(General News) ၵူၼ်းၵျွၵ်ႉမႄး သီႇပေႃႉ မုင်ႈမွင်း ႁႂ်ႈသဵၼ်ႈတၢင်းၸဵဝ်းပိုတ်ႇ တႃႇႁႂ်ႈႁႃၵိၼ်လဵင်ႉတွင်ႉငၢႆႈ
Shan Herald Agency for News (SHAN)
ၵူၼ်းၵျွၵ်ႉမႄး သီႇပေႃႉ မုင်ႈမွင်း ႁႂ်ႈသဵၼ်ႈတၢင်းၸဵဝ်းပိုတ်ႇ တႃႇႁႂ်ႈႁႃၵိၼ်လဵင်ႉတွင်ႉငၢႆႈ
ၽူႈတွႆႇႁွၵ်ႈ ၊ ၸၢႆးသႂ်ၸိုၼ်ႈမိူင်း
ဝၢၼ်ႈမိူင်းသုၵ်ႉယုင်ႈဢူၼ်ႈၵဝ်း ၽူႈၼမ်းၵၢၼ်မိူင်းၵၢၼ်သိုၵ်းၵေႃႉလႂ် ပဵၼ်တီႈပိုင်ႈ ပဵၼ်တီႈၸႂ်ယႂ်ႇၼႆၼၼ်ႉ ၵူၼ်းမိူင်း ဢမ်ႇၸၢင်ႈႁတ်းလၢတ်ႈလႆႈၵမ်းသိုဝ်ႈ ။ ပၢင်တိုၵ်း ပဵၼ်ၼိုင်ႈၵမ်းၵေႃႈ ၵူၼ်းမိူင်းၵူၺ်း ဢၼ်လူႉဢၼ်သုမ်း။
ၽွၼ်းပၢင်ႈမၼ်းလႆႈသင်တႄႉတႄႉ ၵူၼ်းမိူင်းပေႃးဝူၼ်ႉၵႂင် ။ သိုၵ်းၸုမ်းလႂ်ၵေႃႈ ဢမ်ႇပိူင်းၼႄလႆႈဝႃႈ ပဵၼ်တီႈၸႂ်ယႂ်ႇၵူၼ်းမိူင်း ။ ၵွမ်ႉၵူၺ်း ႁိမ်ၸိင်းဢႃႇၼႃႇၵၼ် ႁိမ်ၸိင်းၼႃႈတီႈၵၼ်သေ ဢဝ်ၵူၼ်းမိူင်း သုမ်းသၢႆၸႂ် သုမ်းတီႈယူႇတၼ်းသဝ်း သုမ်းၵူႈၸိူဝ်ႉၵူႈလွင်ႈၼႂ်းၸၢတ်ႈပၢၼ် ။
မိူဝ်ႈလဵဝ် သီႇပေႃႉ ၵျွၵ်ႉမႄး ၸိူဝ်းၼႆႉ ပၢင်တိုၵ်းတႄႉယဵၼ်ယဝ်ႉသေတႃႉ ယွၼ်ႉၸုမ်းသိုၵ်းဢၼ်ၶဝ်ႈၵုမ်းမၼ်း လၢႆႈၵႂႃႇလၢႆႈမႃးလႄႈ ထိုင်မိူဝ်ႈလဵဝ် ၵူၼ်းမိူင်းတိုၵ်ႉသုၵ်ႉၸႂ် ၊ ႁဵတ်းႁႃၵိၼ်ယၢပ်ႇ ၊ ၵႂႃႇမႃး ဢမ်ႇထၢင်ႇႁၢင်ႈ လႆႈၵူဝ်လႆႈမႆႈ။ ၵူၼ်းပိုၼ်ႉတီႈ မုင်ႈမွင်း ၶႂ်ႈႁႂ်ႈဝၢၼ်ႈမိူင်းၸဵဝ်းပိုတ်ႇပၢင်ႇ ၸဵဝ်းၵတ်းယဵၼ် ၶႂ်ႈၸဵဝ်းလွတ်ႈၶဵၼ်ၼႃႇယဝ်ႉဝႃႈၼႆ။ လွင်ႈၼႆႉ ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ။
#podcast
#shannews