[1] ཨོ་བད་ཡཱས་མཐོང་པའི་ཞལ་གཟིགས་ནི། གཙོ་བོ་ཡ་ཝཱེས་ཨེ་དོམ་ལ་ཉེས་ཆད་གཅད་པ་དང་། ངེད་རྣམས་ཀྱིས་གཙོ་བོ་ཡ་ཝཱེ་ལས་འཕྲིན་ཞིག་ཐོས་ཏེ། ཕོ་ཉ་ཞིག་ཕྱི་ཕྱོགས་པའི་ཁྲོད་དུ་མངགས་ཤིང་དེ་དག་ལ། ཡར་ལོངས་དང་། ངེད་རྣམས་ཡར་ལངས་ཏེ་ཨེ་དོམ་དང་འཐབ་དུ་འགྲོ་བར་བྱའོ་ཞེས་གཙོ་བོ་ཡ་ཝཱེས་ཨེ་དོམ་གྱི་སྐོར་ལ་འདི་སྐད་དུ་གསུངས།
[2] ལྟོས་ཤིག བདག་གིས་ཁྱོད་ནི་མི་རྒྱུད་ཀྱི་ཁྲོད་ནས་དམའ་སར་ཕབ་སྟེ། མི་ཡིས་ཁྱོད་ལ་མཐོང་ཆུང་བྱེད་པར་འགྱུར་རོ།།
[3] རང་སེམས་ཀྱི་ང་རྒྱལ་གྱིས་ཁྱོད་ནི་བསླུས་ཏེ། ཁྱོད་རང་བྲག་ཕུག་ན་བསྡད་དེ་སྡོད་གནས་མཐོ་བས། ཁྱོད་ཀྱི་སེམས་སུ། སུ་ཞིག་གིས་ང་རང་མར་ས་ལ་འབེབས་པར་བྱ་ཞེས་ཟེར།
[4] ཇི་སྟེ་ཁྱོད་ནི་གླག་དང་འདྲ་བར་ཡར་འཕགས་ཏེ། སྐར་ཚོགས་ཀྱི་ཁྲོད་དུ་ཚང་བཅོས་ཀྱང་། བདག་གིས་ཁྱོད་ནི་དེ་ནས་མར་འབེབས་པར་བྱའོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས།
[5] གལ་ཏེ་ཁྱོད་ཀྱི་གནས་སུ་རྐུན་པོའམ། མཚན་མོར་ཇག་པ་རྣམས་འོང་ན། དེ་དག་གིས་རང་ལ་མཁོ་བ་འབའ་ཞིག་བརྐུ་པ་མ་ཡིན་ནམ། གལ་ཏེ་རྒུན་འབྲུམ་བཏོག་མཁན་ཁྱོད་རྩར་འོང་ན། དེ་དག་གིས་རྒུན་འབྲུམ་འགའ་ནི་ལུས་པར་མི་འགྱུར་རམ། ཡིན་ཡང་ཁྱོད་ཀྱིས་དེ་རྣམས་མེད་པར་བཟོས།
[6] ཨེ་སཱབ་ལ་ཅི་ལྟར་སྔོག་བཤེར་ཐེབས་པ་དང་། དེས་སྦས་པའི་ནོར་རྣམས་ཅི་ལྟར་སློང་བར་བྱས།
[7] ཁྱོད་དང་ཁ་ཆད་བཞགས་པ་རྣམས་ཀྱིས་ཁྱོད་ནི་ས་མཚམས་བར་དུ་བསྐྲད་དེ། ཁྱོད་དང་འཆམ་པ་རྣམས་ཀྱིས་ཁྱོད་རང་བསླུས་ཏེ་ཁྱོད་ལས་རྒྱལ། ཁྱོད་ཀྱི་ཟས་སྤྱད་པ་རྣམས་ཀྱིས་ཁྱོད་ལ་རྙི་བཙུགས་ཏེ་ཁྱོད་རང་གནོད། དེའི་ནང་ནས་གྲུང་པོ་སུའང་མེད།
