[1] Miqyail neq, Yaqkov bhai ge bhiq-a nail: "Thul khi Bheiqtaqlav nail meenq bha niil aq-il ail khi jaol-ail yaoq. Naoq nail algao Eilsaol bhai gee sil khi mail tsaoq jel-u phao, naoq bhai bhi moel lavq nail Miqyail nail haqbhoil, laolduq lav sav yaoq" dai, ge bhiq-a nail ngaol.
[2] Aq-u phao, Yaqkov neq, aivq nail phaqyaq ma yaq dai khi, aivq nee mail jaol nail juq bhai ge bhiq-a nail: "Nul juq nail thaoq phaoq aqma maolkhoel iqsanl mail liv ha gil yaoq. Al ovqtavq, nul juq nail aqmaol lav haol khi, aqgaq aqdoi aqhaol haol deel doi yaoq.
[3] Ngadao juq niil niai nee, Bheiqtaqlav nail meenq bha lai nail ngaol. Ngal haq nail aoq nail kev lee-u phao, ngaq bhai tsao jao-ai lavq khi ngaq-i mail khal ail nail aqduq bha, ngaq-ai nee mail teevq gaq khe-ai jaol nail Miqyail bhai laol bhiq nail galduq, jaolduq al duq bhai laolduq lav sav lai nail ngaol" dai, ge bhiq-a nail ngaol.
[4] Al heel ngel-i mail, aqyu juq nail lavqkhoel khe jiav nail thaoq phaoq aqma maolkhoel juq iqsanl mail bhai maqkhaiq, aqyu juq bhai goe-nq thaq nail naqdev juq iqsanl mail bhai maqkhaiq, Yaqkov jaol nail bha oil lavq-a nail ngaol. Yaqkov neq, nlmaoq al juq iqsanl mail, Seiqkhinq meenq nail aqjail bhai jiav nail, ceevqkav aqbhaol nail daoqthaoq bhai duq pheeq gai-a nail ngaol.
[5] A bhai nee ngal-aq, aqyu juq yalkav oil jil khi dov ail-u phao, aqjail khe jaol nail meenq yaq juq teevq meenq-ai dai, Miqyail-i mail lav gee sil dee dee bhiq-a nail bhaq da nee, aqyu juq bhai genl maq dev lal tseq-ail.
[6] Yaqkov neq, aivq nail tsaol-aq juq nee mail teevq gaq khe-ai, Khaqnanq milkhaoq bhai jiav nail Bheiqtaqlav nail meenq dai iqsanl khul nail Lulsav nail meenq bhai, kev lai-a nail ngaol.
[7] Jaolduq al duq bhai laolduq lav sav khi, aivq nail algao nee tsaoq jel-u phao, Miqyail aivq bhai bhi moel lavq-a nail aqduq pevq nail ngel-i mail, Eil Bheiqtaqlav dai, mil bhiq-a nail ngaol.
[8] A bhai Leiqbhailkavq bhai bhi hel daiq phail thaq nail Diqbhaollaq dai khul nail, yaqkav teevq gaq sil khi, Bheiqtaqlav nail pul-nvq phao jiav nail ceevqkav aqbhaol nail daoqthaoq bhai, duq pheeq bhiq-a nail ngaol. Al heel ngel-i mail aqbhaol al bhaol bhai neq, Aqlunq Bhaqkov dai mil bhiq-a nail ngaol.
[9] Yaqkov neq, Paqdanq Aqlanq nail miltsaq nee mail kovq lal thail thaiq-u phao, Miqyail aivq bhai teevq pov gaoq bhi moel khi, geeqlaoq gaoq bivq-a nail ngaol.
[10] Miqyail ge nail: "Naoq nail aqmil neq, Yaqkov pevq nail ngaol. Thail hai ngaol-aoq, niil aq-il nee mail daq-n khi, naoq nail aqmil neq, Ilsaqleiqlav dai ya khul nail ngaol" dai, ge bhiq-a nail ngaol. Al heel ngel-i mail Miqyail neq, Yaqkov bhai Ilsaqleiqlav dai, mil bhiq-a nail ngaol.
[11] Miqyail aivq bhai teevq pov gaoq ge bhiq-a nail: "Ngal neq, iqsanl nail kovtavq bhai uv thaiq nail bhaqaoq eeq nail Miqyail pevq nail ngaol. Yaq mao dai bhao yaoq. Jeq-e jaq-a dai khi tsaol jeq-e mao dai, naoq nail lavqkhoel nee dov lal nail ngaol. Naoq-ai nee mail yavq kha lee thaq nail yaq juq nail lavqkhoel nee, heeqphaq juq gail dov lal nail ngaol.
[12] Ngal neq, Aqbhaqlaqhaq dai khi Ilcav bhai bivq-a nail miltsaq naoq bhai maqkhaiq, naoq-ai nee mail yavq kha lee thaq nail yaq juq bhai maqkhaiq, bivq naol" dai, ge bhiq-a nail ngaol.
