DW | Amharic - News

በኢትዮጵያ፣ በኤርትራና በትግራይ ክልል ዳግም "ተባብሷል" ያለው "ውጥረት" በቀጣናው ሌላ አውዳሚ ጦርነት ሊያስከትል ይችላል የሚል ሥጋት መፍጠሩን ዓለምአቀፍ ክራይስስ ግሩፕ የተባለው ድርጅት አሳሰበ። ድርጅቱ ተደማጭነት ያላቸው የአፍሪካ መንግሥታት በአፍሪካ ቀንድ ፍላጎት ካላቸው የውጭ ኃይሎች ጋር ፣ ሰላማዊ የዲፕሎማሲ ጥረት ማድረግ አለባቸው።

1.4 ቢሊዮን ግድም ነዋሪዎች ባሏት አፍሪቃ ሲሦው ወጣት ነው ። የአፍሪቃ ወጣቶች የአፍሪቃ ኅብረት የአብዛኞቻችንን ፍላጎት አላሟላም ሲሉ በተደጋጋሚ ይናገራሉ። ኅብረቱ ወጣቶቹ ላይ የተከሰተውን ቀውስ መፍታት ተስኖታል ሲሉ ይተቹታል ባለሞያዎች ። ሙሉ ዘገባውን በማገናኛው መከታተል ይችላል ።

የኢትዮጵያ ንግድ ባንኮች የብር የውጭ ምንዛሪ ከትይዩ ገቢያውና ከውጭ ምንዛሪ ቢሮዎች ጋር ልዩነቱ እየሰፋ መምጣቱ እየተስተዋለ ነው፡፡ ባለሙያዎች እንደሚሉት መንግስት ከውጭ ምንዛሪ አኳያ ተፈላጊውን የምንዛሪ መረጋጋት ለማስፈን በፖሊሲ አማራጮች እየወሰዳቸው ያሉ እርምጃዎች ከወደመጠናቀቅ እየተጠጋ ይገኛል፡፡

እናት ፓርቲ ትብብር ለኢትዮጵያ አንድነት በአጭሩ "ለኢትዮጵያ" ወደተባለው የአራት ፓርቲዎች ቅንጅት መመለሱን ገለጠ።ከአምስቱ የቅንጅቱ መስራች ፓርቲዎች ሌላኛው በፈቃዱ ወጥቷል፤የፖለቲካ ድርጅቱ ፓርቲዎችን ላሰባሰበው ቅንጅት ምስረታ ያቀረበው ጉባኤ ያልተሟላና ከአባላት ቀረበ በተባለ ተቃውሞ ምክንያት ነበር ምርጫ ቦርድ ከቅንጅቱ ተሰርዞ የቆየው።

በአማራ ክልል በ1,330 ትምህርት ቤቶች የሚደረገዉ የተማሪዎች ምገባ፣ ከ 318 ሺህ በላይ ተማሪዎችን ተጠቃሚ በማድረግ የትምህርት ጥራትንና የተማሪዎችን ጤና እያሻሻለ መሆኑ ተነገረ። በኮምቦልቻ ከተማና በሰሜን ወሎ ዞኖች የተገኘው ተሞክሮ እንደሚያሳየው፣ ምገባው ከተጀመረ ወዲህ ተማሪዎች ትምህርት የማቋረጥና የማርፈድ ችግራቸው ቀንሷል።

በኢትዮጵያ ነዳጅን መንግስት ከተመነው መደበኛ ዋጋ ውጭ የሚሸጡ ማደያዎች በእለት ተእለት ስራዎቻቸው ላይ ፈተና መደቀናቸውን አሽከርካሪዎች እና የተሽከርካሪ ባለንብረቶች ይገልጻሉ፡፡ እንደ አስተያየት ሰጪዎቹ በዚህ ከተመን በላይ ክፍያ በሚጠየቅባቸው በተለያዩ የአገሪቱ ክፍል በሚገኙ ማደያዎች ጋር በሚፈጠር ንትርክ አንዳንዴ ስራቸው ይስተጓጎላልም፡፡

ሀገራዊ ምክክር ኮሚሽኑ የትግራይ ክልልን አጀንዳ የማሰባሰብ ሥራ አዲስ አበባ ውስጥ ለማድረግ አማራጭ ሐሳብ አቅርቧል። ኮሚሽኑ በክልሉ ያለው "የተሳታፊ ልየታ ተግባር ባለመከናወኑ" እዚህ ውሳኔ ላይ መድረሱን ገልጧል።የፖለቲካ ፓርቲና የሲቪክ ድርጅቶች ውሳኔውን በዐወንታ አልተመለከቱትም። ሆኖም ሥራው ጭራሽ ከሚቀር በሚል እቅዱን የደገፉ አሉ።

በኢትዮጵያ ሌላ ጦርነት ሲያዣብብ በትግራይ ክልል የነዳጅ ምርቶች፣ ጤፍ እና ዘይትን ጨምሮ የምግብ ግብዓቶች በአንድ ሳምንት የዋጋ ጭማሪ ታይቶባቸዋል። በክልሉ ከኤቲኤም ገንዘብ ማግኘት አይቻልም። ባንኮች ደንበኞቻቸው ወጪ የሚያደርጉትን የገንዘብ መጠን ገድበዋል። ለንግድ እና አገልግሎቶች ክፍያ የሚፈጸመው በሞባይል የገንዘብ ማዘዋወሪያዎች ሆኗል።

የኢትዮጵያ ፌደራል መንግሥት ወታደሮች እና የትግራይ ኃይሎች በትግራይ ክልል ድንበሮች ላይ ተከማችተዋል ሲል የፈረንሳዩ የዜና አገልግሎት ዘግቧል። ዶቼ ቬለ ያነጋገራቸዉ የትግራይ ፖለቲካ ተንታኞች እንደሚሉት በትግራይ ወጥረቱ አይሏል። በትግራይ ድንበሮች ላይ ወታደራዊ እንቅስቃሴ አለ፤ ሕዝቡ ሰላሙ እንዲጠበቅ አስፈላጊዉን ጫና ማድረግ ይገባዋል።

ህዝባዊ ወያኔ ሓርነት ትግራይ ህወሓት የአፍሪካ ህብረት በሰሜን ኢትዮጵያው ትግራይ ክልል እየከፋ ለመጣው ውጥረት ትኩረት ሰጥቶ እልባት እንዲያበጅ ጠየቀ፡፡ህወሓት ትናንት ሓሙስ የካቲት 05 ቀን 2018 ዓ.ም. ለህብረቱ ሊቀመንበርና አባላቱ በላከው ግልጽ ደብዳቤ የፕሪቶሪያው ስምምነት በአስቸኳይ እንዲተገበር ጠይቋል፡፡