[8] ཉིན་དེ་བསླེབ་དུས། བདག་གིས་ཨེ་དོམ་ཡུལ་ནས་མཁས་པ་རྣམས་དང་། ཨེ་སཱབ་ཀྱི་རི་བོ་ལས་གྲུང་པོ་རྣམས་མེད་པར་མི་མཛད་དམ་ཞེས་གཙོ་བོ་ཡ་ཝཱེས་གསུངས་སོ།།
[9] ཀྱེ་ཐེ་མཱན། ཁྱོད་ཀྱི་དཔའ་བོ་རྣམས་ནི་འཇིགས་པར་འགྱུར་ངེས་ཏེ། ཨེ་སཱབ་རི་བོར་གནས་པ་རེ་རེ་བཞིན་དུ་སྲོག་དང་བྲལ་པར་འགྱུར་རོ།།
[10] ཁྱོད་ཀྱིས་རང་གི་ནུ་བོ་ཡ་ཀོབ་ལ་དྲག་གནོན་བྱས་པས།ཁྱོད་ནི་ངོ་ཚ་བར་འགྱུར་ལ་ཇི་སྲིད་བར་དུ་ཚར་གཅོད་བྱེད་པར་འགྱུར་རོ།།
[11] མི་ཆ་མེད་ཀྱིས་ཡ་ཀོབ་ཀྱི་རྒྱུ་ནོར་འཕྲོག་པ་དང་། ཕྱི་ཕྱོགས་པ་རྣམས་དེའི་མཁར་སྒོ་ནང་དུ་འཛུལ་ཏེ། ཡེ་རུ་སཱ་ལེམ་གྱི་ཕྱིར་རྒྱན་བརྒྱབས་ཏེ་རྒྱུ་ནོར་བགོད་དུས། ཁྱོད་ནི་དེ་དག་གི་འགྲམ་དུ་ལངས་བསྡད་དེ། དེ་ཚོའི་ཕྱོགས་མཐུན་ཡིན་པ་འདྲ།
[12] ཁྱོད་ཀྱི་སྤུན་ལ་སྡུག་བསྔལ་གྱིས་མནར་དུས། ཁྱོད་ཀྱིས་དེ་ལ་ལྟོས་ནས་སྡོད་ག་ལ་རུང་། ཡ་ཧུ་དཱ་པ་རྣམས་འཇིག་པའི་ཉིན་མོར། ཁྱོད་ནི་དགའ་ག་ལ་རུང་སྟེ། དེ་ཚོར་སྡུག་བསྔལ་གྱིས་མནར་པའི་དུས་ལ། ཁྱོད་ཀྱིས་ང་རྒྱལ་གྱི་གཏམ་བྱེད་མི་འོས་སོ།།
[13] ངའི་མི་སྡེ་ལ་ཆག་སྒོ་བྱུང་དུས་སུ། ཁྱོད་ནི་དེ་ཚོའི་མཁར་སྒོ་ནང་དུ་འཛུལ་ག་ལ་རུང་། འོ་ན། དེ་དག་ལ་ཆག་སྒོ་བྱུང་དུས། ཁྱོད་ཀྱིས་དེ་ཚོས་སྡུག་བསྔལ་མྱངས་པ་ལ་ལྟོས་ནས་སྡོད་ག་ལ་རུང་། ཡང་དེ་དག་ལ་ཆག་སྒོ་བྱུང་དུས། ཁྱོད་ཀྱིས་ལག་པ་བརྐྱངས་ཏེ་དེ་ཚོའི་ནོར་རྫས་འཕྲོག་མི་འོས་སོ།།
[14] དེ་དག་སྡུག་བསྔལ་གྱིས་མནར་དུས། ཁྱོད་ནི་བཞི་མདོར་ལངས་ཏེ་དེའི་བྲོས་པའི་མི་རྣམས་ཀྱི་སྲོག་གཅོད་པའམ། དེའི་ལྷག་མ་རྣམས་ཀྱང་སྤྲད་མི་འོས།