[13] A bhai nee ngal-aq, Miqyail neq, aivq nee mail daoq ge tsaoq-a nail aqduq al duq nee mail dov lai-a nail ngaol.
[14] Yaqkov neq, Miqyail aivq bhai daoq ge tsaoq lee-a nail jaolduq al duq bhai, lovmav ilkhel kha khi, al nail kovtavq bhai aqheeq tsilju nail ullul maqkhaiq, saqloq aqtseel maqkhaiq, hoel dav khi laol bhiq-a nail ngaol.
[15] Aivq neq, Miqyail aivq bhai daoq ge tsaoq lee-a nail jaolduq al duq bhai Bheiqtaqlav dai, mil bhiq-a nail ngaol.
[16] Yaqkov dai khi aivq nail phaqyaq ma yaq juq neq, Bheiqtaqlav nail meenq nee gailkhaol gaoq dov lal khi, Eilphaqlail meenq bha maq kev lai nail micil eq-ai haq nail bhai, Laqkheiqlal neq, yaq tsiq nail aqyanq tsaq lal khi haq dee dee nail ngaol.
[17] Aivq neq, yaq bhao nail haqbhoil nal dee dee lal bhiq-a nail ngaol. Aq-u phao, yaq tsiq nail aqma aivq bhai ge bhiq-a nail: "Laqkheiqlal-ol, thaq gee sil. Yaqyov teevq gaq gaoq ya-aoq nail ngaol" dai, ge bhiq-a nail ngaol.
[18] Laqkheiqlal, aivq aqhaq maq gaol ceiv nail iqmoeq, yaqyov al gaq bhai, Bheinqoqniq dai, mil ail ceevq bhiq-a nail ngaol. Thail hai ngaol-aoq, aqbhu gaq neq yaqyov al gaq bhai Bheinqyaqminq dai, mil bhiq-a nail ngaol.
[19] Laqkheiqlal sil gaq-u phao, Bhaiqlaiqhaiq meenq dai iqsanl khul nail Eilphaqlail nail meenq bha lai nail gailkhaol aqjail-ai, duq pheeq bhiq-a nail ngaol.
[20] Yaqkov neq, luqdaol nail kovtavq bhai lovmav ilkhel kha-a nail ngel-i mail, yaq n n-gaol kev dai, ilkhel al khel neq, Laqkheiqlal nail luqdaol ilkhel dai khul nail ngaol.
[21] A bhai nee ngal-aq, gailkhaol gaoq dov lai khi Miqdal Eildeiqlav nail aqduq haoqnaol phao, haqphal saiqgov cov khi gaq naq naq-a nail ngaol.
[22] Yaqkov jaolduq al dao bhai jaol-u phao, Lulbheiq neq, aivq nail aqbhu nail khaqma yaqkav Bhillaqhaq nee mail bheeq-a nail ngaol. Ganl al ganl bhai, Yaqkov ya gaiq-a nail ngaol. Yaqkov neq, yaqyov taivq-ail 12 gaq jaol nail ngaol.
[23] Leiqaq-i mail bhao-a nail yaqyov juq nail lavqkhoel aqivq ivq aq gaq neq, Lulbheiq ngaol. Jaqbheq juq neq, Silmiqoq, Leiqbhil, Yuldav, Ilsaqkhaq khi mail Seiqbhullonq niil juq ngaol.
[24] Laqkheiqlal nail yaqyov neq, Yaolsai khi mail Bheinqyaqminq pevq nail ngaol.
[25] Laqkheiqlal nail yaqkav Bhillaqhaq nail yaqyov neq, Danq khi mail Naqtaqlil pevq nail ngaol.
[26] Leiqaq nail yaqkav Sillaqphal nail yaqyov neq, Gavq khi mail Aqsaq pevq nail ngaol. Yaqyov niil juq iqsanl mail Paqdanq Aqlanq nail miltsaq bhai jaol-u phao, bhao-a nail ngaol.
[27] Yaqkov neq, aivq nail ilkhaol pevq nail Aqbhaqlaqhaq khi mail Ilcav-i mail jaol-a nail Heiqbhonq meenq aqjail bhai, Manqleiq aqbhaol bhaol ma doevq nail aqduq bhai, aivq nail aqbhu Ilcav jaol nail bha ail-a nail ngaol.
[28] Ilcav neq, 180 kovq bhee dai, doevq-a nail ngaol.
[29] A bhai nee ngal-aq, aivq aqhaq gaol ceiv khi, aqphiq aqbhal juq nee mail jaol lai-a nail ngaol. Aq-u phao, aivq nail yaqyov pevq nail Eilsaol khi mail Yaqkov aqyu nvq mail-i mail, aivq bhai duq pheeq bhiq-a nail ngaol.