[1] ཀྱེ་ནིན་ཝེ་པ། ཡུལ་ཁམས་གཏོར་མཁན་ཡར་འོང་སྟེ་ཁྱོད་ལ་རྒོལ་བར་འགྱུར་བས། ཁྱོད་ཀྱིས་རྫོང་བཙན་པོ་བརྟན་པོར་བསྲུང་ཞིག་དང་། ལམ་གྱི་འགག་མདོ་ནན་འགོག་བྱས་ནས་ཁྱོད་ཀྱི་རྐེད་རགས་དམ་པོར་བཅིངས་ཏེ་ཁྱོད་ཀྱི་སྟོབས་ཤུགས་ཆེ་རུ་ཐོངས་ཤིག
[2] ཡིན་ཡང་། ཡེས་ར་ཨེལ་གྱི་གཟི་བརྗིད་བཞིན་དུ། གཙོ་བོ་ཡ་ཝཱེས་ཡ་ཀོབ་ཀྱི་གཟི་བརྗིད་ཡང་བསྐྱར་མངོན་པར་མཛད་ཅིང་། དེ་ཅིའི་ཕྱིར་ཞེ་ན། འཕྲོག་བཅོམ་བྱེད་མཁན་རྣམས་ཀྱིས་སྔོན་ན་དེ་དག་བཅོམ་ནས་སྟོངས་བར་གྱུར་ཏེ། ཡང་དེ་དག་གི་རྒུན་འབྲུམ་སྡོང་པོའི་ཡལ་ག་རྣམས་ཀྱང་བརླགས་པའི་ཕྱིར།
[3] དེའི་དཔའ་བོ་རྣམས་ཀྱི་ཕུབ་ནི་དམར་པོ་ཡིན་ཞིང་། དམག་མིས་གོས་མདོག་མཚལ་ཁ་གྱོན། དེས་ཕར་རྒོལ་བྱ་བར་གྲ་སྒྲིག་བྱེད་པའི་དུས་སུ། ཤིང་རྟའི་རྣོ་ལྕགས་རྣམས་མེ་ལྟར་འོད་ཆེམ་ཆེམ་བྱེད་ཅིང་། རྟ་དམག་རྣམས་མྱུར་དུ་རྒྱུག་བཞིན་འདུག་སྟེ།
[4] ཤིང་རྟ་རྣམས་ནི་སྲང་ལམ་དུ་ཧར་རྒྱུག་བྱེད་ཅིང་། ཐང་ཆེན་དུ་ཤར་རྒྱུག་ནུབ་རྒྱུག་བྱེད་པ་དང་། དེ་དག་ལ་བལྟས་ཚེ་དཔལ་འབར་བཞིན་དང་། རྒྱུག་དུས་གློག་འཁྱུག་པ་དང་འདྲའོ།།
[5] དེ་ནས་ཨ་སུར་རྒྱལ་པོས་ཁོང་གི་བདུད་བློན་རྣམས་བསྡུས་པ་ན། དེ་དག་འཁྱར་རེ་འཁྱོར་རེ་འོངས་ཤིང་། བྲེལ་འཚུབ་ཆེན་པོས་མཁར་བཙོན་པོར་འཛེགས་ཏེ། འགོག་སྲུང་བྱེད་པའི་མཚོན་རྟགས་ཡར་སྒྲེང་སྟེ།
[6] ཆུ་ལམ་འགག་སྒོ་ཐམས་ཅད་ཁ་འབྱེད་པ་དང་། ཕོ་བྲང་ཡང་བཤིག་པར་གྱུར།
[7] རྒྱལ་མོ་གཅེར་བུར་བཙོན་དུ་ཁྲིད་པ་དང་། མིའི་ཕོ་བྲང་གི་ཞལ་ཏ་མ་རྣམས་ངུ་བའི་སྒྲ་ནི་ཕུག་རོན་བཞིན་དུ། མི་རེ་རེས་བྲང་ཁོག་རྡུང་ཞིང་ངུ་ཤར་བརྒྱབ་ཏོ།།
[8] ཐོག་མ་ཉིད་ནས་བཟུང་སྟེ་ནིན་ཝེ་པ་ནི་ཆུ་རྫིང་ཞིག་དང་འདྲ་ཞིང་། རྫིང་བུ་ལས་ཆུ་བཞུར་བའི་རྒྱུན་མ་ཆད་པ་སྟེ། མི་ཡིས་སྐད་བརྒྱབ་སྟེ་ན་རེ། མཚམས་ཆོད་ཅིག མཚམས་ཆོད་ཅིག་ཅེས་ཟེར་ཡང་། ཕྱིར་ལོག་མཁན་མེད་དོ།།
[9] ཁྱོད་རྣམས་ཀྱིས་གསེར་དང་དངུལ་རྣམས་ཕྲོགས་ཤིག བསགས་དངུལ་རྫོགས་མཐའ་མེད་པ་དང་། དཀོན་པའི་ཡོ་བྱད་གྲངས་ལས་འདས་ཀྱང་།
[10] ད་ལྟ་སྟོང་ཞིང་། དབེན་སྟོང་དུ་གྱུར་ནས་གཅིག་ཀྱང་མ་ལུས་པས། མི་སེམས་འཚུབ་འཚུབ་དང་། པུས་མོ་གཉིས་འདར་ཏེ། ལུས་ཡོངས་གཟེར་ནས་གདོང་མདོག་ཤོར།
[11] སེང་གེའི་བྲག་ཕུག་གང་ན་ཡོད་དམ། སེང་ཕྲུག་གསོ་བའི་གནས་གང་ན་ཡོད་དམ། ཕོ་སེང་དང་མོ་སེང་། སེང་ཕྲུག་རྣམས་ལ་འཇིགས་སྐྲག་མི་ཐེབས་པར་དལ་བོར་སྡོད་ཆོག་པའི་གནས་ཡང་གང་ན་ཡོད་དམ།
[12] ཕོ་སེང་གིས་སེང་ཕྲུག་གི་ཕྱིར་དུ་འདང་བའི་ཁ་ཟས་ཕྲལ་བ་དང་། མོ་སེང་གི་ཆེད་དུ་གསོན་པོ་བསད་དེ། རང་གི་བྲག་ཕུག་ཏུ་རྔོན་དངོས་ཀྱིས་ཁེངས་ཤིང་། ཕྲལ་བར་གྱུར་བ་ཡིས་རང་གི་དོང་བཀང་བར་བཅུག
[13] དཔུང་ཚོགས་ཀྱི་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་ལ་རྒོལ་བར་འགྱུར་ཞིང་། ངས་ཁྱོད་ཀྱི་ཤིང་རྟ་རྣམས་བསྲེག་སྟེ་དུ་བར་བསྒྱུར་ལ། རལ་གྲི་ཡིས་ཁྱོད་ཀྱི་སེང་ཕྲུག་རྣམས་ཁྱུར་མིད་དུ་གཏོང་ཞིང་། ངས་ས་ནས་ཁྱོད་ཀྱི་རྔོན་དངོས་དག་མེད་པར་བཟོ་ཞིང་། ཁྱོད་ཀྱི་ཕོ་ཉའི་སྒྲ་ཡང་མི་ཡིས་ཡང་བསྐྱར་ཐོས་བར་མི་འགྱུར་རོ་ཞེས་གསུངས་སོ།།