[1] A bhai nee ngal-aq, Heeqphaq Yeiqsul yaqlaol yaoq juq yaoq sivq tsel-nvq gaq bhai tsel khi, aivq ail nail meenq juq julgu juq bhai, nvq gaq teevq dao, nvq gaq teevq dao dai, aivq nail iqmoeq nee bhi ail-a nail ngaol.
[2] Yeiqsul aqyu juq bhai ge bhiq-a nail: “Gov gaiq mao lal thaq nail, maodai jiav khi ngaol-aoq, gaiq nail tsaol-aq micil teevq-eel ngaol. Alheel ngel-i mail, ‘Naoq nail gov govyal bhai gov gaiq nail tsaol-aq maodai bhi lee yaoq’ dai, ilheel gaq bhai geeqlaoq hal yaoq.
[3] Nuljuq dov ail yaoq. Oelnel nail munl lavqkhoel yaol bhai phaiq bhoel gai-aivq nail khe-ai, ngal nuljuq bhai miltsaq yaq nail lavqkhoel bhai khoel gai-aivq naol.
[4] Phul baivluvq, phalthaoq khi mail saiqnaov tsaoq-nq thaq nail nee ovqtavq, al jaiq thaq oil-aivq. Gailphail lail ma bhai ail-u phao, yu thaoqphuq lee khi ngaol-aoq, naq lai khi daoq thaq ge tsaoq.
[5] Nuljuq ilkhaol khul il bhai dav lai-u phao maqkhaiq, ‘Ilkhaol niil il bhai, neesal-ovq nail phaq kev lee dei-eiq’ dai, iqmoeq ge yaoq.
[6] Ilkhaol al il nail lavqkhoel neesal-ovq nail phaq bhai, ya geel-nvq nail tsaol-aq teevq gaq ganav jaol haq neq, naoq nail neesal-ovq nail phaq aivq nail kovtavq bhai kev ail nail ngaol. Maq jaol haq neq, nuljuq jaol nail bha kovq lal nail ngaol.
[7] Ilkhaol al il bhai taivq-ail jaol khi, aqyu juq-i mail tsiqdav lavq nail phaq jaq yaoq daol yaoq. Ganl nl nail tsaol-aq, aqn aqphoiq ya nail, tsaq nail ngaol. Yaoq il yaoq bhai thaq dav phal-ail.
[8] Nuljuq meenq khul meenq bhai aol ail-u phao maqkhaiq, aqyu juq nuljuq bhai hav haq neq, kovqkhail bhai khal tsiqdav lavq nail juq bhai jaq yaoq.
[9] A bhai jaol nail nal nail goel nail juq bhai lav meeq bhiq yaoq. ‘Miqyail Milkhaoq nuljuq nail aqjail bhai kev lee-aoq naol’ dai, aqyu juq bhai ge bhiq yaoq.
[10] Nuljuq meenq khul meenq bhai aol ail-u phao maqkhaiq, aqyu juq nuljuq bhai maq hav haq neq, meenq al meenq nail gailkhaol bhai thulphaol khi, niailhai ge bhiq yaoq:
[11] ‘Nvjuq nail aqkhil pavq-uvq bhai leivq nail, nuljuq nail meenq niil meenq nail khaqlail nuljuq nail kovtavq bhai kev lee dai, nvjuq naoq khal-ail ceevq naol. Thailhai ngaol-aoq, Miqyail Milkhaoq nuljuq nail aqjail bhai kev lee-aoq nail ngaol dai, heeq kivq thaq-ai yaoq’ dai, aqyu juq bhai ge bhiq yaoq.
[12] Ngal nuljuq bhai ge lavq bhel: Yalkhaq dal-u n-gaol, meenq al meenq neq, Saoldoq meenq nee maqtsil ya daq nail ngaol” dai, ge bhiq-a nail ngaol.
