Ko honɗum ɗee kawanɗe liddu sosiyeteeji Mali waawi battinde e faggudu leydi ndin

Tedduuɓe heɗiiɓe rfi fulfulde, on calminaama. Bisimilla mon e yeewtere Faggudu e Ɓamtaare Afrik, hannde yeewtere nde ina nawra en to Mali. So on ciftori e ɗii dumunnaaji ɓennuɗi fof, njannguuji limlimtiinɗi mbaɗi faade e entreprisaaji Mali, ɗum waɗi ko bannge hirnaage leydi ndii e nder ɗii lebbi ɗiɗi paltiiɗe. Yanti hen kadi, ɓee kuliyankooɓe JNIM hollitnooɓe wadde
ɗiin njannguuji, ina mbaɗa kadi njannguuji faade lappi mobilaaji naawooji carburant e nder Mali. Ɓee kuliyankooɓe kolliti woni anniya maɓɓe ko wadde uddere fagguduyankoore faade e Mali. E nder ɗum holko ɗii njannguuji mbawi battinde to bannge faggudu. Koɗo men e ndee yeewtere ko Yaya Barry, fagguduyanke. Tedduɓe, bisimilla mon e ndee yeewtere.