqjoil nail neekhaol khe-ai aqdoevq doevq-u phao, aoldaoq kovqdaoq bhaqda nee oeqbal nl movq nail neekhaol ngadao nail aqmaol lavqkhoel bhai ganl nl khi, ngadao-i mail khal nl khal hal nail yaoq phaq yaoq-ao nee sil nail phaq bhai dee lai nail ngaol.
[6] Thailhai ngaol-aoq, niil aq-il ngadao aoldaoq kovqdaoq bhai bhuq-ail jel ail-aoq nail ngaol. Jel lal-u phao, ngadao bhai pheethaiq-ai thaq nail phaq bhai pheel ha-ail ceevq-a nail ngel-i mail, niil aq-il ngadao-i mail nl nail hal nail neq, aoldaoq kovqdaoq aqlil nail kov-uvq bhai nl nail hal nail maq ngel-ail. Aqhaqlal Miqyail uvthaiq nail neema aqsivq aol khi nl nail hal nail ngaol.
[7] Alheel ngel-i mail, ngadao khalhai ge heeq. Aoldaoq kovqdaoq neq, oeqbal pevq nail laiq. Maq ngel-ail dei-eiq. Aoldaoq kovqdaoq maq jiav-ail nul neq, ngadao oeqbal aol nail dai, ngadao maq heeq kivq-ail. Khul khi mail dai ngal-aq neq, yu nail yalkav bhai maivjeel thaq jeel dai, aoldaoq kovqdaoq maq ge lavq-ail kheel nul neq, maivjeel jeel nail phaq oeqbal ngaol dai, ngadao maq heeq kivq-ail.
[8] Oeqbal neq aoldaoq kovqdaoq bhai juq juq-ail khi, ngadao nail lavqkhoel khe maivjeel jeel nail mee nia phaq bhi dov lal nia nail ngaol. Khul khi mail dai ngal-aq, aoldaoq kovqdaoq maq jiav-ail nul neq, oeqbal sil-a nail ngaol.
[9] Jel lal-u phao, aoldaoq kovqdaoq bhai maq tavq dai ngadao aqdoevq doevq-a nail ngaol. Thailhai ngaol-aoq, aoldaoq kovqdaoq kev lee-u phao, oeqbal doevq lal khi ngadao neq, sil-a nail ngaol.
[10] Aoldaoq kovqdaoq al bhaqda nee ngadao aqdoevq ya doevq nail ngaol dai, noeqthunq khi ngaol-aoq, ngaq bhai heivq lao thaq nail niil.
[11] Khul khi mail dai ngal-aq, oeqbal neq, aoldaoq kovqdaoq al bhai juq juq-ail, ngadao bhai goiqbhaoq bhaoq lavq-a nail nee ovqtavq, heivq lavq-a nail ngaol.
[12] Thailhai ngaol-aoq, aoldaoq kovqdaoq iqsanl mail aqmeeq aqhaol haol khi, aqtsaq ngaol. Aqmeeq ngaol.
[13] Thailhai phal-iq neq, aqmeeq phaq-i mail ngadao bhai heivq lavq-a nail laiq. Maq ngel-ail dei-eiq. Oeqbal neq, maldil oeqbal ngaol dai, bhaqlaoq kheq dai dov lal dai, aqmeeq phaq bhai juq khi ngadao bhai heivq lavq-a nail ngaol. Alheel ngel-i mail, aoldaoq kovqdaoq al juq neq, oeqbal khadai haqeiv nail ngel-ail dai, bhaqlaoq kheq dai, cavq lavq-a nail ngaol.
[14] Aoldaoq kovqdaoq neq, aqhaqlal bhai tavq nail ngaol dai, ngadao heeq kivq naol. Thailhai ngaol-aoq, ngadao aqsivq haqjoil bhai tavq khi, oeqbal nail yaqkav bhi jiovq nail dai khi, ngadao bhai gaoq-ai thaq nail ngaol.
[15] Ngadao-i mail nl nail juq bhai ngadao maq heeq kivq-ail. Ngadao nl movq nail phaq bhai maq nl mail, ngadao-i mail bhe nail phaq bhai ngadao nl nail ngaol.
[16] Ngadao maq nl movq nail phaq bhai ngadao nl haq neq, aoldaoq kovqdaoq aqmeeq ngaol dai, ngadao khanq-a nail ngaol.
[17] Alheel ngel-i mail, maq meeq nail al juq bhai maldil ngadao nl nail maq ngel. Ngado nail lavqkhoel khe aol nail oeqbal nl nail ngaol.
[18] Aqsivq haqjoil bhai tavq nail ngadao nail aqmaol niil nail lavqkhoel bhai aqmeeq phaq teevq peivq-ail maq aol-ail dai, ngadao heeq kivq naol. Aqmeeq phaq nl movq nail neema aol khi ngaol-aoq, maq nl kivq-ail.
[19] Al ovqtavq, aqmeeq phaq nl movq khi ngaol-aoq ngadao maq nl-al. Maq nl movq nail haqeiv nail phaq ngadao nl nail ngaol.
[20] Maq nl movq nail phaq ngadao nl haq neq, ngadao nl nail maq ngel. Ngadao nail lavqkhoel khe aol nail oeqbal nl nail ngaol.
[21] Alheel ngel-i mail, ngadao aqmeeq phaq nl movq-u phao, khaq mao iqsanl haqeiv nail phaq ngadao nail lavqkhoel bhai aol nail bhai ngadao ya moel nail ngaol.
[22] Ngadao nail neema lavqkhoel bhai neq, Miqyail nail aol bhai lavqkhiq tsail-ail nial.
[23] Thailhai ngaol-aoq, ngadao nail aqmaol lavqkhoel bhai, aol yaoq phaq yaoq aol nail bhai ngadao ya moel-a nail ngaol. Aol al neq, ngadao nail neema nee genl dev pheeljaq khi, ngadao nail aqmaol lavqkhoel khe aol nail oeqbal ngadao bhai bhi pheel-aivq nail dai, nl nail ngaol.
[24] Ngadao bhai noeqhaq deedee-ail nial. Ngadao bhai bhi sil-ail thailthaiq nail aqmaol niil nail lavqkhoel nee, khaq sil gaq ngadao bhai bhi jel-ail nia nail-aiq.
[25] Ngadao nail Heeqphaq Yeiqsul Khali bhi jel-ail nia nail ngel-i mail, Miqyail bhai tsiq eeq bhel. Thailhai phal-iq neq, ngadao nail neema niil Miqyail nail aoldaoq kovqdaoq bhai tsaq nail khe-ai nl naol. Thailhai ngaol-aoq, ngadao nail aqsivq haqjoil phao tavq nail aqmaol neq, oeqbal nail aol bhai tsaq dai, nl-ai haq nail ngaol.