[1] དེ་ནས་གཙོ་བོ་ཡ་ཝཱེས་ཨབ་རམ་ལ་འདི་སྐད༌དུ། ཁྱོད་ནི་རང་གི་ཕ་ཡུལ་དང་ཉེ༌འབྲེལ། ཕ་གཞིས་བཅས་དང་ཁ་བྲལ་ནས་བདག་གིས་ཁྱོད་ལ་སྟོན་པར་འགྱུར་བའི་ཡུལ་དེར་སོང༌ཞིག
[2] བདག་གིས་ཁྱོད་རྒྱལ་ཁབ་ཆེན་པོར་འགྱུར་བར་བྱེད་པ༌དང༌། བདག་གིས་ཁྱོད་ལ་བྱིན་གྱིས་བརླབས་ཏེ་ཁྱོད་སྙན་གྲགས་དང་ལྡན་པར་བྱེད༌པས། ཁྱོད་ཀྱིས་ཀྱང་མི་གཞན་ལ་བདེ་སྐྱིད་བསྐྲུན་ངེས༌ཡིན།
[3] ཁྱོད་ལ་བདེ་བ་སྐྲུན་མཁན་གང་ཞིག་ལ་བདག་གིས་ཀྱང་བྱིན་རླབས་གནང་བར༌བྱའོ། །ཁྱོད་ལ་སྡིགས་དམོད་བྱེད་མཁན་གང་ཞིག་ལ་བདག་གིས་ཀྱང་སྡིགས་དམོད༌བྱའོ། །ཡང་ས་སྟེང་གི་མི་རིགས་ཐམས་ཅད་ལ་ཁྱོད་རང་བརྒྱུད་ནས་བྱིན་རླབས་འཐོབ་པར་འགྱུར་ཞེས་གསུངས༌སོ།།
[4] དེ་ནས་ཨབ་རམ་ནི་གཙོ་བོ་ཡ་ཝཱེའི་བཀའ་ལྟར་ཕར་ཕྱིན༌ཅིང༌། ལོད་ཐུའང་ཨབ་རམ་དང་མཉམ་དུ་སོང༌ངོ༌། །ཨབ་རམ་ཞེས་བྱ་བ་ཧཱ་རན་གྲོང་ཁྱེར་ནས་འགྲོ་དུས་དགུང་ལོ་བདུན་ཅུ་དོན་ལྔ་ཡིན༌ནོ།།
[5] ཨབ་རམ་གྱིས་ཁོང་གི་ཆུང་མ་སཱ་ར་ཡུ་དང་ཚ་བོ་ལོད་ཐུ་ཁྲིད༌དེ། ཁོ་རྣམས་ཀྱིས་ཧཱ་རན་དུ་གསོག་པའི་རྒྱུ་ནོར་དང་མི་རྣམས་དང་བཅས་པ་ཀ་ན་ཨན་ཡུལ་དུ་ཆས་ཤིང་ཡུལ་དེར་སླེབས༌སོ།།
[6] ཨབ་རམ་ཡུལ་དེ་བརྒྱུད་ནས་སི་ཀེམ་ཡུལ་གྱི་མོར་རེའེ་ཡི་བེ་ཤིང་རྩར་སླེབས་པ༌དང༌། དུས་དེར་ཀ་ན་ཨན་གྱི་མི་རྣམས་ཀྱང་ཡུལ་དེར་བསྡད་ཡོད༌དོ།།
[7] དེ་ནས་གཙོ་བོ་ཡ་ཝཱེས་ཨབ་རམ་ལ་མངོན་པར་མཛད་དེ་འདི་སྐད༌དུ། བདག་གིས་ཡུལ་འདི་ཁྱོད་ཀྱི་རིགས་རྒྱུད་ཕྱི་མ་རྣམས་ལ་སྦྱིན་པར་བྱའོ་ཞེས་གསུངས༌པས། ཨབ་རམ་གྱིས་ཡུལ་དེ་ནས་རང་ལ་མངོན་པར་མཛད་པའི་གཙོ་བོ་ཡ་ཝཱེ་ལ་མཆོད་ཁྲི་ཞིག༌བཞེངས།
[8] ཡང་ཨབ་རམ་ཡུལ་དེ་ནས་པེད་ཨེལ་གྱི་ཤར་ཕྱོགས་སུ་ཡོད་པའི་རི་བོའི་གནས་སུ་སྤར་ཏེ་སྦྲ་གུར་ཕུབ་པར་མཛད༌དོ། །ཡུལ་དེའི་ནུབ་ཕྱོགས་ནི་པེད་ཨེལ་དང་ཤར་ཕྱོགས་ནི་ཨེ་ཡུ་གཉིས༌སོ། །ཡང་ཁོང་གིས་ཡུལ་དེ་ནས་གཙོ་བོ་ཡ་ཝཱེ་ལ་མཆོད་ཁྲི་ཞིག་བཞེངས་ཏེ་ཁོང་གི་མཚན་ལ་ཞུ་བ༌ཞུས།
[9] ཕྱིས་སུ་ཨབ་རམ་ཡང་རིམ་གྱིས་ནེ་གུབ་ཡུལ་ཕྱོགས་སུ་གནས་སྤར༌ཏོ།།
