[1] དེ་ནས། ངེད་རྣམས་ཀྱིས་མཁར་གྱང་བརྩིགས་པ་སན་པ་ལད་ཀྱིས་ཐོས་པ་དང་ཁོང་ཁྲོ་ལངས་ཏེ། ཞེ་སྡང་རབ་ཏུ་ལངས་ནས་ཡ་ཧུ་དཱ་པ་རྣམས་ལ་ཁྲེལ་དགོད་བྱས་སོ། །
[2] ཁོས་རང་གི་སྤུན་དང་སཱ་མར་ཡའི་དམག་དཔུང་ལ་འདི་ལྟར། ཡ་ཧུ་དཱ་པ་ཉམ་ཐག་འདི་རྣམས་ཀྱིས་ཅི་བྱེད་དམ། རང་ཉིད་ཀྱི་ཆེད་དུ་ཡང་བསྐྱར་བརྩིག་གམ། སྦྱིན་སྲེག་འབུལ་ལམ། ཉིན་གཅིག་ཏུ་འགྲུབ་བམ། མེས་བསྲེགས་པའི་རྡོ་ཕུང་ཡང་བསྐྱར་བཀོལ་བར་འགྱུར་རམ་ཅེས་སྨྲས།
[3] ཨམ་མོན་པ་ཏོ་བི་ཡཱ་ཁོའི་ཉེ་འགྲམ་དུ་བསྡད་དེ་འདི་ལྟར། དེ་དག་གིས་བརྩིགས་པའི་མཁར་རྡོའི་སྟེང་དུ་ཝ་མོ་ཞིག་འཛེག་ནའང་རྡོ་རྩིག་དེ་བཤིག་པར་འགྱུར་ཞེས་སྨྲས་སོ། །
[4] ཀྱེ། ངེད་ཀྱི་དཀོན་མཆོག་ལགས། ངེད་རྣམས་སྨད་པར་གྱུར་པས་གསན་དུ་གསོལ། དེ་དག་གི་འཕྱ་སྨོད་ནི་ཁོ་ཚོ་སོ་སོའི་མགོར་ཕོབ་ལ། བཙོན་དུ་ཁྲིད་པའི་གནས་སུ་གཞོམ་དུ་ཆུགས།
[5] དེ་དག་གིས་ཉམས་གསོ་མཛད་མཁན་གྱི་མདུན་དུ་ཁྱེད་ཉིད་ཐུགས་ཁྲོ་བར་བྱས་པས། དེ་དག་གི་སྡིག་པ་མི་སྦེད་ཅིང་། ཁྱེད་ཀྱི་སྤྱན་སྔར་དེ་དག་གི་སྡིག་པ་མི་བསལ་བར་མཛོད།
[6] དེ་ལྟར་ངེད་རྣམས་ཀྱིས་མཁར་གྱང་བརྩིགས་ཏེ་མཁར་གྱང་ཐམས་ཅད་མཐུད་ནས་མཐོ་ཚད་ཕྱེད་ཀར་བསླེབས་སོ། །དེ་ནི་འབངས་རྣམས་ཀྱིས་བློ་སེམས་གཅིག་མཐུན་གྱི་ངང་ནས་ལས་པའི་ཕྱིར་རོ། །
[7] སན་པ་ལད་དང་། ཏོ་བི་ཡཱ་དང་། ཨ་རབ་པ་དང་། ཨམ་མོན་པ་དང་ཨ་སི་དོད་པ་བཅས་ཀྱིས་ཡེ་རུ་སཱ་ལེམ་གྱི་མཁར་གྱང་ཉམས་གསོ་མཛད་ཀྱིན་པ་དང་། ཉམས་རྒུད་དུ་སོང་བའི་གནས་དེ་རྣམས་ཞིག་གསོ་བྱེད་འགོ་བརྩམས་པ་ཐོས་ནས་ཤིན་ཏུ་ཁྲོས་ཤིང་།
[8] ཐམས་ཅད་ཡེ་རུ་སཱ་ལེམ་ལ་འཐབ་ཏུ་འོངས་ནས་གྲོང་འདི་དཀྲུག་པར་ཁ་འཆམ་བྱུང་བ་ལ།
[9] ངེད་རྣམས་ཀྱིས་རང་གི་དཀོན་མཆོག་ལ་གསོལ་བ་བཏབ་ཅིང་། ཉིན་མཚན་མེད་པར་དེ་དག་གི་ཕྱིར་སོ་པ་བཞག་གོ །
[10] ཡང་ཡ་ཧུ་དཱ་པ་རྣམས་ཀྱིས་འདི་ལྟར། ཁལ་འཁུར་བའི་སྟོབས་ཤུགས་ཞན་ལ་རྡོ་རུལ་ནི་མང་བས། ངེད་རྣམས་ཀྱིས་མཁར་གྱང་བརྩིག་མི་ནུས་སོ་ཞེས་སྨྲས་ཤིང་།
[11] ངེད་རྣམས་ཀྱི་དགྲ་བོས་འདི་ལྟར་བཤད་པ་སྟེ། དེ་དག་གིས་མི་ཤེས་པ་དང་མི་མཐོང་བའི་སྐབས་སུ་ངེད་རྣམས་དེ་དག་གི་དཀྱིལ་དུ་ཕྱིན་ཏེ། དེ་དག་བསད་ནས་ལས་ཀ་དེ་མཚམས་གཅོད་དོ་ཞེས་པའོ། །
[12] དགྲ་དང་ཉེ་བར་གནས་པའི་ཡ་ཧུ་དཱ་པ་རྣམས་ཐེངས་བཅུར་ངེད་ཅག་གི་རྩར་འོངས་ནས་འདི་ལྟར། ཁྱོད་རྣམས་ངེས་པར་དུ་ང་ཚོའི་རྩར་ཕྱིར་ཡོང་དགོས་ཞེས་སྨྲས་པར།