[13] Yeiqsul gaoq ge nail: “Khaollaqseiq meenq bhai jaol nail tsaol-aq juq-ol, nuljuq geeqlaoq aqdoil ya nail ngaol. Bheiqjeildaq meenq bhai jaol nail tsaol-aq juq-ol, nuljuq iqsanl, geeqlaoq aqdoil ya nail ngaol. Khul khi mail dai ngal-aq neq, nuljuq nail lavqkhoel bhai nl-a hal-a nail bhaqaoq eeq deedee nail juq, Dullu meenq khi Sildoq meenq lavqkhoel bhai nl-a nail kheel nul neq, aqyu juq aq-u nee daqiq doi khi, civqbhaol bhai jaoldeel khi civqbhaol laltsal haiq dav haiq dav-ail oeqbal noeq pov nail ngaol.
[14] Yalkhaq dal-u n-gaol, nuljuq Dullu meenq khi mail Sildoq meenq nee maqtsil, ya daq nail ngaol.
[15] Gaqbheiqneiqoq meenq bhai jaol nail tsaol-aq juq-ol, Miqyail nuljuq bhai nqtavq bha tsiqdav kev lavq naol dai, noeq nail laiq. Maq ngel-ail. Nuljuq bhai sil nail milkhaoq nail daoqthaoq bha tsiq bhoel lavq nail ngaol” dai, ge bhiq-a nail ngaol.
[16] Yeiqsul aivq nail yaqlaol bhai gaoq ge bhiq-a nail: “Nuljuq nail daoq naldaiq nail tsaol-aq, ngaq nail daoq naldaiq nail ngaol. Nuljuq bhai khaonq nail tsaol-aq, ngaq bhai khaonq nail ngaol. Ngaq bhai khaonq nail tsaol-aq, ngaq bhai khoel-ai leevq-a nail gaq bhai iqsanl khaonq-a nail ngaol” dai, ge bhiq-a nail ngaol.
[17] Yaqlaol al sivq tsel-nvq gaq lavqkhiq tsail tav dai, kovq kev lal khi, “Heeqphaq-ol, naoq nail aqmil bhai juq juq-ail, nvjuq neivq bhai gaq lai-a nail ngaol” dai, ge bhiq-a nail ngaol.
[18] Yeiqsul ge bhiq-a nail: “Neivq Saqdaq neq, nqmeivq meivq nail khe-ai, nqtavq nee mail ga lee nail bhai, ngal ya moel-a nail ngaol.
[19] Nuljuq neq, eellel khi mail bhoiqkeiv lavqmav bhai naoqthaiq nia dai maqkhaiq, neivq Saqdaq nail bhaqaoq bhai gaq lai nia dai maqkhaiq, ngal nuljuq bhai bhaqaoq bivq-a nail ngaol. Khul phaq iqsanl, nuljuq bhai maq lav thaoq maq lav nal nia-ail.
[20] Thailhai ngaol-aoq, nuljuq neivq bhai gaq lai-a nail ngel-i mail taivq-ail, lavqkhiq thaq tsail. Nqtavq kovtavq bha nuljuq nail aqmil gevq bhoel-ai thaq nail bhai lavqkhiq tsail yaoq” dai, aivq aqyu juq bhai ge bhiq-a nail ngaol.
[21] Aq-u phao, Yeiqsul Meeqnail Haolnail Aqhaqlal bhaqda nee lavqkhiq tsail khi ge nail: “Nqtavq khi miltsaq bhai uvthaiq nail Aqbhu-ol, neenoeq neekha aol nail tsaol-aq khi aqgeel geel nail tsaol-aq bhai naol ganl niil juq oil tsail-ai thaq khi, yaqnoil khe-ai neema thaq nia nail juq bhai phaodaiq bhiq-a nail ngel-i mail, ngal naoq bhai tsiqeeq naol. Aqbhu-ol, alhai pevq lal-a nail bhai, naol neema tsaq nail ngaol.