[10] དེ་ཡང་ཀ་ན་ཨན་ཡུལ་དུ་མུ་གེ་ཤིན་ཏུ་ཆེན་པོ་བྱུང༌བས། ཨབ་རམ་འཁོར་དང་བཅས་པ་གནས་སྐབས་སུ་སྡོད་པའི་ཕྱིར་མར་ཨེ་ཅིབ་ཡུལ་དུ་སོང་བ༌དང༌།
[11] ཨེ་ཅིབ་ཡུལ་དུ་བསླེབ་ལ་ཉེ་བ༌ན། ཁོས་རང་གི་ཆུང་མ་སཱ་ར་ཡུ་ལ་འདི༌ལྟར། ཉོན༌དང༌། བདག་གིས་ཁྱོད་ནི་མཛེས་ཤིང་སྡུག་པའི་བུད་མེད་ཅིག་ཡིན་པ་ཤེས༌སོ།།
[12] ཨེ་ཅིབ་ཀྱི་མི་རྣམས་ཀྱིས་ཁྱོད་རང་མཐོང་བ༌ན། འདི་ནི་ཁོའི་ཆུང་མ་ཡིན་ཞེས་སྨྲ་ངེས༌ཤིང༌། དེ་དག་གིས་ང་རང་གསོད་པར་འགྱུར་ཡང་ཁྱོད་ནི་གསོན་པར་བྱེད༌དོ།།
[13] དེའི༌ཕྱིར། ཁྱོད་ནི་བདག་གི་སྲིང་མོ་ཡིན་ཞེས་སྨྲ་བར༌མཛོད། ཅིའི་ཕྱིར་ཞེ༌ན། ང་རང་ཁྱོད་ལ་བརྟེན་ནས་བདེ་བར་གནས༌ཤིང༌། ངའི་ཚེ་སྲོག་ཀྱང་ཁྱོད་ལ་བརྟེན་ནས་གསོན་ཐུབ་པའི་ཕྱིར་ཡིན་ཞེས་སྨྲས༌སོ།།
[14] དེ་ནས་ཨབ་རམ་འཁོར་དང་བཅས་པ་ཨེ་ཅིབ་ཡུལ་དུ་ཐོན་པ༌དང༌། ཨེ་ཅིབ་ཀྱི་མི་རྣམས་ཀྱིས་བུད་མེད་དེ་ཤིན་ཏུ་མཛེས་པར་མཐོང༌ཞིང༌།
[15] རྒྱལ་པོ་ཕཱར་ཨོལ་གྱི་བློན་ཆེན་རྣམས་ཀྱིས་བུད་མེད་མཛེས་མ་དེ་མཐོང་ཞིང་ཁོའི་མདུན་དུ་བསྟོད་བསྔགས་བྱས༌པས། བུད་མེད་དེའང་རྒྱལ་པོའི་ཕོ་བྲང་དུ་ཁྲིད༌དོ།།
[16] རྒྱལ་པོས་བུད་མེད་དེའི་དབང་གིས་ཨབ་རམ་ལ་སྣེ་ལེན་རྒྱ་ཆེན་པོ་མཛད༌ཅིང༌། ཁོང་ལ་ར་ལུག༌དང༌། བ༌གླང༌། རྔ༌མོང༌། བོང༌གསེབ། བོང༌མ། གཡོག་པོ་དང་གཡོག་མོ་རྣམས་ཀྱང་ཐོབ༌བོ།།
[17] དེ་ནས་གཙོ་བོ་ཡ་ཝཱེས་ཨབ་རམ་གྱི་ཆུང་མ་སཱ་ར་ཡུའི་དོན་རྐྱེན་གྱི་དབང་གིས་ཕཱར་ཨོལ་དང་ཁོའི་ཁྱིམ་མི་ཡོངས་ལ་སྡུག་བསྔལ་ཆེན་པོ་ཕོག་པར་མཛད༌ཅིང༌།
[18] ཕཱར་ཨོལ་གྱིས་ཨབ་རམ་བོས་ཏེ་ན༌རེ། ཁྱོད་ཀྱིས་བདག་ལ་ཅི་བྱས༌སམ། བུད་མེད་དེ་ཁྱོད་ཀྱི་ཆུང་མ་ཡིན་ཞེས་མི་སྨྲ་བའི་རྒྱུ་མཚན༌ཅི།
[19] བུད་མེད་དེ་ཁྱོད་ཀྱི་སྲིང་མོ་ཡིན་ཞེས་སྨྲས༌ཏེ། ཁོ་མོ་བདག་གི་ཆུང་མར་ལེན་དུ་འཇུག་དོན༌ཅི། ད་ལྟ་ཁྱོད་ཀྱི་ཆུང་མ་འདི་ན་ཡོད་པས་ཁྱོད་ཀྱིས་ཕྱིར་ཁྲིད་ཅིག་ཅེས་སྨྲས༌སོ།།
[20] དེ་ནས་ཕཱར་ཨོལ་གྱིས་རང་གི་མི་རྣམས་ལ་བཀའ་བསྒོས༌ཏེ། ཨབ་རམ་དང་ཁོའི་ཆུང༌མ། ད་དུང་ཁོ་ལ་དབང་བ་ཐམས་ཅད་ཀྱང་ཕྱིར་བསྐྱལ༌ཏོ།།