[13] ངས་འབངས་མི་རྣམས་ནི་མཁར་གྱང་རྒྱབ་ཀྱི་གནས་དམའ་སར་རལ་གྲི་དང་། མདུང་དང་། མདའ་གཞུ་བཟུང་ནས། རང་རང་གི་རིགས་རྒྱུད་བཞིན་དུ་བཞག་པ་ཡིན།
[14] ངས་ཞིབ་ལྟ་བྱས་ཏེ། ཡར་ལངས་ནས་སྐུ་དྲག་དང་འགོ་གཙོ། འབངས་མི་རྣམས་ལ་འདི་ལྟར། དེ་དག་ལ་མ་འཇིགས་ཤིག གཙོ་བོ་དཀོན་མཆོག་ནི་ཆེན་པོ་དང་འཇིགས་སུ་རུང་བ་ལགས་པ་དེ་སེམས་ལ་ཟུངས་ཤིག རང་གི་སྤུན་ཟླ་དང་། བུ་དང་བུ་མོ་དང་། ཆུང་མ་དང་ཁྱིམ་ཚང་གི་ཆེད་དུ་འཐབ་འཛིང་བྱོས་ཤིག་ཅེས་སྨྲས་པ་ཡིན།
[15] དེ་ནས་དགྲ་བོས་ངེད་རྣམས་ཀྱིས་ཁོ་ཚོའི་བསམ་ཚུལ་ཤེས་ཟིན་པ་དང་། དཀོན་མཆོག་གིས་ཀྱང་ཁོ་ཚོའི་ངན་ཇུས་དེ་གཏོར་བ་ཐོས་ནས་འོང་མ་ཕོད་པས། ངེད་རྣམས་ཕྱིར་མཁར་གྱང་གི་ཕྱོགས་སུ་སོང་ནས་རང་ཉིད་ཀྱི་ལས་བསྒྲུབས་པའོ། །
[16] ཉིན་དེ་ནས་བཟུང་ངའི་གཡོག་པོ་ཕྱེད་ཀས་ལས་བྱེད་པ་དང་། ཕྱེད་ཀས་མདུང་དང་། མདའ་གཞུ་དང་། ཕུབ་བཅས་བཟུང་ཞིང་། གོ་ཁྲབ་གྱོན་ནས་བསྡད་དོ། །འགོ་གཙོ་རྣམས་ཡ་ཧུ་དཱའི་ཁྱིམ་རྒྱུད་ཡོངས་ཀྱི་རྒྱབ་སྐྱོར་དུ་ཡོད་པ་ཡིན།
[17] ཡ་ཧུ་དཱ་པ་རྣམས་ཀྱིས་མཁར་གྱང་བརྩིགས་པ་དང་། ཁུར་པོ་འཁུར་མཁན་ཐམས་ཅད་ཀྱིས་ལག་པ་ཡ་གཅིག་གིས་ལས་བྱས། ལག་པ་ཡ་གཅིག་གིས་མཚོན་ཆ་བཟུང་བ་ཡིན།
[18] རྩིག་མཁན་ཐམས་ཅད་ཀྱིས་རལ་གྲི་རྐེད་པར་བཏགས་ཏེ་བརྩིགས་སོ། །དུང་འབུད་མཁན་དེ་ངའི་རྩར་ཡོད་པ་ཡིན།
[19] དེར་ངས་སྐུ་དྲག་དང་། འགོ་གཙོ་དང་། འབངས་མི་རྣམས་ལ་འདི་ལྟར། ལས་བཟོ་འདི་རྒྱ་ཆེ་བ་དང་། ངེད་ཅག་མཁར་གྱང་སྟེང་ནས་ཕན་ཚུན་བར་རྒྱང་ཐག་རིང་བས།
[20] ཁྱོད་ཚོས་དུང་སྒྲ་ཐོས་མ་ཐག་ཏུ། ངེད་ཅག་གི་རྩར་འཛོམས་དགོས་ལ། བདག་ཅག་གི་དཀོན་མཆོག་གིས་ང་ཚོའི་དོན་དུ་འཐབ་འཛིང་བགྱིའོ་ཞེས་སྨྲས་པ་ཡིན།
[21] འདི་ལྟར་དུ་ངེད་ཀྱིས་ལས་ཀ་བྱས་ཤིང་། མི་ཕྱེད་ཀས་མདུང་བཟུང་སྟེ་ནམ་ལངས་པ་ནས་སྐར་མ་འཆར་བའི་བར་དུ་བསྡད་དོ། །
[22] སྐབས་དེར་ངས་འབངས་མི་རྣམས་ལ་འདི་ལྟར། མཚན་མོར་ངེད་ཀྱི་མེལ་ཚེ་བྱེད་པ་དང་། ཉིན་མོར་ལས་བྱེད་པའི་ཕྱིར། མི་རེ་རེ་ཁོའི་གཡོག་པོ་དང་བཅས་ཡེ་རུ་སཱ་ལེམ་དུ་ཞག་སྡོད་གྱིས་ཤིག་ཅེས་བསྒོས་སོ། །
[23] དེ་ལྟར་ང་རང་དང་ངའི་སྤུན་དང་གཡོག་པོ་དང་། ངའི་སྲུང་དམག་བཅས་ཀྱིས་རང་གི་གྱོན་པ་མ་ཕུད་པ་དང་། ཆུ་འཐུང་བའི་སྐབས་སུའང་རང་ཉིད་ཀྱི་མཚོན་ཆ་བཟུང་ཡོད་དོ། །