[1] དཀོན་མཆོག་གིས་བཀའ་འདི་ཐམས་ཅད་གསུངས་ནས་འདི་སྐད་དུ།
[2] ང་རང་ཁྱོད་ཅག་གི་དཀོན་མཆོག་ཡ་ཝཱེ་ཡིན་ཞིང་། ཁྱོད་རྣམས་ཨེ་ཅིབ་ཡུལ་གྱི་བྲན་དུ་བཀོལ་བའི་གནས་ནས་ཁྲིད་མཁན་ཡང་ཡིན་ནོ། །
[3] ང་རང་མ་གཏོགས་པའི་དཀོན་མཆོག་གཞན་ཞིག་ཁྱོད་ལ་ཡོད་མི་ཆོག
[4] ཁྱོད་ཀྱིས་རང་ཉིད་ལ་སྐུ་འདྲ་དང་། སྟེང་གི་ནམ་མཁའ་འམ། འོག་གི་སའམ། ས་འོག་གི་ཆུ་ལ་ཡོད་པའི་སེམས་ཅན་གྱི་གཟུགས་བརྙན་གང་ཡང་མ་བཟོ།
[5] དེ་དག་ལ་ཕྱག་མ་འཚལ། བསྙེན་བཀུར་ཡང་མ་བྱེད། གང་ལ་ཟེར་ན། ཁྱོད་ཀྱི་དཀོན་མཆོག་ཡ་ཝཱེ་ང་རང་ནི་ཕྲག་དོག་ཅན་ཞིག་ཡིན་ཏེ། ཕ་རྣམས་ཀྱི་ནག་ཉེས་ཕྱིར་མི་རབས་གསུམ་མམ་བཞིའི་བར་དུ་ང་རང་ལ་སྡང་མཁན་ཀྱི་བུ་ཕྲུག་རྣམས་ལ་བཀའ་ཆད་གཅོད་མོད།
[6] འོན་ཀྱང་ང་རང་གཅེས་སུ་འཛིན་པ་དང་བདག་གི་བཀའ་སྲུང་མཁན་རྣམས་ལ་མི་སྟོང་ཕྲག་གི་བར་དུ་ཐུགས་བརྩེ་བར་བྱེད་དོ། །
[7] ཁྱོད་ཀྱི་དཀོན་མཆོག་ཡ་ཝཱེའི་མཚན་གང་བྱུང་དུ་མ་སྤྱོད། ཅི་ལ་ཞེ་ན། སུ་ཞིག་གིས་ཁོང་གི་མཚན་གང་བྱུང་དུ་སྤྱད་ན་གཙོ་བོ་ཡ་ཝཱེས་མི་དེ་ཉེས་མེད་དུ་རྩི་བར་མི་འགྱུར་རོ། །
[8] ངལ་གསོ་བའི་ཉིན་མོ་དྲན་ནས་དེ་དམ་པར་སྲུངས་ཤིག
[9] ཉིན་དྲུག་གི་རིང་ལ་འབད་ཅིང་རང་གི་ལས་ཀ་ཚང་མ་སྒྲུབ་རུང་བ་ཡིན།
[10] འོན་ཀྱང་ཉིན་བདུན་པ་ནི་ཁྱོད་ཀྱི་དཀོན་མཆོག་ཡ་ཝཱེའི་ངལ་གསོ་བའི་ཉིན་མོ་ཡིན་པས། ཉིན་མོ་དེ་ལ་ཁྱོད་དང་ཁྱོད་ཀྱི་བུ་དང་བུ་མོ། གཡོག་པོ་དང་གཡོག་མོ། སྒོ་ཕྱུགས། རྒྱ་སྒོ་ནང་རོལ་ལ་གནས་པའི་བྱེས་པ་བཅས་ཀྱིས་ལས་ཀ་གང་ཡང་མ་བྱེད་ཅིག
[11] ཅིའི་ཕྱིར་ཞེ་ན། ཉིན་དྲུག་གི་རིང་ལ་གཙོ་བོ་ཡ་ཝཱེས་ནམ་མཁའ་དང་ས་གཞི་དང་རྒྱ་མཚོ་དང་དེ་དག་གི་ནང་དུ་ཡོད་པ་ཐམས་ཅད་བཀོད་ནས། ཉིན་བདུན་པ་ལ་ངལ་གསོས་པའོ། །དེའི་ཕྱིར་གཙོ་བོ་ཡ་ཝཱེས་ངལ་གསོ་བའི་ཉིན་མོ་དེ་ལ་བྱིན་གྱིས་བརླབས་ནས་དམ་པར་མཛད་དོ། །
[12] ཁྱོད་ཀྱི་དཀོན་མཆོག་ཡ་ཝཱེས་ཁྱོད་རྣམས་ལ་གནང་བྱའི་ཡུལ་དེ་རུ་ཚེ་ཐག་རིང་པོར་གནས་ཐུབ་པའི་ཕྱིར། རང་གི་ཕ་མ་གཉིས་ལ་བཀུར་སྟི་བྱེད་དགོས།
[13] མི་མ་གསོད།
[14] ལོག་གཡེམ་མ་བྱེད།
[15] རྐུ་མ་བྱེད།
[16] རང་གི་ཁྱིམ་མཚེས་ལ་རྫུན་གྱི་དཔང་པོ་མ་བྱེད།
