[1] แย้ จ เก คู เก แน่. ไละ อี้ง จ กวิ้ เอะ โพล้ง มืง พี่ กแช่ แยว้ ลึ นี่-อ้ะ ล แฌ้ นอ ดี๊ กเย่ อ พู อ ลี้ง พี่ จ เอ-อ้ะ เต้~ๆ ล เมะ ที่ แย้ แบ แบ เด้าะ โพล้ง กุ้ อ แฌ้ พี่ อ ซีงแฌ๊ ท อ ที๊ง อ โต้ นอ เอ-อ้ะ ปะ.
[2] พี่ ก เอ น ซื๊ง บี่ อี้ง นอ เมะ เว๊ ท อ ที๊ง อ โต้ โอ ลู่ง ก ซ้ะ พ้า ดี๊ ม โอ ดี๊ เฆ้อ ล้างชู้ ล้างแกย.
[3] ลู่ง ก ซีงแฌ๊ ท อ ที๊ง อ โต้ ดี๊ ก เอ โละ กวี้ง โละ ก ซ้ะ อ กย้อง นอ แพ่ กแช่ แยว้ ดี๊ อ พูแคว๊ กแช่ เยซู คริ้ อ โก้ง อ โบ้ง อ บลึ้ อ บลาง อ ท ย๊างเซิง ย๊างซ้ะ ดี๊ อ ท มึ ท พ้า ม โอ ดี๊ เฆ้อ ล้อ.
[4] จ เซิง มึ ซ้ะ มึ เต้~ๆ พี่ จ แด น พู แบ ล แฌ้~ๆ แม้ โพะ ท อ ที๊ง อ โต้ อ ไค๊ บี่ ซุ้ ดี๊ แพ่ แยว้ อางแม้เลา เอะ เฆ้อ เย้า.
[5] กมืง-เอ้อ ค๊องเนง อี้ง จ อวีงซ้ะชู้ เกม๊า ก เอ โละ กวี้ง โละ ก ซ้ะ. อ นอ ล เมะ จ กวิ้ ทาง เอะ แน้ ท อางแม้เลา อ ซ๊าง แบ แบ เด้าะ เก ท อางแม้เลา พี่ ก ซีงแฌ๊ แบ-อ้ะ ลู่ง อ ต้องคู เย้า.
[6] ท เอ ท กวี้ง อี้ง นอ เมะ เว๊ พี่ ก แม้ โพะ กแช่ แยว้ อ ท อางแม้เลา อ ไค๊. ท อางแม้เลา พี่ น ซื๊ง แน่ฌ๊า แบ-อ้ะ ลู่ง อ ต้องคู เย้า นอ โล้ เท่อ บี่ อี้ง เกม๊า ก เอ โละ กวี้ง โละ ซ้ะ.
[7] โพล้ง อางโล๊ อางเว้ง เท่อ โอ แอ ฌ้อง ไจ เว้งว้าง ลู่ง ฌางคู โคล๊ง คู อี้ง. โพล้ง ล แพ นอ ล นะ เว๊ แบ พี่ กแช่ เยซู คริ้ เฌ๊ ล้าง กึ ทาง เก กโพล้ง. โพล้ง ล เอ้า แย๊ นอ เก โพล้ง อางโล๊ อางเว้ง เท่อ ดี๊ เก โพล้ง แช๊เมะ ไฌ๊ซ้ะ ดี๊ คริ้ ล้อ.
[8] ปโล่ ล้าง น ซื๊ง ซ้ะ เมะ ฌี้ ไช้ะ บี่ ซุ้ เท่อ พี่ ก แม้-อ้ะ เย้า นอ ล ล้างแม่ แด น ซื๊ง แบ แบ เด้าะ น ม นี่ แบ ท อ บลึ้ อ บลาง ล๊า~ๆ ฆวี้~ๆ ล โค๊ ล้อ.
[9] โพล้ง พี่ ล แม้ โพะ กแช่ เยซู คริ้ อ ท ซอง ท ซ๊าง อ ไค๊ แบ แบ เด้าะ แม้ พะ ไฆวะ เว๊ น้ะ กชุ้ นอ กแช่ แยว้ ล โอ ดี๊-อ้ะ แบ. เมะ โพล้ง พี่ อ แม้ โพะ กแช่ เยซู คริ้ อ ท ซอง ท ซ๊าง อ ไค๊ นอ แพ่ แยว้ ดี๊ อ พูแคว๊ โอ ดี๊-อ้ะ ล้อ.
[10] โพล้ง ซอง เท่อ พี่ อ เฌ๊ ฌู น ซื๊ง เมะ ล ซอง กแช่ เยซู คริ้ อ ท ซอง ท ซ๊าง อี้ง แบ นอ กุ้ ทาง-อ้ะ ลู่ง น เด้า พ้า ล ฌี้ ดี๊ ไคล้เดิง ไคล้ดุ้-อ้ะ ล ฌี้.
[11] อ ไฌ่ บี่ อี้ง โพล้ง พี่ อ ไคล้เดิง ไคล้ดุ้-อ้ะ นอ แม้ ฆึ ท อ้า ท ซ๊าง ดี๊-อ้ะ ปะ ล้อ.
[12] จ ท ไคล้ โอ ได้ะ แอ เม้ง พี่ จ ม โล้ เอะ น ซื๊ง แบ เด้าะ จ ล แบ ซ้ะ กวิ้ ลู่ง ไละ พ้า แบ. จ แบ ซ้ะ เฌ๊ โอ น ซื๊ง ก้างแก้ เท่อ ดี๊ นุ้ ล โค๊ บี่ ซุ้ ก ม ซ้ะอวีง ซ้ะโทะ ซกุ้ กู้ง~ๆ ล๊า~ๆ.
[13] น น่าง พี่ กแช่ แยว้ ลึ นี่-อ้ะ อ พู นอ ท ยื่ง ซ้ะ ดี๊ น ซื๊ง.