[22] Yaoq phaq yaoq-ao nee ngaq nail Aqbhu ngaq bhai av lavq-a nail ngaol. Aqbhu Miqyail maq ngel haq neq, Yaqyov khaq sil gaq dai, teevq gaq iqsanl maq heeq nia-ail. Yaqyov khi mail Yaqyov phaodaiq bhiq movq nail tsaol-aq maq ngel nail neq, Aqbhu Miqyail khaq sil gaq dai, teevq gaq iqsanl maq heeq nia-ail” dai, ge bhiq-a nail ngaol.
[23] Aq-u phao, Yeiqsul yaqlaol juq jaol nail phao tsiqphaol khi, aqyu juq bhai taivq-ail ge bhiq-a nail: “Nuljuq niil juq bhai ya moel-a nail ngel-i mail, nuljuq geeqlaoq eeq nail ngaol.
[24] Ngal nuljuq bhai ge lavq bhel. Nuljuq-i mail ya moel-a nail juq, Miqyail nail haqbhoil gedan nail maodai gaq khi heeqphaq juq maodai gaq moel movq khi ngaol-aoq, maq ya moel-al, nuljuq-i mail ya gaiq-a nail juq aqyu juq gaiq movq khi ngaol-aoq, maq ya gaiq-a” dai, ge bhiq-a nail ngaol.
[25] Aq-u phao, aoldaoq kovqdaoq cavq nail cov nail teevq gaq Yeiqsul bhai laonqdaiq lal khi ge nail: “Saqlaq-ol, ngal nqmaq maqluv halyeel doevq nail phaq ya kivq dai, khalhai ya nl nail-aiq” dai, naldaiq-a nail ngaol.
[26] Yeiqsul ge bhiq-a nail: “Aoldaoq kovqdaoq lavqkhoel bhai khalhai gevq-ai thaq nail-aiq. Naol ge daiq-a nail, khalhai naldaiq heeq lal ail-aiq.
[27] Naoq nail neema iqsanl mail, naoq nail aqhaqlal iqsanl mail, naoq nail gaq iqsanl khi mail, naoq nail neenoeq needul iqsanl mail, naoq nail Heeqphaq Miqyail bhai gaiq-a yaoq. Naoq nail aqmaol bhai gaiq-a nail khe-ai, naoq nail aqjail bhai jaol nail tsaol-aq bhai gaiq-a yaoq” dai, ge kovq bhiq-a nail ngaol.
[28] “Naol ge kovq lavq nail tsaq nail ngaol. Naol alhai nl ail yaoq. Nl haq neq, doevq nail phaq ya nail ngaol” dai, Yeiqsul aivq bhai ge bhiq-a nail ngaol.
[29] Thailhai ngaol-aoq, tsaol-aq al gaq, aivq nail aqmaol aivq tsaq nail daol nail ngaol dai, saol-nvq movq nail ngel-i mail: “Ngaq nail aqjail bhai jaol nail tsaol-aq neq, khaq sil gaq” dai, Yeiqsul bhai naldaiq-a nail ngaol.
[30] Yeiqsul aivq ge kovq bhiq-a nail: “Tsaol-aq teevq gaq, Yeiqlulsaqlaiq meenq nee mail Yeiqlilkhol meenq bha ail thailthaiq-u phao, tsaolpheel bhai thaoqphuq-a nail ngaol. Tsaol-aq al juq, aivq nail aqgaq aqdoi nieivq loev khi, aivq bhai maq sil teevq phaiq deeq-a nail ngaol. A bhai nee ngal-aq, khaonq-ail ceevq khi dov ail-a nail ngaol.
[31] Aq-u phao, Philma teevq gaq gailkhaol al khaol bhai ail-u phao, tsaol-aq al gaq bhai ya moel-a nail ngaol. Thailhai ngaol-aoq, gail jao jao khi iqmoeq phao ail-a nail ngaol.
[32] Alhai dul dai, Leiqbhil nail tsaol-aq teevq gaq iqsanl a bhai ail kev khi, tsaol-aq al gaq bhai ya moel-u phao, gail jao jao khi iqmoeq phao ail-a nail ngaol.