[17] གཞན་གྱི་ཁང་པ་ལ་འདོད་ཧམ་མ་བཅང་། གཞན་གྱི་ཆུང་མ་དང་། གཡོག་པོ་དང་། གཡོག་མོ་དང་། བ་གླང་དང་། བོང་བུ་དང་། དེ་ལྟར་མི་གཞན་གྱི་ཡིན་ཚད་གང་ལའང་འདོད་ཧམ་མ་བཅང་ཞེས་གསུངས་སོ། །
[18] མི་རྒྱུད་ཐམས་ཅད་ཀྱིས་འབྲུག་སྒྲ་ལྡིར་བ་དང་གློག་དམར་འཁྱུག་པ། རྭ་དུང་གི་སྐད་དང་རི་ལས་དུ་བ་འཕྱུར་བ་བཅས་མཐོང་བས། ཁོ་རྣམས་སྔངས་འདར་དང་བཅས་རྒྱང་རིང་ནས་ལངས་བསྡད་ཅིང་།
[19] མོ་ཤེ་ལ་འདི་ལྟར། ཁྱེད་ཀྱིས་ངེད་ཅག་ལ་གཏམ་སྨྲ་བར་མཛོད་དང་ངེད་ཅག་གིས་མཉན་པར་བྱའོ། །འོན་ཀྱང་ངེད་རྣམས་འཆི་བར་མི་འགྱུར་བའི་ཕྱིར། དཀོན་མཆོག་གིས་ངེད་ཅག་ལ་གསུང་འབྱོན་པར་མི་བྱའོ་ཞེས་སྨྲས།
[20] མོ་ཤེ་ཡིས་མི་རྒྱུད་ལ། མ་འཇིགས་ཤིག རྒྱུ་མཚན་ནི་དཀོན་མཆོག་ཁྱོད་རྣམས་ལ་བརྟག་པར་ཕེབས་པ་སྟེ། ཁྱོད་རྣམས་ཁོང་ལ་གུས་ཤིང་འཇིགས་པ་དང་སྡིག་པའང་མི་བྱེད་པའི་ཕྱིར་ཡིན་ཞེས་སྨྲས།
[21] དེ་ལྟར་མི་རྒྱུད་རྒྱང་རིང་ནས་ལངས་བསྡད་པ་དང་། མོ་ཤེ་དཀོན་མཆོག་བཞུགས་ཡོད་པའི་མུན་པ་སྟུག་པོའི་ཉེ་སར་བཅར་ཏོ། །
[22] དེ་ནས་གཙོ་བོ་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲོས་དང་། བདག་གིས་ནམ་མཁའི་ཞིང་ཁམས་ནས་ཁྱོད་ཅག་ལ་གཏམ་སྨྲས་པ་ཁྱོད་རྣམས་ཀྱིས་མཐོང་བ་ཡིན།
[23] ཁྱོད་ཅག་གིས་ང་ཡི་དོ་ཟླར་ཅིའང་བཟོ་མི་རུང་སྟེ། རང་ཉིད་ཀྱི་ཆེད་དུ་དངུལ་གྱི་སྐུ་བརྙན་ནམ་གསེར་གྱི་སྐུ་བརྙན་གང་ཡང་བཟོ་མི་རུང་།
[24] ངའི་ཆེད་དུ་ས་ཡི་མཆོད་ཁྲི་ཞིག་བཟོ་བར་གྱིས་ལ། དེའི་སྟེང་དུ་ཁྱོད་ཅག་གི་སྦྱིན་སྲེག་དང་། ཞི་བདེའི་མཆོད་པ་རྣམས་དང་། ར་ལུག་དང་བ་གླང་གི་མཆོད་པ་དབུལ་དགོས། ངས་རང་གི་མིང་དྲན་འཇུག་པའི་གནས་གང་དང་གང་དུ་ང་རང་ཁྱོད་ཅག་གི་གམ་དུ་འོངས་ཏེ་ཁྱོད་ཅག་ལ་བྱིན་རླབས་གནང་བར་འགྱུར།
[25] ཡང་གལ་ཏེ་ངའི་ཕྱིར་རྡོ་ཡི་མཆོད་ཁྲི་ཞིག་བཟོ་བར་བྱེད་ན། མ་བཅོས་པའི་རྡོ་རྣམས་ལས་བཟོ་བར་གྱིས། རྒྱུ་མཚན་ནི་ཁྱོད་རྣམས་ཀྱིས་དེའི་སྟེང་དུ་བཟོ་བྱེད་བཀོལ་ན་མཆོད་ཁྲི་མི་གཙང་བར་བྱེད་པས་སོ། །
[26] ཡང་ཁྱོད་རྣམས་ཀྱི་ཁོག་སྨད་གཅེར་བུར་མི་འབུད་པའི་ཕྱིར། ཁྱོད་རྣམས་ཐེམ་སྐས་ཀྱི་སྟེང་ནས་བདག་གི་མཆོད་ཁྲི་སྟེང་དུ་མ་འགོ་ཞིག་ཅེས་གསུངས་སོ། །