[15] གཙོ་བོ་ཡ་ཝཱེའི་ཉིན་མོ་མི་རྒྱུད་ཀུན་གྱི་སྟེང་དུ་འབྱོན་དུ་ཉེ་སྟེ། ཁྱོད་ཀྱིས་བྱས་པ་བཞིན་དུ་མི་ཡིས་ཁྱོད་ལའང་དེ་ལྟར་བྱའོ།།ཁྱོད་ཀྱི་ལས་ནི་ཁྱོད་རང་གི་མགོར་འབབ་པར་འགྱུར།
[16] ཁྱོད་ཀྱིས་ངའི་རི་བོ་དམ་པར་བཏུངས་པ་དེ་བཞིན་དུ། མི་རྒྱུད་ཀུན་གྱིས་རྟག་ཏུ་འཐུང་བར་འགྱུར། འོ་ན། དེ་དག་གིས་འཐུང་ཞིང་མིད་པར་བྱ་སྟེ། ཡོད་ཚད་མེད་པ་ལྟར་དུ་འགྱུར་བར་འགྱུར།
[17] འོན་ཀྱང་རི་བོ་ཛ་ཡན་ལ་ཐར་པའི་མི་རྣམས་གནས་ཤིང་། རི་དེ་ནི་དམ་པར་འགྱུར་ལ། ཡ་ཀོབ་ཀྱི་ཁྱིམ་རྒྱུད་ལ་སྔོན་གྱི་ཟ་སྐལ་ཐོབ་པར་འགྱུར།
[18] དེ་ནས་ཡ་ཀོབ་ཀྱི་ཁྱིམ་རྒྱུད་ནི་མེ་དང་། ཡོ་སེབ་ཀྱི་མི་རྒྱུད་ནི་མེ་ལྕེ་དང་། ཨེ་སཱབ་ཀྱི་མི་རྒྱུད་ནི་སོག་རོ་ལ་གྱུར་ཏེ། དེའི་ནང་ལ་འབར་ཞིང་མེད་པར་བྱ་སྟེ། ཨེ་སབ་ཀྱི་མི་རྒྱུད་ལས་སུའང་ལུས་པར་མི་འགྱུར་ལ། གཙོ་བོ་ཡ་ཝཱེས་འདི་སྐད་དུ་གསུངས་སོ།།
[19] ཡང་དེ་རྣམས་ལ་ནེ་གུབ་ཡུལ་དང་ཨེ་སཱབ་ཀྱི་རི། དང་ཕེ་ལེ་ཤེད་ཀྱི་ཡུལ་ལ་དབང་བར་འགྱུར། ཡང་དེ་དག་གིས་ཨེ་ཕཱར་ཡིམ་གྱི་ཞིང་ཁ་དང་སཱ་མར་ཡའི་ཞིང་ཁ་ཐོབ་པར་འགྱུར་པ་དང་། པེན་ཡཱ་མེན་དང་གིལ་ཨད་ཡང་ཐོབ་པར་འགྱུར།
[20] ཡང་ཡེས་ར་ཨེལ་པ་རྣམས་ཀྱི་དམག་དཔུང་གི་ནང་ནས་བཙོན་ལ་ཡོད་པ་ཐམས་ཅད་ཀྱིས་ཀ་ན་ཨན་ནས་སཱ་རེབ་ཏ་ཡི་བར་དུ་དང་། སེ་ཕ་རཱད་ན་ཡོད་པའི་ཡེ་རུ་སཱ་ལེམ་གྱི་བཙོན་པ་རྣམས་ཀྱིས་ནེ་གུབ་ཡུལ་གྱི་གྲོང་ཁྱེར་རྣམས་ཐོབ་པར་འགྱུར།
[21] ཡང་སྐྱོབ་མཁན་རྣམས་རི་བོ་ཛ་ཡན་གྱི་ཁར་ཡར་འབྱོན་སྟེ། ཨེ་སཱབ་ལ་ཉེས་ཆད་གཅོད་པར་འགྱུར་ལ། ཡང་རྒྱལ་སྲིད་ནི་གཙོ་བོ་ཡ་ཝཱེར་དབང་ངོ་ཞེས་གསུང་པར་འགྱུར་རོ།།