[33] Saqmaqliv tsaol-aq teevq gaq, gailkhaol al khaol bhai ail-u phao, tsaol-aq al gaq aivq ga nail bha ail kev-a nail ngaol. Aivq bhai ya moel-u phao, gaoqhaq deedee lal bhiq-a nail ngaol.
[34] Alheel ngel-i mail, aivq ga nail bha ail khi, deeq nal-ai thaq nail malkhoeq bhai aqtseel khi mail aqheeq tsilju ullul leivq bhiq khi, lavqsiv-i mail pavqthaiq bhiq-a nail ngaol. A bhai nee ngal-aq, Saqmaqliv tsaol-aq al gaq, nal nail tsaol-aq al gaq bhai aivq nail moeqphaq bhai tsiq jeeq bhiq khi daq-i yavq duq ilkhaol teevq il bhai hel-aivq khi mail, lav sav bhiq-a nail ngaol.
[35] Niaohao kev lal-u phao, aivq ilheel gaq bhai phul nvq bavq oil dov khi ge bhiq-a nail: ‘Tsaol-aq niil gaq bhai aqmeeq-ai lav sav bhiq yaoq. Phul niil taivq-ail maq lovq haq neq, naoq-i mail khal gil-a nail juq ngal kovq lal-u phao naoq bhai bivq kovq naol’ dai, ge bhiq-ail ceevq khi dov ail-a nail ngaol.
[36] Naoq bhai khalhai noeq nail-aiq. Tsaol-aq al hail gaq nail lavqkhoel khe, tsaolpheel bhai thaoqphuq-a nail al gaq nail aqjail bhai jaol nail dai, ge kivq nail tsaol-aq, khul gaq ngel-ail” dai, Yeiqsul aivq bhai naldaiq bhiq-a nail ngaol.
[37] “Aivq bhai gaoqhaq bhiq thaq nail gaq nial” dai, aoldaoq kovqdaoq cavq nail cov nail al gaq Yeiqsul bhai ge kovq bhiq-u phao, “Naol iqsanl alhai nl ail yaoq” dai, Yeiqsul aivq bhai ge bhiq-a nail ngaol.
[38] Aqyu juq gailphail lail ma bhai lai thailthaiq-u phao, Yeiqsul julgu teevq gu nail lavqkhoel bhai aol lai-a nail ngaol. Maqtha dai mil-ai thaq nail yaqmai-aq teevq gaq, aivq nail ilkhaol bha Yeiqsul bhai hav-a nail ngaol.
[39] Yaqmai-aq al gaq, Maqlil dai mil-ai thaq nail jaqbheq teevq gaq jaol nail ngaol. Maqlil neq, Yeiqsul nail aqkhil daoqthaoq bhai jaoldeel khi aivq nail daoq naldaiq nail ngaol.
[40] Maqtha neq, jaqjaq daoldaol mee nia phaq ya lav sav nail ngel-i mail, khaoqlaol nail ngaol. Aivq Yeiqsul jaol nail bha lal khi, “Heeqphaq-ol, ngaq nail jaqbheq thoil gaq, jaqjaq daoldaol mee nia phaq ngaq bhai taivq-ail bhi lav sav lavq nail bhai naoq bhai khul dai iqsanl maq noeq lal-ail laiq. Ngaq bhai tsaojao-ai bhiq yaoq dai, aivq bhai khoel yaoq” dai, Yeiqsul bhai ge bhiq-a nail ngaol.
[41] Yeiqsul aivq bhai ge bhiq nail: “Maqtha-ol, Maqtha-ol, naol neq, mee nia phaq bhai khaoqlaol nail ngaol.
[42] Thailhai ngaol-aoq, teevq phaq taivq-ail loq nail ngaol. Maqlil neq, aqmeeq al phaq bhai tsel-a nail ngaol. Al phaq bhai yu maq luv dov lal-ail” dai, ge bhiq-a nail ngaol.